1 Yohanes 2:1 - Kaili Ledo

¹ Sampesuvu-sampesuvu nipotoveku, patujuku notulisi sura hitu ka komiu ala nee rapoviamiu dosa. Tapi ane maria tona movia dosa, naria saito topombasaliku, Iamo i Yesus Kristus anu nanoa. Iamo mombasaliku kita ri ngayo nTuamaNa Alatala.

1 Yohanes 2:1 ပူးပေါင်းရင်းမြစ်များ

Lukas 10:22

Pade nanguli i Yesus ka tona ri sia, “Pura-pura nidekei nTuamaKu ka Yaku. Ledo ria tona mpuu-mpuu nosisani nte Yaku Ana nu Alatala, aga TuamaKu Alatala. Bo ledo ria tona mpuu-mpuu nosisani ante TuamaKu, aga Yaku, AnaNa mboto bo isema-sema Kupodota, Kupopaisanika TuamaKu ka ia.”

Yohanes 13:33

Ana-anaKu, domo masae Yaku mosanggani-nggani ante komiu. Raelomiu Yaku ngena, tapi ledo rakavamiu. Haitu niuliKu ka pakeni-pakeni ntoYahudi bara ipia, ivesia muni Kuuli ka komiu: ri umba Kukalau komiu ledo mamala metuntuni.

Yohanes 14:16

Bo Kuperapi nte TuamaKu ala radekeiNa ka komiu Topetulungi ntanina, anu maroo nte komiu sampe ri kasae-saena.

Yohanes 14:6

Nesana i Yesus, “Yakumo hii dala, Yakumo nompopaisani anu nakana bo Yakumo nombadekei katuvua nabelo. Ledo ria saitoa mamala makava ri ngayo nTuamaKu ane ledo ante Yaku.

Yohanes 21:5

I Yesus nompongare anaguruNa riara sakaya, “Berimbamo, le? Naria bau nikavamiu?” Nesana ira, “Ledo ntoto naria.”

Yohanes 5:14

Naupu haitu i Yesus nosinggava nte tona haitu riara Banua nu Alatala, bo niulikaNa ka ia, “Peinta vei! Nabelomo iko. Jadi tumo mupovia dosa ala iko ledo mambela anu nadaapa vai pade duamu tutu.”

Yohanes 5:36

Tapi naria sangayapa anu nompakalanto isema Yaku, bo anu haitu nopokopa pade sabi i Yohanes Topediu, haitumo pokarajaaKu. PokarajaaKu niparasaya nTuamaKu ka Yaku ala Kupakaupu. Pokarajaa haitumo nompakalanto Yaku hii nitudu nTuamaKu.

Yohanes 6:27

Nee aga mokarajaa ala manggava kandea anu masalisa maupu atau mavai. Agina komiu mokarajaa ala manggava kandea anu ledo mavai bo anu mombadekei katuvua mabelo sampe ri kasae-saena. Yaku, Ana nu Manusia mombadekei kandea haitu ka komiu, sabana Yakumo nianggataka nTuamaKu Alatala mantui pokarajaa haitu.”

Yohanes 8:11

Nesana mombine haitu, “Domo ria, Pue.” Nanguli i Yesus, “Yaku muni ledo mombahuku iko. Panjilimo bo tumo rapovia dosa.”

Suro-Suro 7:52

Ledo ria saitoa nabi ledo nipandasa ntotuamiu nggaulu. Nipatesira muni nabi-nabi anu nompatolele kareba kakava i Yesus, Batua nu Alatala nanoa. Bo sii-sii nipobalumiu bo nipatesimiu Batua nu Alatala haitu!

Roma 5:10

Bara ipia, tempo kita da nangeva Alatala, nidekeiNa AnaNa mamate mombasambei kita, ala kita rapoposinggabelo mpanjili ante Ia. Sii-sii kita nosinggabelomo ante Alatala, jadi natantumo kita rapakasalama lako ri pehuku bara maipia, sabana i Kristus bate-batena natuvu.

Roma 6:15

Jadi, ane kita domo nipou Atura agama, tapi nanjarumaka pepotove nu Alatala, berimbamo? Mamala kita batena movia dosa? Ledo ntoto mamala!

Roma 8:34

Isema mabia mompakasala kita? Ledo ntoto ria, sabana i Kristus namate mantolosi dosata. Bo ledo aga haitu, Ia nipakatuvu mpanjili bo nonturo ri panggana nu Alatala ri suruga, bo Iamo nanjaliku kita ri ngayo nu Alatala.

1 Korintus 15:34

Jadi pakanoto mpanjili pekirimiu bo tumo rapovia dosa! Da nariapa sanu komiu dopa nosisani belo nte Alatala. Niuliku ivesia ala maeya matamiu.

