2 Korintus 12:14 - Kaili Ledo

¹⁴ Pariaramo tesaku hitu. Sii-sii nasadiamo yaku tou mompelioda komiu katalu-ngganina, bo yaku batena ledo mekitanggu nte komiu. Sabana, ledo kakalumanamiu nieloku tapi pepotovemiu! Apa ledo ngana anu masipato mompasiromu kakalumana ka totuana tapi totua masipato mompasiromu kakalumana ka ngana.

2 Korintus 12:14 ပူးပေါင်းရင်းမြစ်များ

Suro-Suro 20:33

Ledo ria sanggania nario mataku ka doi bara ka pakea ntona.

1 Korintus 10:24

Nee aga mompekirika kabelo karomiu mboto, tapi pekirika muni kabelo ntona ntanina.

1 Korintus 10:33

Yaku mboto nompasimbuku matuvu mompakadamba pura-pura rara ntona riara mpengaya-ngaya pokaingguku. Yaku ledo aga nompekirika kabelo karoku mboto tapi yaku nompekirika kabelo ntona pura-pura, ala ira pura-pura mamala rapakasalama.

1 Korintus 11:34

Ane maria tona naara taina, agina ia mangande ntani ruru lako ri banuana mboto. Nee sampe masiromu mosanggani-nggani bo aga rapambela pehuku nu Alatala. Bo ane yaku tou nte komiu ngena, damo kupakasiayu parakara-parakara ntanina.

1 Korintus 16:5

Maupu kupelioda ira ri propinsi Makedonia pade tou mompeinta komiu, apa yaku nonia moliu ri Makedonia mami.

1 Korintus 4:19

Tapi ane rapodota nTupu, masalisa yaku tou nte komiu. Bo ane makava yaku, kupeinta mboto nuapa rapovia ntona nalanga rarana haitu. Kupeinta ira bara mpuu-mpuu nakuasa atau aga notesa nggoo.

1 Korintus 9:12

Iyapa guru-guru ntanina masipato manjarumaka petanggumiu, nemopa kami! Tapi kami ledo sanggania nerapi petulungi haitu. Kami aga nombatidamaka riara mpengaya-ngaya kasusa ala ledo mompakantamo tona mombatanggu katuvua kami sampe mombalava ira mantarima Kareba Belo i Kristus.

1 Korintus 9:18

Jadi nuapa tamboku? Nadamba raraku nompatolele Kareba Belo ledo nerapi gaji bo ledo muni nerapi petulungi anu masipato kutarima lako ri pokarajaaku nompatolele Kareba Belo. Kadambaku haitumo nirekeku tamboku.

1 Korintus 9:19

Yaku hii ledo batua ntona, namala natuvu nangoseaka dotaku mboto. Tapi nitunggaiku natuvu mpo batua ka pura-pura tona. Nipoviaku ivesia ala madea mpuu tona kukeni momparasaya i Yesus.

2 Korintus 1:15

Nisaniku komiu mpuu-mpuu nadamba nompekirika yaku. Haitu sampe yaku nonia ronggani mesai nte komiu, ala komiu mamala mantarima belo ronggani kadeana lako nte yaku. Patujuku mesai mompelioda komiu ntani ruru pade mapola hau ri propinsi Makedonia. Bo tempo manjili lako ri Makedonia pade mesai vai mompelioda komiu ala komiu mamala mantulungi yaku mompapola polipaku hau ri bagia Yudea.

2 Korintus 11:9

Bo tempo yaku nonturo nte komiu, ane naria paraluuku, ledo nipakasesaku komiu. Apa nuapa-nuapa niparaluuku haitu nipakagana nu sampesuvu-sampesuvu sampomparasaya nakava lako ri propinsi Makedonia. Yaku bate-batena nompasimbuku ala ledo mompakasesa komiu mompekirika katuvuku. Bo batena kupasimbuku ivesia, ledo kuperapi nte komiu.

2 Korintus 12:13

Ledo nipoposisalaku komiu ante todea topomparasaya ntanina. Aga sangaya ledo nipoviaku nte komiu, haitumo yaku ledo nekitanggu nte komiu. Nipekirimiu nasala yaku novia ivesia? Ledo ntoto!

Galatia 4:19

Yaku mpuu-mpuu nompotove komiu! Komiu mpo anaku mboto! Yaku nandasa nompekirika komiu, nasimbayu mpo mombine nandasa mpuu tempo noana. Bo yaku batena masusa ivesia sampe inggu-inggu i Kristus mpuu-mpuu malanto rakita riara nggatuvumiu.

Filipi 4:1

Jadi, sampesuvu-sampesuvu nipotoveku bo nipolentoraku. Komiu mpuu-mpuu nompakadamba raraku, bo nasana mpuu raraku sabana pomparasayamiu asele pokarajaaku nompatolele Kareba Belo. Nantora anu niuliku pangane, nee molengga-lengga momparasaya bo mangoseaka i Pue Yesus.

Filipi 4:17

Yaku ledo aga madota mantarima pedekeimiu. Tapi yaku madota ala belo ratambai ka komiu lako ri poviamiu nabelo haitu.

1 Tesalonika 2:11

Nisanimiu mbotomo, kami nasaro nompatuduki komiu mpo totua langgai nompatuduki anana mboto. Kami nompakaroso raramiu bo nasaro nompopatora komiu matuvu mompakadamba rara nu Alatala. Apa Iamo nompokio komiu majadi todeaNa ri PoparentaNa bo mombarasai kaogeNa.

1 Tesalonika 2:8

Nambaso mpuu tove kami nte komiu, sampe kami nadamba nompatolele Kareba Belo ka komiu. Bo kami muni nasadia mantulungi komiu nau kami mamate, sabana kami mpuu-mpuu nompotove komiu!