1 Yohanes 2:5 - Kaili Ledo

⁵ Tapi isema-sema nangoseaka parenta nu Alatala, tona haitumo mai mpuu-mpuu nompotove Alatala. Haitumo tandana kita mpuu-mpuu natuvu nosangu rara ante Alatala.

1 Yohanes 2:5 ပူးပေါင်းရင်းမြစ်များ

Lukas 11:28

Tapi nesana i Yesus, “Nakana, tapi nabelopa tona nangepe tesa nu Alatala bo nioseakana.”

Yohanes 14:21

Isema-sema mompariara bo mangoseaka parenta-parentaKu, iamo nompotove Yaku. Bo isema-sema nompotove Yaku, ia muni rapotove nTuamaKu, bo Yaku mboto mompotove ia bo mompopaisani karoKu ka ia.”

Yohanes 14:23

Nesana i Yesus, “Isema-sema nompotove Yaku raoseakana tesaKu. Bo TuamaKu mompotove ia bo Yaku ante TuamaKu makava monturo mosanggani-nggani ante ia.

Yohanes 15:5

Yakumo hii valaa anggur bo komiumo tu tinggu-tingguna. Ane komiu maroo mosangu rara nte Yaku bo Yaku maroo mosangu rara ante komiu, komiu movua madea. Tapi ane komiu mogaa lako nte Yaku, ledo rapakulemiu movia nuapa-nuapa.

Yohanes 6:56

Isema-sema mangande isi karoKu bo manginu raaKu, iamo maroo mosangu rara ante Yaku bo Yaku maroo mosangu rara ante ia.

Roma 8:1

Jadi sii-sii domo ria pehuku rapambela ka tona nosangu rara ante i Yesus Kristus.

1 Korintus 1:30

Lako nte Alatala sampe kita najadi nosangu rara ante i Yesus Kristus. Bo lako nte i Kristus sampe nisanita kapande nu Alatala. Ia nompoposinggabelo kita ante Alatala sampe kita najadi todea nagasa nipatani ka Alatala. Bo Iamo nombakabasaka kita lako ri pura-pura anu nadaa.

2 Korintus 5:17

Ane tona nosangu rara ante i Kristus, ia najadi manusia nabaru. Katuvuna nggaulu naliumo bo katuvuna nabaru mpuu-mpuu nariamo.

2 Korintus 5:21

I Kristus ledo ntoto nadosa. Tapi Alatala nompoposimbuaka ka Ia dosata bo nipoviaNa Ia mpo tona nadosa ala manjambei kita. Alatala novia haitu ala kita anu nosangu rara nte i Kristus majadi manoa ri panggitaNa.

Yakobus 2:22

Lako rahaitu nisanita pomparasaya Nabi Abraham nasinggeni ante pokaingguna, bo pokaingguna haitu nompakalanto ia mpuu-mpuu nomparasaya.

1 Yohanes 3:24

Isema-sema nanturusi parenta nu Alatala, iamo natuvu nosangu rara ante Alatala bo Alatala muni nonturo riara ntaina. Bo nisanita Alatala nosangu rara ante kita sabana Nosa Gasa nidekeiNa naria riara ntaita.

1 Yohanes 4:17

Ane kita nompotove sampesuvuta sampomparasaya, haitumo tandana kita mpuu-mpuu nompotove Alatala sampe ledo makaja rarata mantingayo Ia ri Eo Potangara ri kaupu dunia. Ledo makaja rarata mantingayo Ia sabana pokaingguta ri dunia hitu masimbayu mpo pokainggu i Kristus.

1 Yohanes 4:18

Ane mpuu-mpuu nirasaita tove nu Alatala nte kita, kita domo maeka nte Alatala. Apa tove nu Alatala ka kita nompakaroso rarata sampe kita domo maeka nte Ia. Ane kita naeka nompekirika Eo Potangara ri kaupu nu dunia, batuana dopa nisanita mpuu Alatala nompotove kita.

1 Yohanes 5:2

Hitumo tandana ala rasanita kita nompotove roa-roata anu najadi ana-ana nu Alatala: kita nompotove Alatala bo nangoseaka parenta-parentaNa.

1 Yohanes 5:20

Nisanita muni i Yesus, Ana nu Alatala, nakava ri dunia hitu mompakanoto rarata ala kita mamala mosisani belo ante Alatala anu nakana. Kita natuvu nosangu rara nte Alatala anu nakana sabana kita natuvu nosangu rara nte AnaNa, i Yesus. Iamo Alatala anu nakana bo Iamo nombadekei katuvua nabelo sampe ri kasae-saena.

2 Yohanes 1:6

Iveimo anu niuli tove: kita kana matuvu mangoseaka parenta nu Alatala anu niepeta lako ri pamulana: Kita kana matuvu mosimpotove.

Pompakita 12:17

Nagigi mpuumo rara nu ule naga haitu nanggita mombine, sampe ia hau mombaeva muli-muli nu mombine haitu ntanina, haitumo tona natutu nangoseaka parenta-parenta nu Alatala bo bate-batena nanggangisi pepatuduki i Yesus.

Pompakita 14:12

Anu nopoko ri sii, todea nu Alatala kana maroo momparasaya bo mosabara tempo mombarasai susa, haitumo ira anu nangoseaka parenta-parenta nu Alatala bo ledo nenonto nomparasaya i Yesus.”