1 Petrus 4:13 - Kaili Ledo

¹³ Kakanana komiu kana madamba, sabana komiu nombarasai kasusa bo kapari nasimbayu mpo anu nirasai i Kristus mboto. Apa ane komiu nombarasi susa bo pari mpo nirasai i Kristus, mambaso mpuu kadamba nu raramiu tempo Ia makava mpanjili. Tempo haitu, kaoge i Kristus anu nipokumaaka rapopakita ka pura-pura manusia.

1 Petrus 4:13 ပူးပေါင်းရင်းမြစ်များ

Matius 16:27

Jadi, oseakamo Yaku nau sampe mamate. Apa domo masae Yaku, Ana nu Manusia makava lako ri suruga ante kuasa bo reme lako nte TuamaKu, mosanggani-nggani ante malaeka-malaekaNa. Bo tempo haitu Kubalasi pura-pura tona nangoseaka pokaingguna.

Matius 25:21

Nanguli madika, ‘Nabelomo! Komiu batua nabelo, natutu nantui bago anu niparasayaka komiu. Komiu namala niparasaya ante mbara-mbara sakide. Sabana haitu, mbara-mbara nadea kuparasayaka komiu. Kamaimo madamba mosanggani ante yaku.’

Matius 25:23

Nanguli madika, ‘Nabelomo! Komiu batua nabelo, bo natutu nantui bago niparasayaka komiu. Komiu namala niparasaya ante mbara-mbara sakide. Sabana haitu, madea kuparasayaka komiu. Kamaimo madamba mosanggani ante yaku.’

Matius 25:31

“Tempo Yaku, Ana nu Manusia makava mpanjili ri dunia ante reme bo kuasaKu, nosanggani-nggani ante malaeka-malaekaKu, Yaku monturo ri Gadera PoparentaKu mombatangara mpo Magau.

Matius 25:34

Bo Kuuli ka ira ri sabingga ngganaKu ivei: ‘Kamaimo komiu nipobelo nTuamaKu. Pesuamo riara KamagauaKu, naria ponturo ri sii nipakasadia ka komiu lako ri lamba pamulana.

Matius 5:12

Ivesia muni nipoviara ka nabi-nabi nggaulu. Jadi kadamba-dambamo raramiu ane tutu majadi nte komiu sabana naoge mpuu belo nipakasadia ka komiu ri suruga.”

Markus 8:38

Isema-sema maeya matana manguli ia topangoseaka Yaku bo maeya matana nte pepatudukiKu ri tatanga ntodea anu nadosa bo ledo natutu nangoseaka Alatala, Yaku muni maeya mataKu manguli ia topangoseaka Yaku tempo Yaku makava mpanjili. Apa Yaku, Ana nu Manusia, makava mpanjili ri dunia hitu ante reme bo kuasa nTuamaKu, mosanggani-nggani ante malaeka-malaeka nagasa!>>

Lukas 17:30

Ivesia muni pokainggu ntona bara maipia tempo Yaku, Ana nu Manusia makava.

Suro-Suro 16:25

Nitasere natanga bongina, i Paulus bo i Silas nosambaya bo nodade nantoiya Alatala. Tona ntanina nitarunggu ri sia nompetalingai ira nodade.

Suro-Suro 5:41

Suro-suro nompalaisi Polibu haitu bo nadamba mpuu rarara sabana ira nireke nu Alatala masipato mombarasai kasusa bo kapari sabana pangoseakara i Yesus.

Roma 5:3

Bo ledo aga haitu, kita nadamba sabana nirasaita kasesa bo kapari, apa nisanita lako ri kasesa bo kapari haitu rarata majadi maroso.

Roma 8:17

Bo ane kita mpuu-mpuu ana-ana nu Alatala, natantumo kita mantarima belo nipakasadia nu Alatala ka ana-anaNa. Kita muni mantarima pura-pura anu nipakasadia nu Alatala ka i Kristus, sabana ane kita nombarasai kasusa bo kapari mpo anu nirasaiNa, kita muni rapakaoge nasimbayu mpo Ia.

Roma 8:18

Niparasayaku kasusa bo kapari nirasaita sii-sii damo njongona ane rapoposisala ante kabelo rarasaita bara maipia.

2 Korintus 1:5

Nadea kasusa bo kapari nirasai i Kristus, nambela munimo nte kami. Bo ivesia muni Alatala mpuu-mpuu nompakaroso rara kami sabana kami nosangu rara nte i Kristus.

2 Korintus 1:7

Haitu sampe ledo nonggai rara kami nompekirika komiu, nisani kamimo komiu mpuu-mpuu nombatidamaka riara kasusa bo kapari. Apa nisani kami ane komiu nombarasai kasusa bo kapari nasimbayu mpo kami, tantu raramiu muni rapakaroso nu Alatala, nasimbayu mpo kami.