2 Korintus 5:21

I Kristus ledo ntoto nadosa. Tapi Alatala nompoposimbuaka ka Ia dosata bo nipoviaNa Ia mpo tona nadosa ala manjambei kita. Alatala novia haitu ala kita anu nosangu rara nte i Kristus majadi manoa ri panggitaNa.

Galatia 4:19

Yaku mpuu-mpuu nompotove komiu! Komiu mpo anaku mboto! Yaku nandasa nompekirika komiu, nasimbayu mpo mombine nandasa mpuu tempo noana. Bo yaku batena masusa ivesia sampe inggu-inggu i Kristus mpuu-mpuu malanto rakita riara nggatuvumiu.

Efesus 2:18

Jadi, kita pura-pura, toYahudi bo tona ledo toYahudi, namala mosinggava nte Tuamata Alatala riara posambayata sabana anu nipovia i Kristus. Kita mamala mosinggava nte Ia ante petulungi Nosa GasaNa sangu.

Efesus 4:26

Ane marau komiu, nee sampe rau raramiu mompakanavu komiu riara dosa. Nee mombaboli rau rara sampe masolo eo,

1 Timotius 2:5

haitumo, Alatala aga saito, bo aga saito muni topetariolo anu nompoposinggabelo Alatala bo manusia. Topetariolo, Iamo i Yesus Kristus.

1 Timotius 3:14

Timotius, nisarumakaku masalisa yaku tou mosinggava nte iko. Tapi naupa ivesia, nitulisiku sura hitu ka iko

Ibrani 9:24

Sabana, i Kristus ledo nesua ri tenda petupu ri dunia anu nipovia mpale manusia, anu nogambarai Tenda nTupu mpuuna ri suruga. Tapi Ia nesua ri suruga bo hamai Ia batena mantingayo Alatala ala mantulungi kita.

Yakobus 1:27

Tapi poagama nakana, anu ledo rasalai nTuamata Alatala, haitumo nantulungi ngana-ngana pailu bo timbala-timbala nasusa, bo nombajagai karo mboto ala ledo mangoseaka pokainggu nadaa nipovia ntona anu ledo nosisani nte Alatala.

Yakobus 3:9

Ante tesata kita nombatoiya Tuamata Alatala, bo ante tesata muni kita nopindasi singgamanusiata anu nipajadi nu Alatala nangoseaka lenjeNa mboto!

1 Petrus 2:22

Ia ledo sanggania novia dosa, ledo sanggania Ia nodava.

1 Petrus 3:18

Apa i Kristus muni nombarasai kasusa nau ledo novia anu nadaa. Ia aga sanggani namate nombasompo dosa manusia nagana sampe ri kasae-saena. Ia ledo nasala, tapi Ia namate nanjambei kita anu nasala, ala mompoposinggabelo kita ante Alatala. Ia nipatesi tapi nipakatuvu mpanjili ante kuasa Nosa Gasa nu Alatala.

1 Yohanes 3:18

Sampesuvu-sampesuvu nipotoveku, nee aga mompotove sampesuvuta sampomparasaya ri sumba. Kita kana mompotove mpuu bo kita kana mompopakita tove haitu ante pokainggu nabelo.

1 Yohanes 3:5

Nisanimiumo patuju i Yesus nakava ri dunia ala Ia mompakalali pura-pura dosa manusia. Bo nisanimiu muni Ia mboto ledo ntoto nadosa.

1 Yohanes 3:7

Sampesuvu-sampesuvu nipotoveku, nee rapaloga tona mombabagiu komiu. Toramo! Isema-sema batena novia dota nu Alatala, iamo tona nanoa ri panggita nu Alatala nasimbayu mpo i Kristus nanoa ri panggita nu Alatala.

1 Yohanes 4:4

Sampesuvu-sampesuvu nipotoveku, komiumo ana-ana nu Alatala bo nidagimiumo nabi-nabi mpodava gahaitu, sabana Nosa Gasa nu Alatala anu riara ntaimiu nakuasapa pade Magau nu Seta anu nombakuasai pekiri ntona ledo nangoseaka dota nu Alatala.

1 Yohanes 5:17

Pura-pura pokainggu nasala niuli dosa. Tapi naria muni dosa anu ledo nompopogaa tona lako nte Alatala sampe ri kasae-saena.

1 Yohanes 5:21

Sampesuvu-sampesuvu nipotoveku. Jagaimo, nee metupu nte tupu-tupu anu ledo nakana. Tabe lako nte yaku, Yohanes

3 Yohanes 1:4

Ledo ria anu nompakadamba raraku nelabipa pade nangepe kareba nanguli ana-anaku natuvu nangoseaka pepatuduki nakana.