1 Tesalonika 2:16 - Kaili Ledo

¹⁶ Niuliku ivesia sabana toYahudi haitu nasaro nombalava kami. Kami madota mompatolele Kareba Belo ka tona ledo toYahudi ala rasanira ira mamala rapakasalama. Tapi toYahudi pangane nombalava kami bo ivesiamo aga nantambai dosara sampe nadea gagamo. Bo sii-sii ira mambela pehuku nu Alatala.

1 Tesalonika 2:16 ပူးပေါင်းရင်းမြစ်များ

Matius 12:45

Jadi seta haitu hau nompokio papitu seta ntanina anu nadaapa pade ia mboto. Bo nakavamo ira nesua nte tona haitu bo nonturo ri sia. Kaupuna katuvu ntona haitu tantu melabipa kadaana pade ri pamulana bara ipia. Ivesia muni anu majadi nte tona nadaa anu natuvu sii-sii sabana ira ledo nadota nomparasaya tesaKu.”

Matius 23:32

Jadi povia-viamo dosa nasimbayu ante dosa ntotuamiu nggaulu haitu!

Matius 24:14

Bo Kareba Belo nu Poparenta nu Alatala kana rapatolele ri njumangu dunia ala pura-pura manusia mamala mangepena. Maupu haitu, pade makava kaupu nu dunia.”

Matius 24:6

Raepemiu kareba posieva napara nte komiu, bo raepemiu muni kareba posieva ri ngata nakavao. Nee maeka raramiu, sabana haitu pura-pura kana majadi, tapi dopa nakava mpuu kaupu nu dunia.

Matius 3:12

Ia nasimbayu eva tona novaro pae. Nasadiamo Ia ante tapi ri paleNa bo ravarona paeNa sampe magasa. Pae naisi raboliNa riara gampiriNa, tapi meena rapalabusiNa riara apu anu ledo mapaya-paya.”

Markus 16:16

Isema-sema ledo momparasaya Kareba Belo haitu, kana rahuku. Tapi isema-sema momparasaya Yaku bo radiu tandana ia topangoseaka Yaku, ia rapakasalama.

Suro-Suro 13:45

Nanggita todea haitu, nasiriati mpuumo rara nu pakeni ntoYahudi. Nisalaira i Paulus, bo nievara pura-pura anu niulina.

Suro-Suro 13:50

Tapi tomaoge-tomaoge bo mombine-mombine anu naria nturona bo natundu nte Alatala, nipakapane ntoYahudi sampe i Paulus bo i Barnabas nipandasa bo nipopalai lako ri ngata haitu.

Suro-Suro 14:19

Naupu haitu, bara sako-ndua toYahudi lako ri ngata Antiokhia ri propinsi Pisidia bo muni lako ri ngata Ikonium nakava ri ngata Listra. ToYahudi haitu nantanara todea ri ngata Listra ala ira muni mangeva i Paulus sampe ira nombarempe i Paulus ante vatu bo niumbunjaira hau ri savaliku ngata. Niulira namatemo ia.

Suro-Suro 14:2

Tapi toYahudi anu ledo nadota nomparasaya, aga nompakapane rara ntona ntanina ledo toYahudi sampe navuu matara nanggita topangoseaka i Yesus.

Suro-Suro 14:5

ToYahudi bo pakeni ntoYahudi nosanggani-nggani ante tona ntanina ledo toYahudi, nasintuvu mompandasa bo mombarempe i Paulus bo i Barnabas ante vatu.

Suro-Suro 17:13

ToYahudi ri ngata Tesalonika nangepe i Paulus naria ri ngata Berea nompatolele Tesa nu Alatala. Jadi hau muni ira ri ngata Berea bo nipoviara kagado bo nipakapanera rara ntodea.

Suro-Suro 19:9

Tapi bara sako-ndua ira nakaa bagara bo ledo nadota nomparasaya. Ira nanjalai nia nu Alatala ri ngayo ntodea, haitumo niaNa mompakasalama manusia sabana anu nipovia i Yesus. Haitumo sabana i Paulus nompalaisi ira, bo nikenina topangoseaka i Yesus hau ri sikola i Tiranus. Eo-eo ia nosinjula pekiri ante tona ri sia.

Suro-Suro 21:21

Niepera kareba anu nompakasala komiu. Niepera komiu nompatuduki pura-pura toYahudi anu nonturo ri ngata ntona ledo toYahudi, ala rakabasakara Atura-atura agama haitu. Niepera muni komiu nompatuduki domo paraluu ira mombasuna anara bo domo paraluu mantuntuni ada ntoYahudi.

