1 Tesalonika 2:4 - Kaili Ledo

⁴ Kami ledo notesa aga mompakadamba rara manusia. Kami notesa mompakadamba rara nu Alatala, sabana Iamo nomparesa rara ntai kami, bo Iamo nombareke kami masipato mompatolele Kareba Belo.

1 Tesalonika 2:4 ပူးပေါင်းရင်းမြစ်များ

Lukas 12:42

Nesanamo i Yesus, “Haitu niuliKu ka batua nanoto bo natutu neoseaka. Tona haitu raanggataka nu madikana majadi topompasiayu pura-pura batua ntanina riara banua. Iamo mompasiayu kandea ka batua-batua ntanina eo-eo.

Lukas 16:11

Jadi ane komiu ledo namala niparasaya ante kakalumana ri dunia nadaa hitu, isema momparasaya komiu ante kakalumana nabelo ri suruga?

Yohanes 21:17

Bo i Yesus nekutana vai katalu-ngganina, “Simon, ana i Yohanes, nipotovemu mpuumo Yaku?” Nangepe haitu, nasusa mpuumo rara i Petrus, sabana talu-ngganimo i Yesus nompekutana ia. Jadi nesana i Petrus, “Pue, nisaniMiu mpengaya-ngaya. NisaniMiu nipotoveku Komiu.” Nanguli i Yesus, “Ane ivesia, piaramo bimba-bimbaKu.

Roma 8:27

Bo nisani nu Alatala isi rara ntai manusia, bo nisaniNa patuju nu Nosa Gasa haitu, sabana Nosa Gasa nosambaya ka todea nu Alatala, nangoseaka dota nu Alatala mboto.

1 Korintus 7:25

Ane pompekutanamiu ka tona dopa noberei, ledo ria parenta lako nte i Pue Yesus. Tapi kutesa ka komiu panggavaku mboto. Bo tesaku hitu masipato raparasayamiu sabana pompakule nidekei nTupu ka yaku lako ri pompotoveNa.

1 Korintus 9:17

Ane rapana dotaku mboto mompatolele Kareba haitu, tantu masipato yaku manggava tambo. Tapi ledo ivesia yaku. Yaku nompatolele Kareba Belo, ledo lako ri dotaku mboto. Bara kupodota bara ledo, kana kupatolele Kareba Belo apa haitumo pokarajaa niparasaya nu Alatala ka yaku.

2 Korintus 2:17

Nadea tona nompatolele Tesa nu Alatala ala mangelo untu ka karora mboto. Tapi ledo ivesia kami. Patuju kami nagasa bo tesa kami nakana, apa kami nisuro nu Alatala mompatolele TesaNa. Jadi kami notesa ante kuasa i Kristus bo Alatala nanggita povia kami haitu.

2 Korintus 4:2

Tapi ane kami, kami domo nangoseaka pokainggu nadaa anu nepakaeya. Kami ledo nebagiu bo ledo nantenggoaka Tesa nu Alatala. Alatala sabi kami bo nikitaNa kami aga nompatolele anu nakana ala rasani ntodea kami namala raparasaya.

2 Korintus 5:11

Jadi naeka rara kami movia anu ledo rapokono nTupu, apa nisani kami Ia mombatangara kita pura-pura. Jadi haitumo sabana kami nompasimbuku manggeni tona momparasaya i Yesus. Nisani nu Alatalamo isi rara ntai kami. Bo nisarumakaku rasanimiu muni isi rara ntai kami bo domo monggai raramiu mompekirika kami.

2 Korintus 5:16

Jadi haitumo sabana kami domo nombareke tona bara nabelo bara nadaa nangoseaka pekiri manusia. Bara ipia ivesia mami kami nombareke i Kristus, tapi hitupa domo.

