1 Petrus 1:22 - Kaili Ledo

²² Sampesuvu-sampesuvu, katuvumiu nipakagasamiu sabana komiu nangoseaka pepatuduki nakana. Haitumo sampe komiu namala nompotove sampesuvumiu sampomparasaya ante rara naliangu. Sabana haitu, posipotovemo ante rara mpuu-mpuu.

1 Petrus 1:22 ပူးပေါင်းရင်းမြစ်များ

Yohanes 15:17

Jadi siimo parentaKu ka komiu: posimpotovemo.”

Yohanes 15:3

Komiu tu nagasamo sabana nipariaramiumo pepatuduki nitesaKu ka komiu.

Yohanes 17:17

Patudukimo ira ante TesaMiu nakana sampe ira majadi todeaMiu nagasa. TesaMiu haitumo pepatuduki nakana.

Yohanes 17:19

Tata, Kudekei katuvuKu ka Komiu bo novia dotaMiu, ala manggeni belo ka anaguruKu, haitumo ala ira mpuu-mpuu mangoseaka pepatuduki nakana bo majadi todeaMiu nagasa.”

Suro-Suro 15:9

Alatala ledo nompoposisala kita toYahudi ante ira ledo toYahudi. Ia nompakagasa rarara, sabana ira nomparasaya.

Suro-Suro 6:7

Ivesiamo kareba nu Alatala nipatolele njuu bo kadea ntopomparasaya i Yesus ri ngata Yerusalem nantambai mpuumo. Bo nadea muni topanggeni pesomba nangoseaka i Yesus.

Roma 1:5

Alatala nabelo raraNa nte yaku bo yaku nipajadiNa suroNa sabana i Yesus. Yaku niposuroNa mompatolele Kareba Belo ka tona ri umba-umba ri dunia bo manggeniaka ira momparasaya bo matundu nte i Yesus, ala Ia rabila bo rapakaoge

Roma 2:8

Tapi ane tona aga nompekirika karora mboto, bo ledo nadota nangoseaka dota nu Alatala, tapi aga nangoseaka dota nu rarara nadaa, tona gahaitumo rapokarau nu Alatala bo rapambela pehuku.

Roma 8:13

Sabana, ane kita matuvu mangoseaka dotata mboto nadaa, kita mamate bo rapopogaa lako nte Alatala. Tapi ane rakabasakata pokaingguta nadaa ante kuasa lako nte Nosa Gasa nu Alatala, kita matuvu mabelo sampe ri kasae-saena.

2 Korintus 6:6

Riara mpengaya haitu, nalantomo kami mpuu-mpuu batua nu Alatala, apa pokainggu kami nagasa, nisani kami Tesa nu Alatala, kami nosabara bo nabelo rara nte tona. Nosa Gasa nokarajaa riara nggatuvu kami bo kami nompotove tona ntanina ante rara mpuu-mpuu.

Galatia 3:1

Nadoyo mpuu komiu toGalatia! Isema nanjalipuyo komiu sampe komiu domo nadota nangoseaka pepatuduki nakana? Nipakalantoku mpuu nanguli ka komiu bara ipia patuju kamate i Yesus Kristus ri kayu salib.

Galatia 5:5

Tapi sampesuvu-sampesuvu, ante petulungi Nosa Gasa nu Alatala, kami nanjarumaka majadi manoa ri panggita nu Alatala sabana pomparasaya kami i Kristus. Bo haitumo anu nipopeata ante mpuu-mpuu rarata!

Galatia 5:7

Bara ipia nioseakamiu nabelo Kareba Belo. Jadi nakuya hitupa komiu domo nadota nangoseaka pepatuduki nakana? Isema nombalava komiu?

Efesus 4:3

Pasimbukumo ante mpuu-mpuu raramiu matuvu mosinggabelo. Nosa Gasa nu Alatala nompopakasangu kita pura-pura, jadi kita kana mombajagai kasintuvuta haitu.

