1 Petrus 4:10 - Kaili Ledo

¹⁰ Kita simbo nidekeika pompakule ledo nasimbayu lako nte Alatala, bo kita kana mompake pakabelo pompakule nipatava ka kita mombatulungi tona ntanina.

1 Petrus 4:10 ပူးပေါင်းရင်းမြစ်များ

Matius 20:28

masimbayu eva Yaku, Ana nu Manusia. Yaku ledo nakava ri dunia hitu ala ratande ntona, tapi ala mombatulungi tona, bo mombadekei karoKu rapatesi mantolo dosa ntona dea.”

Matius 24:14

Bo Kareba Belo nu Poparenta nu Alatala kana rapatolele ri njumangu dunia ala pura-pura manusia mamala mangepena. Maupu haitu, pade makava kaupu nu dunia.”

Matius 24:21

NiuliKu ivesia sabana ri eo haitu madaa mpuu pepandasa rapambela ka manusia. Dopa sanggani najadi pepandasa eva haitu, nompamula lako ri lamba pamulana sampe sii-sii, bo domo majadi hanupa ri tempo makava.

Matius 24:45

“Rapana naria batua anu nanoto bo natutu neoseaka, iamo raanggataka nu madikana majadi topompasiayu pura-pura batua ntanina riara nu banua. Iamo mompasiayu kandea ka batua-batua ntanina eo-eo.

Matius 25:17

Ivesia muni tona anu niparasayaka ronjobu mpeka doi bulava hau nipagolina doina haitu sampe nikavana anana ronjobu mpeka muni.

Matius 25:44

Bo ira manguli ka Yaku, ‘Pue, ipia nikita kami naara taiMiu, atau nabai tamboloMiu, atau Komiu tosangatana atau ledo nopakea, atau nadua, atau nitarunggu bo kami ledo nantulungi Komiu?’

Markus 10:45

Sabana nau Yaku, Ana nu Manusia, ledo nakava ratande ntona tapi ala mantulungi tona bo mombadekei karoKu rapatesi mantolo dosa ntodea.>>

Lukas 12:42

Nesanamo i Yesus, “Haitu niuliKu ka batua nanoto bo natutu neoseaka. Tona haitu raanggataka nu madikana majadi topompasiayu pura-pura batua ntanina riara banua. Iamo mompasiayu kandea ka batua-batua ntanina eo-eo.

Lukas 19:13

Dopame ia hau, nipokiona ntani sapulu batuana bo nidekeikana simbo sampeka doi bulava ka ira. Pade niulikana, ‘Doi hitu rapagolimiu sampe manjili yaku.’

Lukas 8:3

Naria muni i Yohana, berei i Khuza tona nipomboli doi Magau Herodes. Bo naria muni i Susana bo da nadeapa mombine ntanina. Mombine gahaitu nompake doira mboto nantulungi i Yesus bo ana-anaguruNa.

Roma 15:25

Tapi yaku hau ri ngata Yerusalem ntani ruru. Apa topomparasaya i Yesus ri propinsi Makedonia bo Akhaya nompakatantu mompakatu doi petulungi ka topomparasaya napakasi ri ngata Yerusalem. Jadi, yaku manggeni petulungira haitu hau ri Yerusalem.

Roma 15:27

Niara haitu nipoviara lako ri dotara mboto, ledo nipasuu. Tapi kakanana, masipato muni ira mantulungi roara toYahudi sampomparasaya. Apa lako ri toYahudi sampe tesa nu Alatala nikeni ka tona ledo toYahudi. Jadi masipato mpuu tona ledo toYahudi mantulungi toYahudi ante mbara-mbara lako ri dunia hitu.

1 Korintus 15:10

Tapi lako ri pepotove nu Alatala, yaku najadi suro i Pue Yesus. Bo pepotoveNa haitu naria aselena riara nggatuvuku. Yaku nokarajaa nelabipa kantamona pade suro-suro i Yesus ntanina. Tapi kakanana ledo yaku anu nokarajaa ntamo ivesia. Alatala anu nompotove yaku, Iamo nokarajaa nosanggani-nggani ante yaku.

