1 Petrus 4:11 - Kaili Ledo

¹¹ Jonjona, isema-sema nidekeika pompakule mompasimbayu Tesa nu Alatala kana motesa mpo tona niposumba nu Alatala mboto. Isema-sema nidekeika pompakule mantulungi tona ntanina, kana mantulungi ante karoso nidekei nu Alatala ka ia. Pakemo pompakule-pompakule haitu ala nau damo nuapa majadi, Alatala ratoiya bo rabila sabana anu nipovia i Yesus Kristus ri katuvumiu. Alatalamo nakuasa bo masipato ratoiya bo rabila sampe ri kasae-saena. Amin!

1 Petrus 4:11 ပူးပေါင်းရင်းမြစ်များ

Matius 6:13

Nee rapalamba kami rapesori bo kabasakamo kami lako ri kuasa Magau nu Seta. [Sabana Komiumo Magau nakuasa bo nipokumaaka sampe ri kasae-saena. Amin.]

Yohanes 13:31

Nalaipa i Yudas, nangulimo i Yesus ka anaguruNa, “Sii-sii rakita ntonamo kaogeKu, Ana nu Manusia. Bo lako ri anu majadi ri karoKu ngena, rakita ntonamo kaoge nu Alatala.

Suro-Suro 7:38

I Musa muni naria nosanggani-nggani nte todea toIsrael ri karava bai, bo i Musamo mai najadi topetariolo ntotuata ante malaeka anu notesa ka ia ri Bulu Sinai. I Musamo mai nantarima tesa natuvu lako nte Alatala bo nipapolana ka kita.

Roma 11:36

Apa pura-pura anu naria, nopuna lako nte Alatala bo natuvu lako ri kuasaNa bo Iamo Tupuna. Iamo masipato ratoiyata bo rabilata sampe ri kasae-saena! Amin!

Roma 12:3

Lako ri kabelo rara nu Alatala, yaku nianggatakaNa majadi suroNa. Jadi sia sampe kuuli ka komiu pura-pura, Nee rapekirita karota mboto naoge ane ledo ivesia kakanana. Kita kana manoa bo manoto mompekirika karota mboto, nangoseaka suka pomparasaya nibagi nu Alatala ka kita saito-saito.

Roma 16:27

Iamo Alatala anu nangisani pura-pura! Ledo ria simbayuNa! Ia masipato ratoiyata sampe ri kasae-saena ante petulungi i Yesus Kristus. Amin.

Roma 3:2

Tantu nadea pelabina, naria mami gunana. Pamula-mulana, Alatala nombadekei tesaNa ka toYahudi nggaulu.

1 Korintus 10:31

Jadi sampesuvu-sampesuvu, nuapa-nuapa rapoviamiu, nau mangande nau manginu, nau povia ntanina, povia puramo ala Alatala rabila bo ratoiya.

1 Korintus 12:4

Naria mpengaya-ngaya pompakule lako nte Nosa Gasa, tapi pura-pura pompakule haitu nopuna lako ri sangu Nosa Gasa.

1 Korintus 3:10

Yaku hii mpo topande novia banua. Lako ri kabelo rara nu Alatala, nianggatakaNa bo nipopompakuleNa yaku novia pandasi banua, bo tona ntanina nombabangu banua ri bavo nu pandasi haitu. Tapi simbo rabanguna pakabelo-belo.

1 Korintus 6:20

Komiu nitolosi nu Alatala bo nibayariNa pakaupumo. Haitumo sabana komiu masipato matuvu ante pokainggu nabelo ala Alatala rabila.

2 Korintus 2:17

Nadea tona nompatolele Tesa nu Alatala ala mangelo untu ka karora mboto. Tapi ledo ivesia kami. Patuju kami nagasa bo tesa kami nakana, apa kami nisuro nu Alatala mompatolele TesaNa. Jadi kami notesa ante kuasa i Kristus bo Alatala nanggita povia kami haitu.

2 Korintus 9:13

Apa ane rakitara pedekei petulungimiu haitu, ira mantoiya bo mombabila Alatala, sabana rakitara komiu mpuu-mpuu nomparasaya Kareba Belo i Kristus bo natundu nte parentaNa. Bo ratoiyara Alatala sabana komiu ledo mpuu natove raramiu nobagi ka ira bo ka tona ntanina anu naria nte komiu.

Efesus 1:19

Yaku nerapi ala rasanimiu kaoge nu kuasaNa anu nipokumaaka, anu nombatulungi kita topomparasaya Ia.

Efesus 4:29

Sampesuvu-sampesuvu, ane komiu motesa, nee rasovadakamiu tesa nadaa tapi sovadakamo tesa-tesa masipato, anu mombatulungi bo mompakaroso rara ntona ntanina. Tesa-tesa ivehaitu manggeni belo ka topangepena.

Efesus 5:20

Komiu kana masaro motarima kasi nte Tuamata Alatala ka pura-pura anu najadi. Ulimo tarima kasi ka Ia sabana komiu nosangu rara nte Tuputa Yesus Kristus.

