2 Korintus 1:17 - Kaili Ledo

¹⁷ Tapi niaku haitu nabali. Bara raulimiu yaku aga nebalingoya. Atau raulimiu yaku nompakatantu niaku nangoseaka dotaku mboto, sanggani nanguli “Iyo,” sanggani nanguli “Ledo.”

2 Korintus 1:17 ပူးပေါင်းရင်းမြစ်များ

Matius 1:19

I Yusuf, tengeana, tona natutu nangoseaka atura agama. Haitu sampe ia nonia mombabole tengeana i Maria. Tapi ledo nadota ia mompakaeya i Maria ri ngayo ntodea. Jadi patujuna mombabole i Maria nggalino-lino.

Matius 5:37

Tapi ane patujumiu iyo, ulimo iyo, bo ane patujumiu ledo, ulimo ledo. Ledo nabelo mompakaroso tesa ante mosumpa sabana pokainggu eva haitu nopuna lako ri Magau nu Seta.”

Yohanes 8:15

Komiu nompakasala tona nangoseaka pompekirimiu mboto. Yaku ledo nompakasala tona.

2 Korintus 1:12

Nadamba mpuu rara kami apa nisani kami nabula rara kami. Kami nasaro nokainggu nanoa nte tona pura-pura, nelabipa nte komiu. Pura-pura anu nipovia kami, ledo ria nuapa-nuapa nitabuniaka kami. Patuju kami nanoa, nangoseaka dota nu Alatala. Pokainggu kami ledo nangoseaka kapande nu manusia, tapi nangoseaka pompakule nidekei nu Alatala.

2 Korintus 11:18

Nadea tona ntanina nangoe karora mboto bo anu nipoviara ante karosora mboto. Jadi ivesia muni yaku mangoe karoku.

Galatia 1:16

Ia nompopaisani AnaNa i Yesus ka yaku ala yaku mamala mompatolele Kareba Belo anu notesaki AnaNa haitu ka tona ledo toYahudi. Tempo yaku nipokio nu Alatala, yaku ledo kaliu-liu hau nte manusia merapi rapatuduki, apa i Yesus mbotomo nompopaisani Kareba haitu ka yaku.

Galatia 2:2

Yaku hau ri Yerusalem sabana naria tesa nu Alatala nombatudu yaku hau. Nakavapa hamai, yaku aga nasiromu ante pakeni-pakeni ntodea topomparasaya, bo nipopaisaniku ka ira isi Kareba Belo anu nipatoleleku ka tona ledo toYahudi. Nakini raraku mbelaka rasalaira pepatudukiku sampe domo maria gunana pokarajaaku mompatolele Kareba Belo, nau anu nipoviaku bara ipia, atau anu da nipoviaku sii-sii.

1 Tesalonika 2:18

Kami nonia mami tou nte komiu bara ipia. Yaku mboto bara sako-ngganimo nompasimbuku mosinggava nte komiu, tapi Magau Seta nasaro nombalava kami sampe dopa najadi.

Yakobus 5:12

Sampesuvu-sampesuvu, paraluu mpuu rapariaramiu hitu: nee mompakaroso tesa ante sumpa. Nee mosumpa manggasangai langi bara tana bara nuapa-nuapa ntanina. Ane patujumiu manguli iyo, naganamo raulimiu “iyo”. Ane patujumiu manguli ledo, naganamo raulimiu “ledo”. Nee mosumpa ala komiu ledo rahuku nu Alatala.