1 Yohanes 2:15 - Kaili Ledo

¹⁵ Jadi nee mompotove dunia hitu, bo nuapa-nuapa riarana. Isema-sema nompotove dunia hitu, ledo nipotovena Alatala.

1 Yohanes 2:15 ပူးပေါင်းရင်းမြစ်များ

Matius 4:8

Naupu haitu, Magau nu Seta nanggeni i Yesus hau ri tutu nu bulu nelabi kalangana. Bo nipopakitana ka Ia pura-pura kamagaua bo poparenta naria riara dunia hitu ante mpengaya-ngaya kagayana bo kakalumanana.

Matius 6:24

Ledo rapakule ntona saito matundu nte madika randua. Apa saito rapotovena bo saitopa ledo rapeilina. Saito raoseakana parentana bo saitopa rapoarana. Ivesia muni ante komiu. Ane komiu mompotove mbara-mbara ri dunia hitu, ledo rapakulemiu mpuu-mpuu mangoseaka dota nu Alatala.”

Lukas 16:13

Ledo rapakule nu batua saito matundu nte madika randua. Sabana, saito rapotovena bo saitopa ledo rapeilina. Saito raoseakana parentana bo saitopa rapoarana. Ivesia muni komiu. Ane komiu mompotove mbara-mbara ri dunia hitu, ledo rapakulemiu mpuu-mpuu mangoseaka dota nu Alatala.”

Yohanes 15:19

Ane rapana komiu nosangu pekiri ante tona ledo nomparasaya Yaku, natantumo rapotovera komiu sabana komiu roara mboto. Tapi komiu ledo nosangu pekiri ante ira, sabana Yaku nompelisi komiu bo nopatani komiu ka Yaku. Jadi haitu sampe komiu nipovuu matara.

Roma 12:2

Domo rapasialamiu kabiasa ntona ledo nosisani nte Alatala. Dekeimo Alatala mompakabaru pekirimiu ala inggumiu mabali. Ane ivesia, rasanimiu mpuu-mpuu dota nu Alatala, haitumo, rasanimiu anu nabelo, anu nipokono nu Alatala, bo anu ledo nasala ri panggitaNa.

Galatia 1:10

Jadi, berimbamo, sampesuvu-sampesuvu? Yaku nanguli ivesia mbeki ratoiya ntona? Ledo ntoto nakana! Yaku aga madota ratoiya nu Alatala. Bara nipekirimiu yaku aga madota mompakadamba rara nu manusia. Tapi haitu ledo muni nakana, apa ane rapana yaku da nompasimbuku mompakadamba rara nu manusia, ledo masipato yaku majadi batua i Yesus Kristus!

Efesus 2:2

Komiu natuvu nangoseaka kabiasa-kabiasa nu manusia ri dunia hitu, haitumo komiu nangoseaka dota nu Magau Seta, pakeni nu kuasa-kuasa nadaa ri laerava. Iamo nombakuasai rara ntai ntona anu ledo natundu nte Alatala.

1 Timotius 6:10

sabana pompotove doi puna mpengaya-ngaya kadaa. Sanu tona nompasimbuku nangelo doi sampe nasalandalamo bo domo nioseakara pepatuduki nakana, bo aga mpengaya-ngaya kasusa nikavara anu nompakabuku rarara.

Yakobus 1:27

Tapi poagama nakana, anu ledo rasalai nTuamata Alatala, haitumo nantulungi ngana-ngana pailu bo timbala-timbala nasusa, bo nombajagai karo mboto ala ledo mangoseaka pokainggu nadaa nipovia ntona anu ledo nosisani nte Alatala.

Yakobus 4:4

Komiu nasimbayu mpo topobualo apa komiu ledo natutu nangoseaka Alatala. Ledo nisanimiu? Ane rapoinota anu nipodota ntona nadaa ri dunia hitu, kita majadi bali nu Alatala. Isema-sema mompoino anu nipoino ntona nadaa ri dunia hitu, ia nompajadi karona mboto bali nu Alatala.

1 Yohanes 3:17

Isema-sema nagana katuvuna bo nikitana sampesuvuna napepa, tapi ledo nadota ia mantulungi sampesuvuna haitu, natantumo ledo ntoto nipotovena Alatala.

1 Yohanes 4:5

Nabi-nabi mpodava gahaitu ledo nangoseaka dota nu Alatala. Haitu sampe pepatudukira nangoseaka pekiri ntona ri dunia anu ledo nangoseaka dota nTupu, bo nadamba tona nompetalingai pepatudukira.

1 Yohanes 5:10

Isema-sema nomparasaya Ana nu Alatala, nisanina nakana mpuu posabi nu Alatala. Tapi isema-sema ledo nomparasaya Alatala, batuana ia nompopodava Alatala sabana ledo niparasayana posabi nu Alatala nombatesa AnaNa.