Efesus 6:10

Kaupuna, komiu kana maroso ante kuasa nitarimamiu lako ri kuasa nTupu anu nabaraka, apa komiu nosangu rara ante Ia.

Filipi 1:11

Bo pokainggumiu mpuu-mpuu majadi mabelo bo manoa sabana pokarajaa i Yesus Kristus riara nggatuvumiu, sampe madea mpuu tona mombabila bo mompakaoge Alatala.

Filipi 2:11

bo pura-pura ira mompangaku i Yesus Kristusmo Tupura. Ivesiamo, ira mombabila bo mombatoiya Tuamata Alatala.

Kolose 4:6

Ane komiu motesa nte ira, tesa-tesamiu kana malusu bo marasa raepe. Kana rasanimiu munimo cara masipato mesanaka pompekutanara.

1 Tesalonika 2:4

Kami ledo notesa aga mompakadamba rara manusia. Kami notesa mompakadamba rara nu Alatala, sabana Iamo nomparesa rara ntai kami, bo Iamo nombareke kami masipato mompatolele Kareba Belo.

1 Timotius 1:17

Alatala masipato rabila bo ratoiyata sampe ri kasae-saena, apa Iamo Magau anu nomparenta sampe ri kasae-saena. Ia ledo mamate, ledo namala rakitata, aga Ia saito-itoNa Alatala nakana. Amin!

1 Timotius 6:16

Aga Ia saito-itoNa ledo mamate. Ia natuvu riara reme anu ledo namala rakaparai. Ledo ria saitoa manusia nanggita Ia, apa ledo nipakule nu manusia manggita Ia. Iamo masipato rabila bo Iamo masipato momparenta sampe ri kasae-saena. Amin!

Titus 2:1

Iko, Titus, kana mompatuduki anu nosinggambela ante pepatuduki nakana ka tona.

Titus 2:15

Jadi, Titus, patudukikamo pura-pura haitu ka topomparasaya i Kristus. Ulika ira mangoseaka pepatuduki haitu, bo ane ledo raoseakara, onteakamo ira. Nee maeya matamu, apa naria mami kuasamu mompatuduki ira. Nee rapalamba tona mompandaente iko.

Ibrani 13:7

Pekirikamo katuvu pakeni-pakeni anu nanggeni Tesa nu Alatala ka komiu bara ipia. Pariarantaimo jonjo katuvura bo kamatera, bo pasialamo pomparasayara.

Ibrani 5:12

Kakanana temponamo komiu majadi guru mompatuduki tona ntanina, sabana nasaemo komiu nomparasaya i Yesus. Tapi komiu da noparaluu guru mompatuduki ka komiu pepatuduki pamulana lako ri Tesa nu Alatala, komiu dopa nasadia nantarima pepatuduki kapolana. Komiu nasimbayu mpo ngana kodi da netomi, anu dopa nasadia mangande kandea nakaa!

Yakobus 1:19

Sampesuvu-sampesuvu nipotoveku, pariaramo pakabelo-belo tesaku hitu. Kita kana masadia mangepe, tapi nee kaliu-liu motesa, bo nee masalisa marau.

Yakobus 1:26

Isema-sema nanguli iamo tona naroso poagamana, bo ledo nijagaina tesana, ia nombabagiu karona mboto. Agamana ledo naria gunana.

1 Petrus 2:12

Komiu kana matuvu ante pokainggu nabelo mpuu ri tatanga ntona ledo nosisani nte Alatala. Ane mabelo pokainggumiu, nau rasalaira komiu bo raulira komiu novia anu nadaa, tapi kaupuna kana rapangakura nabelo pokainggumiu, bo ratoiyara Alatala tempo Ia makava.

1 Petrus 2:5

Komiu muni nasimbayu mpo vatu-vatu natuvu, jadi dekei Alatala mompake komiu majadi banua petupu ka Ia. Bo riara banua petupu haitu komiu majadi mpo topanggeni pesomba, anu natuvu nipatani ka Alatala. Bo komiu namala metupu nte Ia ante pekeniaka Nosa Gasa. Petupumiu haitu najadi pesomba anu rapokonoa rara nu Alatala sabana anu nipovia i Yesus Kristus.

1 Petrus 4:10

Kita simbo nidekeika pompakule ledo nasimbayu lako nte Alatala, bo kita kana mompake pakabelo pompakule nipatava ka kita mombatulungi tona ntanina.

1 Petrus 4:16

Tapi ane komiu mombarasai kasusa sabana komiu topomparasaya, nee maeya matamiu. Ulimo tarima kasi ka Alatala, apa komiu mpuu-mpuu topangoseaka i Kristus.

1 Petrus 5:11

Iamo nakuasa sampe ri kasae-saena. Amin!

Yudas 1:25

Aga Ia saito-itoNa Alatala. Iamo nompakasalama kita sabana anu nipovia nTuputa Yesus Kristus. Jadi ratoiyatamo Ia, apa Iamo Alatala anu nelabi kaogeNa, Magau nipokumaaka. Iamo nabaraka bo nakuasa lako ri lamba pamulana, sampe sii-sii, bo sampe ri kasae-saena! Amin! Tabe lako nte yaku, Yudas