1 Tesalonika 4:5 - Kaili Ledo

⁵ Nee aga matuvu nte bereimiu mangoseaka dota nu rara mabuga, anu biasa najadi nte tona ledo nosisani nte Alatala.

1 Tesalonika 4:5 ပူးပေါင်းရင်းမြစ်များ

Matius 6:32

Haitu puramo nielo ntona anu ledo nosisani ante Alatala. Tapi ledo paraluu makini raramiu sabana pura-pura anu niparaluumiu haitu nisani nu Alatala, Tuamamiu ri suruga.

Lukas 12:30

Haitu pura anu nielo ntona ledo nosisani nte Alatala. Tapi ledo paraluu makini raramiu, sabana Alatala Tuamamiu, nisaniNa pura-pura anu niparaluumiu.

Suro-Suro 17:23

Apa tempo yaku nanjayo-njayo riara ngatamiu nikitaku nadea pompakande viata. Bo nikavaku sangu pompakande anu naria nitulisi, ‘Pompakande ka Tupu Ledo Nisani SangaNa.’ Tupu haitu nisombamiu, nau ledo nisanimiu sangaNa. Tupu haitumo kupopaisani ka komiu ri sii.

Roma 1:24

Manusia ledo nadota netupu nte Alatala, jadi Alatala nompalamba ira nangoseaka dota rarara mboto bo nokainggu nadaa, sampe posipogaura mpuu-mpuu nepakaeya.

Roma 1:26

Ira ledo nadota netupu nte Alatala, jadi Alatala nompalamba ira mangoseaka dota rarara nabuga anu nepakaeya. Mombine-mombine domo nompokono langgai mpo biasana najadi nte manusia, tapi noberei simbo mombinemo.

Roma 1:28

Tona gahaitu ledo nadota mosisani ante Alatala. Jadi Alatala nompalamba ira rakeniaka mpekirira nadaa sampe ira novia anu ledo masipato rapoviara.

1 Korintus 1:21

Alatala napande mpuu, bo nipakatantuNa manusia ledo mamala mosisani ante Ia ane aga manjarumaka kapandera mboto. Tapi nibotusiNa mompakasalama isema-sema momparasaya Kareba Belo nipatolele kami. Tano mai tona ri dunia nanguli Kareba haitu aga tesa ntodoyo.

1 Korintus 15:34

Jadi pakanoto mpanjili pekirimiu bo tumo rapovia dosa! Da nariapa sanu komiu dopa nosisani belo nte Alatala. Niuliku ivesia ala maeya matamiu.

Galatia 4:8

Bara ipia, dopame nisanimiu Alatala, komiu nipobatua nu tupu-tupu ntanina anu nisarumakamiu nakuasa, tano mai, ledo Alatala.

Efesus 2:12

Bara ipia, dopa nisanimiu i Kristus. Komiu mpo tosangatana apa komiu ledo nosamporoa nte toYahudi anu nipelisi nu Alatala majadi todeaNa. Komiu ledo nanggava bagia riara pojanji nu Alatala ka todeaNa. Komiu aga natuvu bayangi riara dunia hitu bo ledo nisanimiu Alatala, bo ledo ria panjarumakamiu nuapa-nuapa.

Kolose 3:5

Sabana haitu, kabasakamo pokainggu-pokainggu anu nopuna lako ri dunia nadaa hitu. Nee mosipogau ante tona ledo bereimiu mboto, nee movia pokainggu anu ledo masipato, nee mangoseaka dota raramiu nabuga bo dota-dota ntanina anu nadaa. Bo nee muni maoge rara manggava melabipa pade tona ntanina, sabana anu nipooge rarata haitumo najadi anu nisombata, bo haitu nasimbayu nte metupu nte tupu ntanina.

2 Tesalonika 1:8

bo ante apu navaya-vaya. Ia manau mombahuku tona ledo nadota nompeili Alatala bo ledo nadota nangoseaka Kareba Belo anu notesaki Tuputa Yesus.

1 Petrus 4:3

Apa naganamo logamiu bara ipia nangoseaka pokainggu-pokainggu ntona ledo nosisani nte Alatala. Bara ipia komiu aga natuvu nangoseaka dota raramiu nadaa ante pokainggu naruto, komiu nabiasa nalangu-langu, komiu nasiromu nangande mpebasa bo nanginu, bo komiu nompakande tupu-tupu ntanina, pokainggu anu nepakarunggu.