1 Yohanes 2:4 - Kaili Ledo

⁴ Tona nanguli ia nosisani belo ante Alatala, tapi ledo nioseakana parenta-parenta nu Alatala, tona haitu topodava. Ledo ntoto nioseakana dota nu Alatala.

1 Yohanes 2:4 ပူးပေါင်းရင်းမြစ်များ

Yohanes 8:44

Komiu nasimbayu ante tuamamiu, Magau nu Seta! Komiu batena madota mangoseaka dotana. Lako ri pamulaname ia bate-batena topepatesi. Ia ledo nosabingga ka anu nakana, sabana ledo ria nuapa-nuapa nakana riara ntaina. Masipato ia modava, apa ia topodava mami bo puna nu dava.

Titus 1:10

Niuliku ivesia, sabana nadeamo tona nangeva pepatuduki nakana, nelabipa topanguli kita topomparasaya kana mangoseaka Atura-atura agama evamo ada suna. Ira nombabagiu tona ntanina ante tesara anu ledo ria batuana.

Titus 1:16

Pangulira ira nosisani ante Alatala, tapi pokainggura ledo nosinggambela nte tesara. Pokainggura aga nompakarunggu rara nu Alatala, bo ira ledo nadota natundu nte Alatala. Ledo nipakulera nokainggu nabelo.

1 Yohanes 1:10

Tapi ane raulita ledo sanggania kita novia dosa, haitu nasimbayu ante nompopodava Alatala. Kita aga nombasapuaka tesaNa, bo ledo ntoto nipariarata.

1 Yohanes 1:6

Ane raulita kita nosangu rara ante Alatala, tano mai kita aga natuvu ri kalandana, kita nodava, bo kita ledo natuvu nangoseaka dota nu Alatala.

1 Yohanes 1:8

Ane raulita ledo ria dosata, kita nombabagiu karota mboto. Haitu tandana ledo ntoto nioseakata dota nu Alatala.

1 Yohanes 2:3

Ane raoseakata parenta-parenta nu Alatala, haitumo tandana kita nosisani belo ante Ia.

1 Yohanes 2:9

Isema-sema nanguli ia natuvu riara reme tapi navuu matana nte sampesuvuna sampomparasaya, tona haitu bate-batena da riara kalandana sampe sii-sii.

1 Yohanes 3:6

Jadi isema-sema natuvu nosangu rara nte Ia, domo novia dosa. Tapi isema-sema batena novia dosa, ledo niparasayana mpuu i Yesus bo ledo nosisani belo nte Ia.

1 Yohanes 4:20

Isema-sema nanguli ia nompotove Alatala, tano mai navuu matana nanggita sampesuvuna sampomparasaya, ia mai topodava! Ane ia ledo nompotove sampesuvuna anu nikitana, natantumo ledo mamala ia mompotove Alatala anu ledo nikitana.

1 Yohanes 4:7

Sampesuvu-sampesuvu nipotoveku, kita kana mosimpotove sabana tove nopuna lako nte Alatala. Isema-sema nepotove, iamo ana nu Alatala, bo nosisani belo ante Alatala.