1 Tesalonika 1:10 - Kaili Ledo

¹⁰ Nitesara muni berimba komiu nanjarumaka kakava i Yesus, Ana nu Alatala lako ri suruga. Ia nipakatuvu nu Alatala mpanjili lako ri kamateNa. Bo Iamo nombakabasaka kita lako ri pehuku nu Alatala anu rapambela ka tona nadosa bara maipia.

1 Tesalonika 1:10 ပူးပေါင်းရင်းမြစ်များ

Matius 1:21

I Maria mompoanaka saito ngana langgai, bo ngana haitu kana mupoposanga Yesus sabana Iamo mompakasalama todeaNa lako ri dosara.”

Matius 16:27

Jadi, oseakamo Yaku nau sampe mamate. Apa domo masae Yaku, Ana nu Manusia makava lako ri suruga ante kuasa bo reme lako nte TuamaKu, mosanggani-nggani ante malaeka-malaekaNa. Bo tempo haitu Kubalasi pura-pura tona nangoseaka pokaingguna.

Matius 16:28

Pariaramo tesaKu hitu! Naria bara sako-ndua komiu ri sii ledo mamate ane dopa rakitara Yaku, Ana nu Manusia, makava ri dunia hitu eva Magau.”

Matius 3:7

Nadea toFarisi bo toSaduki nakava mekidiu nte i Yohanes. Tapi tempo i Yohanes nanggita ira, nanguli ia, “Komiu noakala nasimbayu eva ule! Nisarumakamiu ane komiu radiu, komiu ledo rapambela pehuku nu Alatala bara maipia! Tapi ledo nakana!

Lukas 2:25

Tempo haitu ri ngata Yerusalem naria langgai nosanga i Simeon. Ia tona nanoa, anu natundu nte parenta nu Alatala bo nantongoraka tempona Alatala mompakasalama todea toIsrael. Nosa Gasa nu Alatala naria nte ia.

Lukas 3:7

Nadea tona neonga mekidiu nte i Yohanes. Niulikana ira, “Komiu noakala nasimbayu mpo ule! Nisarumakamiu ane komiu radiu, komiu ledo rapambela pehuku nu Alatala bara maipia! Haitu ledo nakana!

Suro-Suro 1:11

Nanguli malaeka haitu, “Heh, toGalilea! Nakuya komiu aga neangga ri sii, nantingoa langi? I Yesus anu nikitamiu pangane neore rou ri surugamo. Ivesia muni Ia manjili lako ri suruga tumai ri dunia, nasimbayu mpo nikitamiu pangane.”

Suro-Suro 17:31

Apa nipakatantuNamo tempona bara maipia pura-pura manusia ri dunia ratangara ri kanoana. Pokarajaa motangara haitu nidekeiNa ka saito tona nipelisiNa lako ri nggauluname. Alatala nompakatuvu mpanjili tona haitu lako ri kamateNa ala malanto ka pura-pura tona Ia mpuu-mpuu nipelisi nu Alatala majadi Topotangara pura-pura manusia.”

Suro-Suro 2:24

Komiu nompatesi i Yesus, tapi Alatala nompakatuvu mpanjili Ia lako ri kamateNa. NikabasakaNa Ia lako ri kuasa kamatea, sabana Ia ledo ntoto namala rataamaka ri ponturo ntona namate.

Suro-Suro 2:32

I Yesusmo hii niuli i Daud pangane, sabana Iamo tona nipakatuvu nu Alatala mpanjili. Kami pura-pura hii najadi sabiNa, sabana kami mboto nanggita i Yesus natuvu mpanjili.

Suro-Suro 3:15

Komiumo nombatudu tona nompatesi Ia, tano Iamo topombadekei katuvu nabelo sampe ri kasae-saena ka manusia. Bo Alatala nompakatuvu mpanjili Ia lako ri kamateNa. Kami najadi sabiNa, sabana kami mboto nanggita i Yesus natuvu mpanjili.

Suro-Suro 3:21

I Yesus kana monturo ri suruga sampe makava tempona Alatala mompakabaru pura-pura, evamo nitesaNa ka nabi-nabi nipelisiNa nggaulu.

Suro-Suro 4:10

Jadi ala rasanimiu bo ala rasani nu sampesuvuta toIsrael pura muni, kami manguli ka komiu, tona hitu nipakabelomo bo ia neangga ri ngayomiu pura-pura sabana kuasa lako nte i Yesus Kristus toNazaret. Komiu nombapaku i Yesus ri kayu salib sampe namate, tapi Alatala nompakatuvu Ia mpanjili.

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

Roma 4:25

I Yesus nidekei nu Alatala rapatesi mombasompo dosata bo naupu haitu Ia nipatuvu mpanjili ala kita mamala majadi manoa ri panggita nu Alatala.

Roma 8:34

Isema mabia mompakasala kita? Ledo ntoto ria, sabana i Kristus namate mantolosi dosata. Bo ledo aga haitu, Ia nipakatuvu mpanjili bo nonturo ri panggana nu Alatala ri suruga, bo Iamo nanjaliku kita ri ngayo nu Alatala.

1 Korintus 1:7

Jadi, ledo ntoto nakura pompakule nidekei nu Nosa Gasa ka komiu sii-sii, komiu ranja nantongoraka peonga nTuputa i Yesus Kristus mpanjili ri dunia.

Galatia 3:13

Kita manusia masipato rahuku nu Alatala, sabana kita pura-pura nombaliunaka AturaNa. Tapi i Kristus nombakabasaka kita lako ri pehuku haitu, sabana tempo Ia namate ri kayu salib, Iamo nihuku manjambei kita. Nisanita i Kristus nihuku nu Alatala sabana naria tesa riara Buku Gasa nanguli ivei: “Isema-sema namate niloe ri kayu, haitu tandana ia nihuku nu Alatala.”

