2 Korintus 10:3 - Kaili Ledo

³ Kami aga manusia biasa, tapi ane kami nangeva pepatuduki anu ledo nakana, kami ledo nangeva mpo manusia biasa anu ledo nosisani nte Alatala.

2 Korintus 10:3 ပူးပေါင်းရင်းမြစ်များ

Roma 7:5

Bara ipia, dopame kita nomparasaya i Yesus, kita natuvu nangoseaka dota rarata anu nadaa. Anu nitagi nu Atura agama, aga haitumo nipodotata rapovia. Jadi, nipaketa karota novia dosa sampe kita masipato rahuku mate bo rapopogaa lako nte Alatala.

Roma 8:13

Sabana, ane kita matuvu mangoseaka dotata mboto nadaa, kita mamate bo rapopogaa lako nte Alatala. Tapi ane rakabasakata pokaingguta nadaa ante kuasa lako nte Nosa Gasa nu Alatala, kita matuvu mabelo sampe ri kasae-saena.

Roma 8:4

Alatala novia haitu ala kita mpuu-mpuu mompakule mokainggu manoa, mangoseaka parenta ri Atura agama. Apa kita domo natuvu nangoseaka dota rarata anu nadaa. Sii-sii kita nangoseaka dota Nosa Gasa nu Alatala.

2 Korintus 1:17

Tapi niaku haitu nabali. Bara raulimiu yaku aga nebalingoya. Atau raulimiu yaku nompakatantu niaku nangoseaka dotaku mboto, sanggani nanguli “Iyo,” sanggani nanguli “Ledo.”

2 Korintus 10:4

Kami ledo nangeva ante pompakule nu manusia biasa. Tapi kami nangeva ante pompakule nidekei nu Alatala. Pompakule haitu nabaraka, jadi kami nompakule nombadagi nuapa-nuapa nangeva pepatuduki nakana. Kami namala nirapaka tantara anu nompakaropu kuasa nu balira nau bara berimba karosona.

Galatia 2:20

Jadi namala rauli ivei: nau yaku natuvu, domo aga yaku saitoku natuvu, tapi i Kristus natuvu riara nggatuvuku. Bo ri katuvuku ri dunia hitu, yaku natuvu mpuu-mpuu nomparasaya Ana nu Alatala anu nompotove yaku bo nombadekei karoNa rapatesi manjambei yaku.

1 Timotius 1:18

Timotius, iko mpo anaku mboto! Oseakamo parenta-parenta kudekei ka iko, apa parenta hitu nosinggambela nte petevai nu Alatala anu nipasimbayu ntopanggeni agama ka iko bara ipia. Pariaramo petevai nu Alatala haitu ala maroso raramu mombatui pokarajaa nipakatantu ka iko. Pasimbukumo mombatui pokarajaa haitu masimbayu mpo tantara nabia neeva.

2 Timotius 4:7

Nituntuniku belomo dala nipakatantu i Pue ka yaku; nipakaupukumo pokarajaa nidekeiNa ka yaku. Yaku ledo nolengga-lengga nomparasaya i Kristus sampe ri kaupuna.

Ibrani 12:1

Jadi namala raulita, pura-pura ira pangane nombatiku kita bo nompakaroso rarata ante posabira. Sabana haitu, kita muni kana mombatedaka pura-pura anu nompopekai rarata bo dosa anu nekantaka nte kita. Kita kana maroo rarata mangoseaka dala nipakatantu nu Alatala ka kita, nasimbayu mpo topangova ri posilumba.