1 Korintus 3:10

Yaku hii mpo topande novia banua. Lako ri kabelo rara nu Alatala, nianggatakaNa bo nipopompakuleNa yaku novia pandasi banua, bo tona ntanina nombabangu banua ri bavo nu pandasi haitu. Tapi simbo rabanguna pakabelo-belo.

1 Korintus 4:7

Isema nanguli komiu nelabipa pade tona ntanina? Nuapa naria nte komiu anu ledo nidekei nTupu ka komiu? Jadi nakuya komiu nangoe-ngoe? Nisarumakamiu anu naria nte komiu asele mpoviamiu mboto?

2 Korintus 6:1

Jadi kami hii nokarajaa nosanggani-nggani ante Alatala nompatolele TesaNa ka manusia. Haitumo sabana kami merapi nte komiu ante mpuu-mpuu rara, nee sampe kabelo rara nu Alatala nte komiu haitu ledo maria aselena riara nggatuvumiu.

2 Korintus 9:1

Kakanana ledo paraluu ntoto kutulisi ka komiu doi petulungi ka topomparasaya napakasi ri Yudea.

Efesus 3:8

Yaku natueipa pade pura-pura todea nu Alatala ntanina. Tapi naupa ivesia, Alatala nabelo mpuu nte yaku bo nidekeiNa ka yaku pokarajaa mompatolele Kareba Belo ka komiu tona ledo toYahudi. Kareba haitu notesaki kabelo i Kristus anu naoge mpuu, ledo rapakuleta mombarekena.

Efesus 4:11

Iamo nompalele pedekei-pedekei ka kita. Sanu nidekeikaNa pompakule majadi suro, sanu nidekeikaNa pompakule majadi nabi anu mompasimbayu tesa nitarimana lako nte Alatala. Sanu muni nidekeikaNa pompakule majadi topompatolele Kareba Belo, bo ntanina nidekeikaNa pompakule manggeniaka bo mompatuduki todea topomparasaya.

2 Timotius 1:18

Nisanimu nadea mpuu petulungina ka yaku ri ngata Efesus. Kuperapi i Pue Yesus mompoasi i Onesiforus ri Eo Potangara ri kaupu nu dunia.

Titus 1:7

Pakeni ntopomparasaya haitu topompasiayu todea nu Alatala. Jadi ia ledo novia pokainggu rasalai ntona. Ia ledo tona nalanga pekirina bara nasalisa narau, ledo topanginu, ledo toposibaga, bo ledo muni tona nadoko doi.

Ibrani 6:10

Alatala ledo natenggo raraNa, Ia ledo malinga raraNa ante poviamiu bo pepotovemiu. Nipopakitamiu tovemiu ka Ia tempo komiu nombatulungi sampesuvumiu sampomparasaya, nompamula lako ri nggauluname sampe sii-sii.

1 Petrus 5:10

Komiu kana mombarasai susa, tapi ledo masae. Maliu haitu Alatala mboto mompakagana nuapa-nuapa nakura nte komiu. Ia mompakaroo raramiu sampe ledo maria tona ntanina mamala mompopolengga atau mompopoura pomparasayamiu. Alatala mpuu-mpuu mompakaroso komiu apa nabelo mpuu raraNa bo Iamo nompokio komiu manggava bagia ri kuasaNa bo kaogeNa sampe ri kasae-saena sabana komiu nosangu rara ante i Kristus.

1 Petrus 5:12

Yaku notulisi sura nambuku hitu ante petulungi i Silas, sampesuvuta sampomparasaya. Nisaniku ia namala raparasaya. Patujuku notulisi sura hitu ala mompakaroso raramiu bo mompakalanto ka komiu Alatala mpuu-mpuu nompotove bo nombatulungi kita evamo nitesaku pangane. Jadi komiu kana batena manjarumaka pepotoveNa haitu.