1 Petrus 2:15 - Kaili Ledo

¹⁵ Alatala nompokono komiu mokainggu nabelo ala tona nadoyo anu ledo nisanina nuapa-nuapa domo mabia manjalai komiu, apa malantomo pesalaira haitu ledo nakana.

1 Petrus 2:15 ပူးပေါင်းရင်းမြစ်များ

Matius 25:2

Alima ira nadoyo, bo alima nanoto.

Matius 7:26

Tapi isema-sema mangepe tesaKu bo ledo nioseakana, ia nadoyo nasimbayu eva tona novia banuana ri bavo bone.

Roma 1:21

Nisanira Alatala naria bo nisanira Ia masipato rabila, tapi ledo nibilara, bo ledo muni niulira tarima kasi nte Ia. Ira aga nompekirika anu ledo ria gunana. Pekirira nadoyo bo ledo nipahara anu nakana.

Galatia 3:1

Nadoyo mpuu komiu toGalatia! Isema nanjalipuyo komiu sampe komiu domo nadota nangoseaka pepatuduki nakana? Nipakalantoku mpuu nanguli ka komiu bara ipia patuju kamate i Yesus Kristus ri kayu salib.

1 Tesalonika 4:3

Dota nu Alatala ala komiu majadi todeaNa nagasa, bo nee mosampaturu ante tona ledo bereimu mboto.

1 Tesalonika 5:18

Bo uli tarima kasi ka Alatala nau damo nuapa majadi, sabana haitumo dota nu Alatala ka komiu anu nosangu rara ante i Yesus Kristus.

1 Timotius 1:13

Bara ipia yaku nanjalai i Yesus, yaku nompandasa bo nompakadaa topangoseaka Ia. Tapi naupa ivesia, nipoasiNa yaku, sabana tempo haitu dopa niparasayaku Ia, dopa nisaniku poviaku haitu nadaa.

Titus 2:8

Pakemo tesa-tesa nakana bo masipato, anu ledo mamala rasalai ntona. Ane mupatuduki ivesia, tona nangeva kita maeya matara, apa pura-pura anu niulimu nabelo. Ledo maria nuapa-nuapa nadaa anu namala rasalaira ka kita.

Titus 3:3

Toramo, kita muni bara ipia da nalanda rarata nasimbayu mpo tona ledo nomparasaya i Yesus. Ledo nisanita dala nakana mosisani nte Alatala bo ledo nioseakata parentaNa. Katuvuta bara ipia nikuasai dota nu rarata nadaa bo kasana nu dunia anu ledo nabelo. Kita natuvu narau rara nanggita roa, nasiriati, bo nosipovuu mata nte tona ntanina.

1 Petrus 2:12

Komiu kana matuvu ante pokainggu nabelo mpuu ri tatanga ntona ledo nosisani nte Alatala. Ane mabelo pokainggumiu, nau rasalaira komiu bo raulira komiu novia anu nadaa, tapi kaupuna kana rapangakura nabelo pokainggumiu, bo ratoiyara Alatala tempo Ia makava.

1 Petrus 3:16

Bo komiu kana matuvu ante rara ntai nagasa, mbelaka maria tona manjalai pokainggu nabelo nipoviamiu sabana pangoseakamiu i Kristus, ira kana maeya mboto.

1 Petrus 3:17

Aginapa kita mombarasai kasusa sabana pokaingguta nabelo, ane ivesia mami dota nu Alatala, pade mombarasai kasusa sabana pokaingguta nadaa.

1 Petrus 4:2

Jadi da natuvu riara dunia hitu, komiu kana matuvu mangoseaka dota nu Alatala, nee mangoseaka dota rara manusia anu nadaa.

2 Petrus 2:12

Tapi guru-guru mpodava haitu nanjalai nuapa-nuapa ledo nisanira. Ira nasimbayu nte binata nasoa, anu aga nipoanaka rasaka bo rapatesi. Ira ledo nompekiri, aga natuvu nangoseaka dota-dota anu naria nte ira. Jadi lako ri pokainggura nadaa haitu, guru-guru mpodava kana rapakaropu nasimbayu nte binata-binata nasoa.

Yudas 1:10

Tapi guru-guru mpodava haitu nanjalai mpengaya-ngaya anu ledo nisanira. Ira nasimbayu mpo binata-binata anu ledo namala nompekiri. Anu nirasaira, haitumo nioseakara ante ledo ria rekena. Bo pokainggura haitumo sampe ira rahuku nu Alatala.