1 Tesalonika 3:5 - Kaili Ledo

⁵ Jadi sia sampe nituduku i Timotius tou nte komiu, ala kusani berimba pomparasayamiu, sabana domo nipakuleku mantaamaka kalentora raraku nompekirika komiu. Nakini raraku nee-nee komiu bara mamala radagi nu Magau Seta ante pesori-pesorina sampe domo ria asele lako ri katiti nu ini kami nanggeni Kareba Belo ka komiu.

1 Tesalonika 3:5 ပူးပေါင်းရင်းမြစ်များ

Matius 4:3

Bo nakavamo Magau nu Seta nanggaparai Ia bo nanguli, “Ane Komiu Ana nu Alatala, tudumo vatu-vatu hitu majadi kandea!”

Suro-Suro 15:36

Ledo nasae kaliuna haitu, i Paulus nanguli ka i Barnabas, “Hau kita manjili ri ngata-ngata nikalauta bara ipia nompatolele tesa nu Alatala. Kita kana hau manggita sampesuvu-sampesuvu anu nomparasaya i Yesus hamai, ala rakitata berimbamo katuvura.”

1 Korintus 7:5

Nee mogaa mosampaturu ane ledo ria posimpoiyomiu njamboko. Ane rapana komiu mangelo loga mosambaya, ledo makuya komiu mogaa mosampaturu bara sakuya kasaena ane raposimpoiyomiu njamboko. Tapi ane maupumo tempo nipakatantu haitu, komiu kana manjili mosampaturu ala nee komiu rapesori Magau nu Seta mogau sala sabana komiu ledo mamala mantaamaka dota raramiu.

2 Korintus 2:11

Tona haitu niampungikumo ala nee sampe Magau nu Seta manggava loga mombadagi kita, sabana nisanita mamimo akalana.

2 Korintus 6:1

Jadi kami hii nokarajaa nosanggani-nggani ante Alatala nompatolele TesaNa ka manusia. Haitumo sabana kami merapi nte komiu ante mpuu-mpuu rara, nee sampe kabelo rara nu Alatala nte komiu haitu ledo maria aselena riara nggatuvumiu.

Galatia 2:2

Yaku hau ri Yerusalem sabana naria tesa nu Alatala nombatudu yaku hau. Nakavapa hamai, yaku aga nasiromu ante pakeni-pakeni ntodea topomparasaya, bo nipopaisaniku ka ira isi Kareba Belo anu nipatoleleku ka tona ledo toYahudi. Nakini raraku mbelaka rasalaira pepatudukiku sampe domo maria gunana pokarajaaku mompatolele Kareba Belo, nau anu nipoviaku bara ipia, atau anu da nipoviaku sii-sii.

Galatia 4:11

Nakini mpuu raraku, nee-nee ledo maria gunana katiti nu iniku nompatuduki Kareba Belo ka komiu bara ipia!

Efesus 4:14

Ane ivesia kita, kita domo mpo ngana anu ledo nakaja rabagiu, atau sakaya kodi nitompesaka nu balumba bo nikeni nu poiri hau tumai. Kita domo aga rataja hau tumai mangoseaka mpengaya-ngaya pepatuduki anu ledo nakana, bo domo kaliu-liu momparasaya tesa-tesa ntopebagiu anu natau gaga nodava, dava nipoviara mboto. Patujura, mompakasalandala kita.

Filipi 2:16

Apa komiu nompatolele ka ira Kareba Belo anu namala manggeni ira matuvu mabelo sampe ri kasae-saena. Ane komiu matuvu ivesia, madamba mpuu raraku tempo i Kristus makava mpanjili, sabana katuvumiu haitu tandana naria mpuu asele pokarajaaku, bo ledo aga nalenge bayangi yaku nokarajaa ntamo ri tatangamiu bara ipia.

Filipi 2:19

Ane rapodota i Pue Yesus, yaku nonia masalisa mombatudu i Timotius tou nte komiu, ala tempo ia manjili tumai, raraku rapakavoe mangepe karebamiu.

1 Tesalonika 2:1

Sampesuvu-sampesuvu, nisanimiu mbotomo tempo kami nakava nte komiu bara ipia, kami ledo aga nalenge bayangi, tapi nariamo aselena.

1 Tesalonika 3:6

Tapi hitupa nanjilimo i Timotius lako ritu nte komiu, bo nitesana ka kami karebamiu anu nompakadamba rara kami, ivei: “ToTesalonika naroso pomparasayara, bo nosimpotove. Ira bate-batena nantora kita ante damba rara bo ira nalentora manggita kita nasimbayu mpo kita nalentora manggita ira.”