1 Petrus 4:7 - Kaili Ledo

⁷ Naparamo kaupu nu dunia. Jadi komiu kana mainga bo mompakanoto raramiu ala komiu mamala mosambaya.

1 Petrus 4:7 ပူးပေါင်းရင်းမြစ်များ

Matius 24:42

Haitu sampe Kuuli, komiu kana mainga, apa ledo nisanimiu maipia makava Tupumiu.”

Matius 25:13

I Yesus nompakaupu porapaNa ivei: “Haitu sampe komiu kana mainga-inga, apa ledo nisanimiu eona atau jaana Yaku makava.”

Lukas 21:34

“Pakabelo! Komiu kana mainga, apa Yaku, Ana nu Manusia, sampesanika makavamo. Nee sampe Kukava komiu aga mosusa bo manginu sampe malangu, atau masesa rara mompekirika katuvumiu eo-eo sampe komiu ledo masadia. Apa Yaku makava nte pura-pura manusia ri umba-umba ri dunia bo kakavaKu masimbayu mpo tolia.

Lukas 21:36

Komiu kana mainga-inga bo masaro mekakai nte Alatala ala rapakulemiu mombatidamaka pura-pura anu majadi haitu bo ledo maeya matamiu mantingayo Yaku, Ana nu Manusia.”

Lukas 22:46

NiuliNa ka ira, “Pembangumo! Nakuya komiu aga namonjo? Pembangumo bo posambayamo ala komiu ledo mambela pesori.”

Roma 12:12

Kana madamba raramiu sabana komiu nanjarumaka anu rapovia nTupu ka komiu. Kana mosabara tempo masusa. Nee masau raramiu mosambaya.

1 Korintus 15:24

Maliu haitu pade makava kaupu nu dunia. Tempo haitu i Kristus mombadagi pura-pura tupu ntanina bo anu nakuasa, bo Ia moparenta mpo Magau. Maliu haitu, radekeiNa PoparentaNa ka TuamaNa Alatala.

1 Korintus 7:29

Sampesuvu-sampesuvuku, patujuku ivei: kita topomparasaya kana mantora tempota domo masae. Jadi nompamula sii-sii tona nobereimo nee aga mompekirika bereina.

Efesus 6:18

Komiu kana masaro mosambaya bo merapi tulungi nte Alatala. Nuapa-nuapa rapoviamiu, posambayamo, nangoseaka pekeniaka Nosa Gasa nu Alatala. Komiu kana mainga bo nee maupu raramiu mosambaya. Nggani-nggani mosambaya, sambayani pura-pura todea nu Alatala.

Filipi 4:5

Kusarumaka pura-pura tona manggita kabelo raramiu. Toramo! Domo masae makava i Pue Yesus.

Kolose 4:2

Nee masau raramiu mosambaya. Pekiri pakabelo anu raulimiu ka Tupu, bo masaro manguli tarima kasi nte Ia.

2 Timotius 4:5

Haitumo sampe niuliku ka iko, Timotius, iko kana mombakuasai karomu mboto nau bara nuapa majadi. Tidamakamo tempo nasusa. Pasimbukumo mompatolele Kareba Belo, bo povia puramo pokarajaa niparasaya nu Alatala ka iko.

Titus 2:12

Lako ri kabelo raraNa, kita nipatudukiNa mombakabasaka pokaingguta ledo nipokonoNa bo dota nu rarata nadaa. Bo kita nipatudukiNa majadi manoto, manoa, bo matuvu mangoseaka dotaNa ri dunia sii-sii.

Ibrani 10:25

Nee menonto masiromu metupu mosanggani-nggani, mpo kabiasa ntona sanu. Tapi kita kana mosipakaroso rara, nelabipa sii-sii sabana nisanita naparamo kakava i Yesus.

Ibrani 9:26

Apa ane rapana mpenggani-nggani Ia mesua, batuana mpenggani-nggani muni Ia kana mombarasai kasusa bo kapari nompamula lako ri lamba pamulana. Tapi kakanana, ri tempo sii-sii anu napara kaupu dunia Ia nakava aga sanggani nompakalali dosata ante nombadekei karoNa mboto nipatesi.

1 Petrus 1:13

Sampesuvu-sampesuvu, naria mamimo panjarumakata naroso. Sabana haitu, komiu kana mompakanoto raramiu bo mainga, bo maroo manjarumaka belo radekei ka komiu tempo i Yesus Kristus makava mpanjili.

1 Petrus 3:7

Ivesia muni komiu totua-totua langgai. Komiu kana matuvu mosanggani-nggani ante bereimiu ante pokainggu nanoto. Toramo, mombine ledo nasimbayu karosona ante langgai. Bilamo ira sabana ira muni nidekeika nu Alatala katuvua nabelo sampe ri kasae-saena nasimbayu mpo komiu langgai. Bilamo ira ala ledo maria nuapa-nuapa mombalava posambayamiu.

1 Petrus 5:8

Komiu kana mainga bo manoto rara, sabana balimiu, Magau nu Seta hau tumai nasimbayu mpo singa nongao-ngao nompengavu tona rasakana.

Pompakita 16:15

Bo nangulimo i Yesus, “Pariaramo! Yaku makava ri tempo ledo nisani-sanimiu nasimbayu mpo topangangga. Mabelo mpuu tona batena mainga bo mombajagai pakeana ala tempo Yaku makava ledo maeya matana mpo tona novuloa nelaya ri ngayo ntodea.”