2 Korintus 4:10

Kami nasaro nombarasai kasusa bo kapari nasimbayu mpo anu nirasai i Yesus tempo Ia nipatesi. Haitu najadi ala malanto i Yesus natuvu mpanjili, apa kuasaNa nikita riara nggatuvu kami.

2 Korintus 4:17

Kasusa nirasai kami ri dunia hitu nangaa bo aga sampalai. Bo kami mantarima belo sampe ri kasae-saena sabana nitidamaka kami riara kasusa haitu. Kasusa nirasai kami sii-sii aga sakide kodi ane rapoposisala ante belo ratarimata bara maipia.

Filipi 3:10

Naoge mpuu raraku mosisani ante i Kristus bo mombarasai kuasa anu nompakatuvu mpanjili Ia lako ri kamateNa. Bo yaku madota muni mombarasai susa bo pari nasimbayu mpo susa bo pari nirasaiNa, sampe bara yaku muni mamate masimbayu mpo Ia

Kolose 1:24

Sampesuvu-sampesuvu, sii-sii nadamba raraku nombarasai susa bo pari nikavaku sabana yaku nokarajaa nantulungi komiu. Apa yaku nombadupai ri karoku susa bo pari nipakatantu i Kristus kana kurasai. Bo susa bo pari nirasaiku nanggeni belo ka todea topomparasaya. Pura-pura kita topomparasaya nirapaka karo i Kristus.

2 Timotius 2:12

Ane kita nombatidamaka riara kasusata, Kita momparenta mosanggani-nggani ante Ia bara maipia. Ane kita mombasapu Ia Ia muni mombasapu kita.

1 Petrus 1:13

Sampesuvu-sampesuvu, naria mamimo panjarumakata naroso. Sabana haitu, komiu kana mompakanoto raramiu bo mainga, bo maroo manjarumaka belo radekei ka komiu tempo i Yesus Kristus makava mpanjili.

1 Petrus 2:21

Alatala nompokio komiu mosabara riara kasusa, nau komiu ledo nasala. Apa i Kristus nombarasai kasusa ala manggeni belo ka komiu, bo nidekeiNa jonjo ka komiu ala komiu mompasiala pokaingguNa.

1 Petrus 5:1

Naria muni anu kuuli ka komiu pakeni ntodea topomparasaya! Yaku nabia notulisi ka komiu sabana yaku muni pakeni ntopomparasaya, bo yaku mboto nanggita kasusa bo kapari nirasai i Kristus bara ipia. Bo ane i Kristus makava mpanjili bo mompopakita kuasaNa bo kaogeNa ka pura-pura manusia, yaku muni manggava bagia ri kuasaNa bo kaogeNa haitu. Jadi yaku mpuu-mpuu nerapi nte komiu

1 Petrus 5:10

Komiu kana mombarasai susa, tapi ledo masae. Maliu haitu Alatala mboto mompakagana nuapa-nuapa nakura nte komiu. Ia mompakaroo raramiu sampe ledo maria tona ntanina mamala mompopolengga atau mompopoura pomparasayamiu. Alatala mpuu-mpuu mompakaroso komiu apa nabelo mpuu raraNa bo Iamo nompokio komiu manggava bagia ri kuasaNa bo kaogeNa sampe ri kasae-saena sabana komiu nosangu rara ante i Kristus.

Yudas 1:24

Ratoiyatamo Alatala sabana Ia nakuasa nombajagai kita ala ledo rakabasakata pomparasayata. Ia nakuasa manggeni kita hau ri suruga mantingayo Ia riara kaogeNa, bo ledo maria salata, bo melabi kadamba rarata.

Pompakita 1:7

Peintamo! Ia makava nibungu kulimu. Ia rakita ntona pura-pura, nau ira anu nombatosu usuNa. Bo pura-pura valaa manusia ri dunia motumangi mpojea manggita Ia. Haitu mpuu-mpuu majadi! Amin!

Pompakita 1:9

Yaku hii i Yohanes, sampesuvumiu sampomparasaya. Yaku nombarasai susa bo pari nasimbayu ante pura-pura topangoseaka i Yesus, bo yaku muni najadi todea riara PoparentaNa nasimbayu ante pura-pura topangoseaka i Yesus, bo yaku muni nosabara tempo nipandasa, nasimbayu ante pura-pura topangoseaka i Yesus. Yaku nitaniaka ri levuto Patmos, sabana nompatolele Tesa nu Alatala bo pepatuduki i Yesus.