2 Korintus 11:13 - Kaili Ledo

¹³ Suro-suro anu ledo ria kasimbayuna haitu aga suro-suro mpodava! Topokarajaa natenggo. Niulira iramo suro-suro i Kristus, tano mai ledo!

2 Korintus 11:13 ပူးပေါင်းရင်းမြစ်များ

Matius 25:24

Naupu haitu nakavamo batua niparasayaka sanjobu mpeka doi bulava. Nanguli ia, ‘Pua, nisaniku komiu tona nasoa. Komiu nangala asele ntalua anu ledo potudamiu bo komiu nosombe anu ledo posavumiu.

Suro-Suro 15:1

Naria bara sako-ndua toYahudi nakava ri Antiokhia lako ri bagia Yudea anu nomparasaya i Yesus. Ira nompatuduki topangoseaka i Yesus ri sia ivei: “Ane komiu ledo rasuna nantuntuni Atura-atura nipapola Nabi Musa, komiu ledo mamala rapakasalama.”

Suro-Suro 15:24

Niepe kami naria bara sako-ndua tona lako nte kami tou nte komiu nompakasusa bo nompakaingu komiu ante pepatudukira. Tapi kakanana ledo nitudu kami ira movia ivesia.

Suro-Suro 20:30

Lako nte komiu mboto meumba tona mompatuduki anu ledo nakana. Rapoviara ivesia ala topangoseaka i Yesus domo mangoseaka dala nakana, tapi mangoseaka iramo.

Roma 16:18

Sabana, tona nokainggu ivehaitu ledo nokarajaa ka Tuputa i Kristus, tapi aga nangoseaka dotara mboto. Tona dopa nisanina belo pepatuduki nakana, nibagiura ante tesa-tesara napande bo namomi.

2 Korintus 11:15

Bo kita ledo muni mahera ane batua nu Magau Seta mantabuniaka pokainggura nadaa bo nokainggu mpo topokarajaa anu nangoseaka dota nu Alatala. Tapi kaupuna ira rabalasi ante pehuku nangoseaka anu nipoviara.

2 Korintus 2:17

Nadea tona nompatolele Tesa nu Alatala ala mangelo untu ka karora mboto. Tapi ledo ivesia kami. Patuju kami nagasa bo tesa kami nakana, apa kami nisuro nu Alatala mompatolele TesaNa. Jadi kami notesa ante kuasa i Kristus bo Alatala nanggita povia kami haitu.

2 Korintus 4:2

Tapi ane kami, kami domo nangoseaka pokainggu nadaa anu nepakaeya. Kami ledo nebagiu bo ledo nantenggoaka Tesa nu Alatala. Alatala sabi kami bo nikitaNa kami aga nompatolele anu nakana ala rasani ntodea kami namala raparasaya.

Galatia 1:7

Kakanana ledo ria “kareba belo” ntanina, aga Kareba Belo nipatolele kami ka komiu. Tapi naria tona nompakagado pekirimiu ante pepatudukira nasala. Patujura aga mombabaliki Kareba Belo anu nantesaki i Kristus.

Galatia 2:4

Tapi naria tona ntanina madota mompasuu i Titus rasuna, nangoseaka atura agama Yahudi. Panguli ntona haitu, ira topomparasaya i Kristus, tano aga davara. Ira nesua nggalino-lino ri kasiromu kami bo nomata-matai kami. Patujura ala pura-pura topomparasaya matundu nte atura-atura agama Yahudi. Tapi kita ledo paraluu matundu nte atura-atura haitu ala majadi manoa ri panggita nu Alatala. Kita nikabasaka lako ri atura haitu sabana kita nosangu rara ante i Yesus Kristus.

Galatia 4:17

Tona ntanina ri situ nompasimbuku mpuu-mpuu mangala raramiu, tapi patujura ledo nabelo. Ira aga madota mompopogaa kita ala komiu mangoseaka ira ante raramiu mpuu-mpuu.

Galatia 6:12

Tona nanggeni pepatuduki nasala haitu aga madota mompopakita pangoseakara Atura agama ala ratoiya nu roara toYahudi. Haitumo sabana ira madota mompasuu komiu rasuna. Patujura ala ira ledo rapandasa ntoYahudi. Apa ane rasarumakara i Kristus anu namate ri kayu salib bo domo raoseakara Atura agama, rapandasa ntoYahudimo ira.

Efesus 4:14

Ane ivesia kita, kita domo mpo ngana anu ledo nakaja rabagiu, atau sakaya kodi nitompesaka nu balumba bo nikeni nu poiri hau tumai. Kita domo aga rataja hau tumai mangoseaka mpengaya-ngaya pepatuduki anu ledo nakana, bo domo kaliu-liu momparasaya tesa-tesa ntopebagiu anu natau gaga nodava, dava nipoviara mboto. Patujura, mompakasalandala kita.