Galatia 1:10

Jadi, berimbamo, sampesuvu-sampesuvu? Yaku nanguli ivesia mbeki ratoiya ntona? Ledo ntoto nakana! Yaku aga madota ratoiya nu Alatala. Bara nipekirimiu yaku aga madota mompakadamba rara nu manusia. Tapi haitu ledo muni nakana, apa ane rapana yaku da nompasimbuku mompakadamba rara nu manusia, ledo masipato yaku majadi batua i Yesus Kristus!

Galatia 2:7

Tapi nisaniramo yaku niparasaya nu Alatala manggeni Kareba Belo ka tona ledo toYahudi, nasimbayu mpo i Petrus niparasaya nu Alatala manggeni Kareba Belo ka toYahudi.

Efesus 3:8

Yaku natueipa pade pura-pura todea nu Alatala ntanina. Tapi naupa ivesia, Alatala nabelo mpuu nte yaku bo nidekeiNa ka yaku pokarajaa mompatolele Kareba Belo ka komiu tona ledo toYahudi. Kareba haitu notesaki kabelo i Kristus anu naoge mpuu, ledo rapakuleta mombarekena.

Efesus 6:6

Nee aga mokarajaa mabelo tempo komiu rakita nu tuamiu ala komiu ratoiya nu manusia. Tapi pokarajaamo ante mpuu-mpuu raramiu najadi batua i Kristus anu nangoseaka dota nu Alatala.

Kolose 3:22

Sampesuvu-sampesuvu anu najadi batua, oseakamo pura-pura parenta nu tuamiu ri dunia hitu. Nee aga mangoseaka parentara tempo nikitara komiu ala komiu ratoiyara. Tapi oseakamo parentara ante rara mpuu-mpuu sabana komiu nombabila i Pue Yesus.

1 Timotius 6:20

Timotius, jagaimo pakabelo-belo pepatuduki nakana anu niparasaya nu Alatala ka iko ala ledo rabaliki ntona. Nee mompariara tesa ledo ria gunana bo ledo nanggeni kita mangoseaka dota nu Alatala, bo tesa-tesa anu nosisala nte pepatuduki nakana. Tesa-tesa haitu niuli ntona “pangisani”, tano ledo nakana.

2 Timotius 1:14

Pepatuduki haitumo kakalumana niparasaya nu Alatala ka kita. Jadi ante petulungi Nosa Gasa anu naria riara ntaita, jagaimo pepatuduki haitu. Nee radekei rabaliki ntona.

2 Timotius 2:2

Niepemumo pepatudukiku bo nadea tona ntanina nangepe bo nosabikina muni. Jadi pepatuduki haitu kana mupatuduki ka tona anu namala raparasaya bo anu nompakule mompatuduki tona ntanina.

Titus 1:3

Sii-sii ri tempo nipakatantuNa mboto, nipopaisani nu Alatala mpuumo pojanjiNa haitu ka manusia riara karebaNa anu nipatoleleku. Kareba Belo haitu niparasayaNa ka yaku bo nipatoleleku nangoseaka parenta nu Alatala, Topompakasalama kita.

Ibrani 4:13

Nau aga sangaya anu nipajadi nu Alatala, ledo ria sangua ledo nikitaNa. Pura-pura nalanto nikitaNa. Bo kita kana mompangaku pura-pura pokaingguta ka Ia bara maipia.

1 Petrus 4:11

Jonjona, isema-sema nidekeika pompakule mompasimbayu Tesa nu Alatala kana motesa mpo tona niposumba nu Alatala mboto. Isema-sema nidekeika pompakule mantulungi tona ntanina, kana mantulungi ante karoso nidekei nu Alatala ka ia. Pakemo pompakule-pompakule haitu ala nau damo nuapa majadi, Alatala ratoiya bo rabila sabana anu nipovia i Yesus Kristus ri katuvumiu. Alatalamo nakuasa bo masipato ratoiya bo rabila sampe ri kasae-saena. Amin!

Pompakita 2:23

Bo ana-anana Kupatesi sampe malanto ka pura-pura topomparasaya, Yakumo anu nomparesa pekiri bo rara ntai manusia, bo Yakumo anu mombabalasi komiu saito-saito nangoseaka pokainggumiu.