Filipi 3:20

Tapi ledo ivesia pokaingguta, sabana kita todea nu suruga. Bo lako ri suruga muni makava Tuputa i Yesus Kristus, Topepakasalama anu nipopeata ante lentora nu rarata.

Kolose 1:18

Kita anu nomparasaya i Kristus namala rarapaka karoNa, bo i Kristus balenggata. Balenggata nompakasiayu karota, ivesia muni Ia nompakasiayu todea topomparasaya Ia. Bo Iamo nombadekei katuvu nabaru ka kita. Iamo Lumbua; batuana, Iamo anu paratama natuvu mpanjili lako ri kamatena. Sabana haitu pura-pura, Iamo naogepa pade pura-pura anu naria.

1 Tesalonika 1:7

Jadi katuvumiu najadi jonjo nipasiala ntopomparasaya i Yesus pura-pura ri propinsi Makedonia bo propinsi Akhaya.

1 Tesalonika 2:16

Niuliku ivesia sabana toYahudi haitu nasaro nombalava kami. Kami madota mompatolele Kareba Belo ka tona ledo toYahudi ala rasanira ira mamala rapakasalama. Tapi toYahudi pangane nombalava kami bo ivesiamo aga nantambai dosara sampe nadea gagamo. Bo sii-sii ira mambela pehuku nu Alatala.

1 Tesalonika 2:7

Tapi ledo ivesia patuju kami. Tempo kami naria ri situ nte komiu bara ipia, pokainggu kami nalusu, nasimbayu nte mombine nombajagai ngana kodina.

1 Tesalonika 5:9

Kita nipelisi nu Alatala, ledo ala rahukuNa, tapi ala rapakasalamaNa sabana petolo nTuputa Yesus Kristus.

2 Timotius 4:1

Timotius, petevai hitu niuliku nte mpuu-mpuu raraku. Makava tempona i Yesus Kristus makava mpanjili momparenta ri dunia hitu, bo ratangaraNa pura-pura manusia, tona da natuvu bo tona namatemo. Jadi, kuuli ka iko ri ngayo nu Alatala bo i Yesus Kristus anu nanggita pura-pura poviata:

Titus 2:13

Apa ane kita da nonturo ri dunia, kita nanjarumaka kakava i Yesus anu mpuu-mpuu mompakasana rarata. Tempo haitu, pura-pura tona manggita kaoge i Yesus Kristus, Iamo Alatala toNeliu KaogeNa bo Topompakasalama kita.

Ibrani 10:27

Ane ivesia pokaingguta, damo aga maviora rarata mompopea pehuku bo apu narega mpuu anu mompalabu tona nangeva Alatala.

Ibrani 9:28

Jadi ivesia muni i Kristus namate aga sanggani majadi pesomba pompakalali dosa ntodea. Naupu haitu Ia makava sangganipa, ledo mompakalali dosa, tapi mompakasalama tona nalentora nompopea kakavaNa.

1 Petrus 1:21

Iamo sampe komiu nomparasaya Alatala. Alatala nompakatuvu mpanjili Ia lako ri kamateNa bo nombadekei kuasa bo kaoge nipokumaaka ka Ia. Jadi haitumo sampe komiu nomparasaya bo nanjarumaka Alatala.

1 Petrus 1:3

Masipato kita mombatoiya Alatala, Tuama nTuputa Yesus Kristus! Nambaso mpuu asi mataNa ka kita, sampe nidekeiNa katuvu nabaru ka kita. Bo katuvu nabaru haitu nitarimata sabana i Yesus Kristus nipakatuvu mpanjili lako ri kamateNa. Haitumo sabana panjarumakata naroso.

1 Petrus 2:21

Alatala nompokio komiu mosabara riara kasusa, nau komiu ledo nasala. Apa i Kristus nombarasai kasusa ala manggeni belo ka komiu, bo nidekeiNa jonjo ka komiu ala komiu mompasiala pokaingguNa.

1 Petrus 3:18

Apa i Kristus muni nombarasai kasusa nau ledo novia anu nadaa. Ia aga sanggani namate nombasompo dosa manusia nagana sampe ri kasae-saena. Ia ledo nasala, tapi Ia namate nanjambei kita anu nasala, ala mompoposinggabelo kita ante Alatala. Ia nipatesi tapi nipakatuvu mpanjili ante kuasa Nosa Gasa nu Alatala.

2 Petrus 3:12

Apa kita hii nantongoraka Eo Potangara nipakatantu nu Alatala. Jadi kita kana mompasimbuku matuvu magasa ala Eo haitu masalisa makava. Ri Eo haitu langi maropu rakande nu apu bo pura-pura anu naria ri langi magonu ante kapanena.

2 Petrus 3:14

Sampesuvu-sampesuvu nipotoveku, komiu nompopea kajadia-kajadia haitu, jadi pasimbukumo ala pokainggumiu mabelo bo ledo maria anu rasalai atau mepakaeya ri panggita nu Alatala. Bo pasimbukumo matuvu mosinggabelo ante Ia.

Pompakita 1:18

Yakumo hii anu Natuvu. Bara ipia Yaku namatemo. Tapi peintamo, sii-sii Yaku natuvu mpanjili sampe ri kasae-saena. Yakumo nakuasa nantipale gunji kamatea bo ponturo ntomate.

Pompakita 1:7

Peintamo! Ia makava nibungu kulimu. Ia rakita ntona pura-pura, nau ira anu nombatosu usuNa. Bo pura-pura valaa manusia ri dunia motumangi mpojea manggita Ia. Haitu mpuu-mpuu majadi! Amin!