Filipi 3:18

Apa nadea ngganimo niuliku ka komiu bara ipia bo sii-sii kuuli vai ante tangi, nadeamo tona natuvu ante pokainggu nadaa. Niulira ira topomparasaya tapi pokainggura nadaa nompakalanto pesapuakara. Ledo niparasayara i Kristus namate ri kayu salib mombakabasaka kita lako ri kuasa nu dosa.

Filipi 3:2

Komiu kana mainga nte tona manggeni pepatuduki nadaa, anu noinggu mpo asu nasoa. Ira madota mompasuu komiu rasuna nangoseaka atura i Musa. Pangulira kita kana rasuna ala mpuu-mpuu manoa ri panggita nu Alatala. Nee raparasayamiu!

Kolose 2:4

Patuju ntesaku hitu ala komiu ledo rabagiu ntona ante tesa-tesara anu mompakaluu raramiu.

Kolose 2:8

Komiu kana mainga, nee sampe komiu rabagiu ntona ante pepatuduki ledo nakana bo ledo ntoto noguna. Apa pepatuduki haitu aga nangoseaka pekiri nu manusia, bo nopuna lako ri malaeka-malaeka nadaa anu nombakuasai dunia. Pepatuduki haitu ledo nopuna lako nte i Kristus.

1 Yohanes 2:18

Sampesuvu-sampesuvu nipotoveku, naparamo kaupu dunia. Niepemiumo bara ipia, kana meonga saito anu niuli Bali i Kristus. Bo sii-sii nadeamo tona neumba nobali ka i Kristus. Haitu tandana naparamo kaupu dunia.

1 Yohanes 4:1

Sampesuvu-sampesuvu nipotoveku, nee kaliu-liu raparasayamiu pura-pura tona nanguli naria Nosa Gasa nu Alatala nte ira. Tapi peintaka ruru, ala rasanimiu bara Nosa Gasa mpuu naria nte ira, bara ledo. Niuliku ivesia apa nadeamo nabi mpodava ri umba-umba ri dunia sii-sii.

Yudas 1:4

Nariamo bara sako-ndua tona nesua nggalino-lino ri tatangata ntopomparasaya. Pangulira ira sampesuvuta sampomparasaya, tano mai ira ledo nangoseaka dota nu Alatala. Pangulira ledo makuya kita mangoseaka dota rarata nadaa, apa Alatala nompotove kita bo raampungiNa salata haitu. Tapi pepatuduki haitu ledo ntoto nakana, ira aga nombatenggoaka pepatuduki anu nombatesa kabelo nu Alatala. Nisapura i Yesus Kristus saito-itoNa Magau bo Tuputa. Lako ri nggauluname pehuku rapambela ka ira nipakatantu mamimo bo nitulisi riara Buku Gasa.

Pompakita 19:20

Tapi binata nadaa nisaka sanggani ante nabi mpodava bo ira randua nitedaka nggatuvu riara ntasi apu anu navaya ante vatu-vatu colonggata navaya. Nabi mpodava haitumo novia tanda-tanda nipokumaaka ante kuasa nidekei nu binata nadaa ka ia. Ante tanda-tanda nipokumaaka, ia nombabagiu tona nimere ante tanda nu binata nadaa bo tona nombasomba pinoitona.

Pompakita 2:2

NisaniKu pura-pura pokainggumiu. Komiu natutu nokarajaa ka Yaku bo komiu nosabara tempo nipandasa sabana nomparasaya Yaku. NisaniKumo komiu ledo nasituju ante pokainggu ntona nadaa. Tona nompangaku karona suro-suroKu tano ledo nakana, niparesamiu pokainggura sampe nalantomo ira topodava.

Pompakita 2:20

Tapi da nariapa sangaya pokainggumiu anu ledo ntoto nipodambaKu. Haitumo mombine anu nosanga i Izebel anu nompangaku karona nabi. Komiu nompaloga ia nompatuduki bo nombabagiu topangoseaka Yaku. Ia nompatuduki ira mosipogau ante tona ledo bereira mboto bo mangande kandea nipopali sabana nipakande ka tupu-tupu ntanina.

Pompakita 2:9

NisaniKu kasusa bo kapari nirasaimiu. NisaniKu komiu mpuu-mpuu napepa, tapi kakanana komiu nakalumana riara pomparasayamiu. NisaniKu komiu nisalai ntona anu nompangaku karona toYahudi tano ledo nakana. Ira aga todea nu Magau nu Seta.