1 Petrus 2:23 - Kaili Ledo

²³ Tempo Ia nisalai ntona, ledo nibalasiNa. Tempo Ia nipandasa, Ia ledo nesava. Tapi Ia aga nanjarumaka Alatala, Topotangara nanoa anu manjaliku Ia.

1 Petrus 2:23 ပူးပေါင်းရင်းမြစ်များ

Lukas 23:41

Bo kita randua hii masipato rahuku nasinjuru ante pokaingguta nadaa. Tapi tona hitu ledo ntoto nasala!”

Lukas 23:46

Naupu haitu i Yesus nongare ante suara namangga, “Tata, siimo nyawaKu!” Naupu nanguli ivesia, naponjimo nosaNa.

Lukas 23:9

Haitumo sampe nadea pompekutanana nte i Yesus, tapi i Yesus ledo nesana.

Suro-Suro 17:31

Apa nipakatantuNamo tempona bara maipia pura-pura manusia ri dunia ratangara ri kanoana. Pokarajaa motangara haitu nidekeiNa ka saito tona nipelisiNa lako ri nggauluname. Alatala nompakatuvu mpanjili tona haitu lako ri kamateNa ala malanto ka pura-pura tona Ia mpuu-mpuu nipelisi nu Alatala majadi Topotangara pura-pura manusia.”

Suro-Suro 4:29

Pue, epemo tesara nomparangga kami. Kami batuaMiu, bo kami merapi tulungi nte Komiu ala kami ledo maeka mompatolele tesaMiu.

Suro-Suro 7:59

Tempo i Stefanus da nirempera, nekakaimo ia, “Pue Yesus, siimo nyawaku!”

Suro-Suro 9:1

Ri tempo haitu, i Saulus da nompararai njuu mompatesi topangoseaka i Pue Yesus. Ia hau ri ngayo nu Pakeni nTopanggeni Pesomba,

Roma 2:5

Tapi nau nisanimiu tona nokainggu nadaa kana rahuku, da nakaa bagamiu, bo komiu ledo nadota najea. Sabana haitu, komiu mbotomo nantambai kantamo nu pehuku rapambela ka komiu ri Eo Potangara. Ri Eo Potangara Alatala mombatangara pura-pura manusia ante nanoa bo Ia mombahuku pura-pura tona novia nadaa.

Efesus 6:9

Bo komiu anu najadi tua atau madika, komiu muni kana mokainggu mabelo nte batuamiu. Nee momparangga ira, sabana nisanimiu mboto Tupumiu bo Tupura aga saito. Iamo naria ri suruga bo Ia ledo nompelenje.

2 Tesalonika 1:5

Jadi, lako ri karoo nu pomparasayamiu haitu, nisanita Alatala mpuu-mpuu nanoa nombatangara manusia. Komiu nombatidamaka riara kasusa bo kapari anu nambela komiu sabana pangoseakamiu Alatala, bo ivesiamo Alatala nompopakita komiu mpuu-mpuu masipato majadi todea ri PoparentaNa.

2 Timotius 1:12

Bo yaku nombarasai pura-pura kasusa riara ntarunggu hitu sabana pokarajaaku nompatolele Kareba Belo. Tapi naupa ivesia, ledo naeya mataku, sabana niposisanikumo i Yesus anu nisarumakaku, bo nisanikumo Ia nompakule nombajagai yaku sampe ri Eo Potangara ri kaupu nu dunia.

2 Timotius 4:8

Jadi hitupa nasadiamo hadia padagi ka yaku sabana katuvuku nompakadamba rara nu Alatala. I Pue Yesus Topotangara nanoa, bo ri Eo Potangara ngena radekeiNa hadia haitu ka yaku, bo ledo aga ka yaku tapi ka pura-pura tona nompotove Ia bo nompopea kakavaNa.

Ibrani 12:3

Pekirikamo kasusa nirasai i Yesus. Ia nieva ntona nadosa anu mpuu-mpuu navuu matara nte Ia. Pekirikamo Ia ala ledo masau raramiu bo ledo maupu raramiu momparasaya.

1 Petrus 3:9

Ane maria tona movia anu nadaa nte komiu, nee rabalasi ira ante anu nadaa. Ane rasalai ntona komiu, nee rapesava. Agina komiu merapi Alatala mombadekei belo ka ira. Apa komiu nipokio nu Alatala manggeni belo ka tona ntanina, ala komiu manggava belo lako nte Ia.

1 Petrus 4:19

Jadi sampesuvu-sampesuvu, ane dota nu Alatala komiu kana mombarasai kasusa bo kapari, nee menonto movia nabelo. Sarumakamo Alatala manjaliku komiu. Apa Iamo nompajadi komiu, bo Ia namala raparasaya mompakadupa pojanjiNa ka komiu.

Pompakita 19:11

Naupu haitu nikitaku suruga natebuka. Riara suruga nikitaku sangu jara bula. Topesavi jara haitu nosanga “Tona Natutu bo Nanoa.” Ia Topotangara bo Topeeva nanoa.