1 Timotius 5:17 - Kaili Ledo

¹⁷ Pakeni ntodea topomparasaya anu nabelo pekeniakara, masipato rabila ronggani kadeana pade tona ntanina, nelabipa ira anu nompasimbuku mpuu nompatuduki bo nompatolele Tesa nu Alatala.

1 Timotius 5:17 ပူးပေါင်းရင်းမြစ်များ

Matius 24:25

Toramo! Lave nipopaisaniKu mamimo ka komiu dopame majadi haitu pura-pura, jadi nee rabagiu!

Lukas 10:7

Ane ratarima ntupu banua komiu, ponturo ri siamo. Inumo bo kandemo anu radekeina ka komiu, sabana topokarajaa masipato mantarima tambona. Nee molinja-linja hau ri banua ntanina.

Lukas 12:42

Nesanamo i Yesus, “Haitu niuliKu ka batua nanoto bo natutu neoseaka. Tona haitu raanggataka nu madikana majadi topompasiayu pura-pura batua ntanina riara banua. Iamo mompasiayu kandea ka batua-batua ntanina eo-eo.

Yohanes 4:38

Komiu Kutudu hau mokato anu ledo nitudamiu. Tona ntanina notuda bo komiumo mangala asele mpanggaviara.”

Suro-Suro 11:30

Sintuvura haitu nipoviara mpuumo, nitudura i Barnabas bo i Saulus manggeni pedekeira haitu ka pakeni-pakeni ntopangoseaka i Yesus ri ngata Yerusalem.

Suro-Suro 20:35

Riara mpengaya-ngaya, katuvuaku najadi jonjo ka komiu, haitumo, kita kana mokarajaa ala rapakuleta mombatulungi tona ledo nompakule nokarajaa. Kita kana mompariara tesa i Pue Yesus anu nanguli: ‘Nadambapa tona nombadekei pade tona nantarima.’ ”

Suro-Suro 28:10

Nadea hadia nidekeira ka kami, tandana pobilara kami. Bo bara sakuya kasaena naliutaka haitu tempo kami manggalivo malaimo, pura-pura anu niparaluu riara polipa kami, nikenira hau ri kapala nipesavi kami.

Roma 12:8

Isema-sema nidekeika pompakule mompakaroso rara ntona ntanina, kana rapakarosona mpuu-mpuu. Isema-sema nidekeika pompakule mombadekei anu naria nte ia ka tona ntanina, kana radekeina ante joi rarana. Isema-sema nidekeika pompakule manggeniaka todea, kana rakeniakana ira ante rarana mpuu-mpuu. Isema-sema nidekeika pompakule mompoasi tona nandasa, kana rapoasina ante damba rarana.

Roma 15:27

Niara haitu nipoviara lako ri dotara mboto, ledo nipasuu. Tapi kakanana, masipato muni ira mantulungi roara toYahudi sampomparasaya. Apa lako ri toYahudi sampe tesa nu Alatala nikeni ka tona ledo toYahudi. Jadi masipato mpuu tona ledo toYahudi mantulungi toYahudi ante mbara-mbara lako ri dunia hitu.

Roma 16:12

Pakavote muni tabeku ka i Trifena bo i Trifosa. Randua mombine haitu nokarajaa ntamo ka Tupu. Bo pakavote tabeku ka i Persis anu nipotoveta. Ia muni mombine anu nokarajaa ntamo ka Tupu.

1 Korintus 15:10

Tapi lako ri pepotove nu Alatala, yaku najadi suro i Pue Yesus. Bo pepotoveNa haitu naria aselena riara nggatuvuku. Yaku nokarajaa nelabipa kantamona pade suro-suro i Yesus ntanina. Tapi kakanana ledo yaku anu nokarajaa ntamo ivesia. Alatala anu nompotove yaku, Iamo nokarajaa nosanggani-nggani ante yaku.

1 Korintus 16:16

pekoumo nte tona ivehaitu bo nte pura-pura tona nokarajaa ntamo nosanggani-nggani nte ira nantulungi todea topomparasaya.

1 Korintus 3:9

Apa kami bo i Apolos nosampokarajaa ante Alatala, bo komiumo nirapaka talua nu Alatala. Komiu muni nirapaka banua nu Alatala.

2 Korintus 6:1

Jadi kami hii nokarajaa nosanggani-nggani ante Alatala nompatolele TesaNa ka manusia. Haitumo sabana kami merapi nte komiu ante mpuu-mpuu rara, nee sampe kabelo rara nu Alatala nte komiu haitu ledo maria aselena riara nggatuvumiu.