Suro-Suro 23:12

Naeo mpadondo, nelabi patapulu toYahudi nonia mompatesi i Paulus. Ira pura-pura nosumpa ane dopame rapatesira i Paulus, dopa mangande, dopa manginu.

Suro-Suro 24:9

ToYahudi ntanina ri sia nompangadu i Paulus muni, bo niulira tesa i Tertulus nakana mpuu.

Suro-Suro 25:2

Nakava sumai, balengga-balengga ntopanggeni pesomba bo pakeni-pakeni ntoYahudi nakava nte ia mombatesa parakara i Paulus ka ia. Ira mpuu-mpuu nerapi nte i Festus,

Suro-Suro 25:7

Nakavapa i Paulus, toYahudi anu notua lako ri ngata Yerusalem pangane, neangga nombatiku ia bo nompangadu ia ka i Festus. Mpengaya-ngaya kasala bo kadaa nipangadukara. Tapi aga nikara-karara nggoo, ledo ria katantuna nuapa sala i Paulus.

Suro-Suro 4:12

I Petrus nompapola tesana, “Aga i Yesus namala mompakasalama manusia, sabana ri njumangu dunia ledo ria saitoa tona ntanina nipakakuasa nu Alatala mompakasalama manusia, aga i Yesus saitoNa.”

Suro-Suro 9:23

Bara sakuya kasaena kaliuna haitu, toYahudi nasintuvu mompatesi i Saulus.

1 Korintus 10:33

Yaku mboto nompasimbuku matuvu mompakadamba pura-pura rara ntona riara mpengaya-ngaya pokaingguku. Yaku ledo aga nompekirika kabelo karoku mboto tapi yaku nompekirika kabelo ntona pura-pura, ala ira pura-pura mamala rapakasalama.

Galatia 5:11

Sampesuvu-sampesuvu, niuli ntona yaku mboto da nompatuduki tona kana rasuna ane madota majadi manoa ri panggita nu Alatala. Tapi ledo ntoto nakana! Ane rapana da nipatudukiku ivesia ka tona, nakuya bo da nipandasa ntoYahudi yaku? Ane rapana da nipatudukiku ivesia, natantu pepatudukiku ledo mompakadua rara ntoYahudi! Nadua rarara nangepe kamate i Kristus ri kayu salib.

Efesus 3:13

Jadi, sampesuvu-sampesuvu, kuperapi nte komiu, nee maupu raramiu nangepe yaku nitarunggu, sabana pura-pura kasusa nirasaiku sii-sii manggeni belo ka komiu.

Efesus 3:8

Yaku natueipa pade pura-pura todea nu Alatala ntanina. Tapi naupa ivesia, Alatala nabelo mpuu nte yaku bo nidekeiNa ka yaku pokarajaa mompatolele Kareba Belo ka komiu tona ledo toYahudi. Kareba haitu notesaki kabelo i Kristus anu naoge mpuu, ledo rapakuleta mombarekena.

1 Tesalonika 1:10

Nitesara muni berimba komiu nanjarumaka kakava i Yesus, Ana nu Alatala lako ri suruga. Ia nipakatuvu nu Alatala mpanjili lako ri kamateNa. Bo Iamo nombakabasaka kita lako ri pehuku nu Alatala anu rapambela ka tona nadosa bara maipia.

2 Tesalonika 2:10

Rapakena mpengaya akala nadaa mombabagiu tona anu masipato mami mamate bo rapopogaa lako nte Alatala. Ira mamate bo rapopogaa lako nte Alatala sampe ri kasae-saena sabana ira ledo nadota mantarima bo mompotove pepatuduki nakana lako ri Alatala, anu nompakule mompakasalama ira.

1 Timotius 2:4

Ia madota ala pura-pura tona rapakasalama bo mangisani pepatuduki nakana,

Ibrani 6:8

Tapi ane tana haitu aga mompakatuvu jono bo karui, ledo ntoto ria gunana. Tana haitu domo masae rapindasi nu Alatala. Bo kaupuna tana haitu rapalabu pakaupu.

Pompakita 22:11

Isema-sema nadaa pokaingguna, palambamo ia batena movia nadaa. Isema-sema naruto pokaingguna, palambamo ia batena movia anu naruto. Isema-sema nanoa, palambamo ia masaro movia anu nanoa. Isema-sema nagasa rarana, palambamo ia batena movia anu nagasa.”