1 Tesalonika 4:13 - Kaili Ledo

¹³ Sampesuvu-sampesuvu, patuju kami ala rasanimiu mpuu anu majadi ante topomparasaya anu namatemo, ala ledo masusa raramiu mpo tona ntanina anu ledo nanjarumaka matuvu mpanjili nosanggani-nggani nte Alatala.

1 Tesalonika 4:13 ပူးပေါင်းရင်းမြစ်များ

Matius 27:52

Nadea dayo natebuka bo nadea tona nanoa anu namatemo natuvu mpanjili

Yohanes 11:24

Nanguli i Marta, “Iyo. Nisaniku ia matuvu mpanjili ri kaupu nu dunia tempo pura-pura tona namate matuvu mpanjili.”

Suro-Suro 13:36

Tesa hitu ledo nambela i Daud, sabana naupu ia novia anu nitudu nu Alatala ka ia, namatemo ia. Bo ia nitana ri sinjori dayo ntotuana nggaulu, bo karobatana napopomo.

Suro-Suro 7:60

Bo nantaputu ia bo nongare ante suara namangga, “Pue, ampungimo dosara hitu!” Naupu haitu, namatemo ia.

Suro-Suro 8:2

Tona natundu nte Alatala nombatana i Stefanus ri dayo, bo nombatangisi ia ante nasusa mpuu rarara.

Roma 1:13

Sampesuvu-sampesuvu, kana rasanimiu nadea ngganimo yaku nonia tou mosinggava nte komiu tapi nasaro natelava sampe sii-sii. Patujuku mosinggava nte komiu ala madea komiu mangoseaka i Pue Yesus nasimbayu mpo anu najadi nte tona ledo toYahudi ri ngata ntanina.

1 Korintus 10:1

Sampesuvu-sampesuvuku, toramo anu najadi ante totuata nggaulu tempo ira nangoseaka Nabi Musa. Ira pura-pura nilenduti nu tinja kulimu tandana Alatala nosanggani-nggani nte ira, bo pura-pura ira nasalama nombavote Tasi Lei.

1 Korintus 12:1

Kapolana, sampesuvu-sampesuvu. Kutesaki pompakule nidekei nu Nosa Gasa nu Alatala ala rasanimiu mpuu-mpuu anu nakana.

1 Korintus 15:6

Bo naupu haitu nipopakitaNa karoNa ka salunu topangoseaka Ia nelabi lima-atu tona kadeana. Nau bara sako-ndua ira namatemo, deanapa ira da natuvu sampe sii-sii.

2 Korintus 1:8

Sampesuvu-sampesuvu, kami madota ala rasanimiu kasusa bo kapari nirasai kami ri propinsi Asia nadaa mpuu. Pepandasa nirasai kami neliu gagamo sampe naupu rara kami, domo nisarumaka kami matuvu.

Efesus 2:12

Bara ipia, dopa nisanimiu i Kristus. Komiu mpo tosangatana apa komiu ledo nosamporoa nte toYahudi anu nipelisi nu Alatala majadi todeaNa. Komiu ledo nanggava bagia riara pojanji nu Alatala ka todeaNa. Komiu aga natuvu bayangi riara dunia hitu bo ledo nisanimiu Alatala, bo ledo ria panjarumakamiu nuapa-nuapa.

Efesus 2:3

Bara ipia kita pura-pura nokainggu nasimbayu mpo tona haitu; kita muni natuvu nangoseaka mpengaya-ngaya dota rarata nadaa. Kita aga novia anu nompakasana karota bo pekiri rara ntaita nadaa. Kakanana kita masipato rapambela pehuku nu Alatala sabana pokaingguta haitu. Kita nasimbayu mpo tona ntanina nadaa.

1 Tesalonika 4:14

Niparasayata i Yesus namate bo natuvu mpanjili. Haitumo sabana niparasayata muni pura-pura tona nomparasaya i Yesus bo namatemo rapakatuvu nu Alatala mpanjili, bo Alatala mompoposanggani ira nte i Yesus.

1 Tesalonika 4:15

Siimo pepatuduki lako nte i Pue Yesus mboto rapapola kami ka komiu ivei: tempo i Pue Yesus makava mpanjili, kita anu da natuvu ledo mokolu ka roa-roata anu namatemo.

1 Tesalonika 5:10

Ia namate nombatolosi kita ala tempo Ia makava mpanjili, nau kita da natuvu atau namatemo, kita matuvu mosanggani-nggani ante Ia.

1 Tesalonika 5:6

Jadi kita kana mainga bo manoto rarata, nee mamonjo-monjo mpo tona da natuvu ri kalandana.

2 Petrus 3:4

bo manguli, “I Yesus nojanji makava mpanjili ri dunia. Tapi ledo ria nakava. Tantu ledo majadi, sabana lako ri tempo kamate ntotuata nggaulu sampe sii-sii, dunia hitu ledo nabali-bali. Pura-pura bate-batena nasimbayu lako ri lamba pamulana tempo dunia nipajadi sampe sii-sii.”

2 Petrus 3:8

Tapi, sampesuvu-sampesuvu nipotoveku, nee rakalingasimiu tesa hitu: Ri panggita nTupu, sanjobu mpae nasimbayu mpo saeo, bo saeo nasimbayu mpo sanjobu mpae.