Galatia 6:6

Tona nipatudukika Tesa nu Alatala masipato mantulungi topompatuduki ia, bo mombabagi ka ia nuapa-nuapa nabelo naria nte ia.

Filipi 2:16

Apa komiu nompatolele ka ira Kareba Belo anu namala manggeni ira matuvu mabelo sampe ri kasae-saena. Ane komiu matuvu ivesia, madamba mpuu raraku tempo i Kristus makava mpanjili, sabana katuvumiu haitu tandana naria mpuu asele pokarajaaku, bo ledo aga nalenge bayangi yaku nokarajaa ntamo ri tatangamiu bara ipia.

Filipi 2:29

Jadi tarimamo ia ante madamba apa ia sampesuvuta sampomparasaya. Bo bilamo pura-pura tona nokarajaa mpo ia

Filipi 4:3

Bo kuperapi muni nte vega rapaku i Sunsugos, tulungimo mombine randua pangane ala ira mosangu rara mpanjili. Ira nokarajaa ntamo ante yaku nompatolele Kareba Belo nasimbayu mpo i Klemens bo roa-roaku ntanina sampokarajaa. Sangara nitulisi riara Buku Katuvua, anu nompakatantu isema masipato matuvu mabelo sampe ri kasae-saena.

1 Timotius 3:5

Apa ane ledo rapakulena mompasiayu tona ri banuana mboto, berimbamo rapakulena mompasiayu todea topomparasaya Alatala?

1 Timotius 4:10

Haitu sampe kita nompasimbuku mokarajaa ntamo mompatuduki pepatuduki nakana, sabana kita nanjarumaka Alatala anu Natuvu sampe ri kasae-saena. Iamo nompakule nompakasalama pura-pura manusia, nelabipa tona nomparasaya Ia.

1 Timotius 4:14

Nee malinga mompake pompakule nidekei nu Nosa Gasa ka iko tempo tona nompasimbayu petevai lako nte Alatala ka iko bo pakeni ntopomparasaya nodika palera ri balenggamu.

1 Timotius 4:16

Jagaimo pokainggumu bo jagai muni pepatudukimu. Iko kana matutu movia pura-pura anu nipatudukiku ka iko. Apa ane mupovia ivesia, iko mboto rapakasalama bo topangepe pepatudukimu muni rapakasalama.

1 Timotius 4:6

Ane mupatuduki pura-pura haitu pangane ka sampesuvuta sampomparasaya, iko majadi topokarajaa nabelo ka i Yesus Kristus. Bo iko mompakaroso raramu mboto ante Tesa nu Alatala anu niparasayata, bo ante pepatuduki nakana anu nioseakamu sampe sii-sii.

1 Timotius 5:19

Ane maria pakeni ntodea topomparasaya nirai ntona, nee mutarima ane ledo maria randua bara tatalu sabi mompakakana perai haitu.

1 Timotius 5:3

Bilamo bo tulungimo timbala-timbala anu mpuu-mpuu ledo ria tona nompeili ira.

2 Timotius 2:6

Topotalua anu nokarajaa ntamo, iamo paratama masipato mantarima asele ntaluana haitu.

2 Timotius 4:2

Patolelemo Tesa nu Alatala. Iko kana mompasimbuku mompatolele Tesa haitu nau bara ratarima ntona bara ledo. Popaisani ka tona ane masala pokainggura, onteakamo tona novia dosa, bo pakadidimo rarara mokainggu mabelo. Nee masau raramu mompatuduki ira.

Ibrani 13:17

Oseakamo parenta-parenta nu pakeni-pakenimiu bo pekoumo nte ira, sabana iramo nombajagai pomparasayamiu. Makava tempona bara maipia ira kana manguli pakalanto ri ngayo nu Alatala berimbana komiu nikeniakara. Jadi pekoumo nte ira ala ira mamala mantui pokarajaa haitu ante damba nu rara. Ane komiu ledo mekou, aga masusa rarara bo haitu ledo manggeni belo ka komiu.

Ibrani 13:24

Pakavote tabe kami ka pura-pura pakenimiu bo ka pura-pura todea nu Alatala ri situ. Bo tarimamo tabe lako nte sampesuvuta sampomparasaya ri propinsi Italia.

Ibrani 13:7

Pekirikamo katuvu pakeni-pakeni anu nanggeni Tesa nu Alatala ka komiu bara ipia. Pariarantaimo jonjo katuvura bo kamatera, bo pasialamo pomparasayara.