Filipi 1:9

Jadi, iveimo pomperapiku nte Alatala, ala pepotovemiu mantambai, bo mantambai rasanimiu anu nakana, bo mantambai kanoto mpekirimiu.

1 Tesalonika 3:12

Kami nerapi ala i Pue mantambai tovemiu sampe komiu mpuu-mpuu mosimpotove bo mompotove pura-pura tona, nasimbayu mpo kami mpuu-mpuu nompotove komiu.

2 Tesalonika 1:3

Sampesuvu-sampesuvu, kami kana masaro motarima kasi nte Alatala sabana komiu. Kami masipato motarima kasi sabana pomparasayamiu nte i Yesus nantambai karosona, bo nantambai posimpotovemiu.

2 Tesalonika 2:13

Jadi, sampesuvu-sampesuvu nipotove i Pue, masipato kami masaro manguli tarima kasi ka Alatala sabana komiu. Sabana, Alatala nompelisi komiu lako ri ulu jadi ala komiu rapakasalamaNa. Komiu nipakasalama ante kuasa Nosa Gasa anu nombabaliki komiu majadi todea gasa nu Alatala, bo komiu nipakasalama sabana pomparasayamiu pepatuduki nakana.

1 Timotius 1:3

Kuperapi iko maboli ri ngata Efesus, mpo niuliku ka iko bara ipia tempo yaku nalai hau ri propinsi Makedonia. Apa ri situ naria bara sako-ndua tona nompatolele pepatuduki nasala, bo iko kana mombatagi ira ala domo rapatolelera pepatuduki haitu.

1 Timotius 1:5

Patuju parentaku hitu ala kita mosimpotove, ante tove neumba lako ri rara nagasa, pekiri rara ntai anu ledo nombasalai kita, bo pomparasayata i Kristus mpuu-mpuu nakana.

1 Timotius 4:12

Nee mupalamba tona mompandaente iko sabana iko da namuda. Tapi iko kana majadi jonjo ka topomparasaya riara tesamu, pokainggumu, pepotovemu ka roa, pomparasayamu nte i Pue, bo kagasa katuvumu.

1 Timotius 5:2

Popatoramo mombine natuakapa pade iko nasimbayu mpo tinamu mboto. Popatoramo mombine namuda nasimbayu mpo pompatudukimu ka tueimu mboto, bo pakabelo ala pokainggumu bo pekirimu masipato.

2 Timotius 1:14

Pepatuduki haitumo kakalumana niparasaya nu Alatala ka kita. Jadi ante petulungi Nosa Gasa anu naria riara ntaita, jagaimo pepatuduki haitu. Nee radekei rabaliki ntona.

Ibrani 11:8

Lako ri pomparasaya i Abraham, nioseakana parenta nu Alatala. Alatala nompokio ia bo nituduNa hau ri ngata nakavao. Alatala nojanji ngata haitu majadi bagia i Abraham. Jadi, nau dopa nisanina ri umba ngata rakalauna haitu, nipalaikanamo ngatana mboto nangoseaka parenta nu Alatala.

Ibrani 13:1

Komiu topomparasaya, jadi komiu kana bate-batena mosimpotove mpo tona nosampesuvu.

Ibrani 5:9

Naganapa pura-pura haitu nirasaiNa, Ia najadi puna katuvua nabelo sampe ri kasae-saena ka pura-pura tona matundu nte Ia.

Ibrani 6:10

Alatala ledo natenggo raraNa, Ia ledo malinga raraNa ante poviamiu bo pepotovemiu. Nipopakitamiu tovemiu ka Ia tempo komiu nombatulungi sampesuvumiu sampomparasaya, nompamula lako ri nggauluname sampe sii-sii.

Ibrani 9:14

nemopa raa i Kristus anu nelabipa kabisana! I Kristus nombadekei karoNa mboto ka Alatala najadi pesomba anu ledo ria kakurana. Haitu nipoviaNa ante petulungi Nosa Gasa, anu naria sampe ri kasae-saena. Raa i Kristus nompakagasa rara ntaita lako ri pokaingguta ledo ria gunana ala kita mamala metupu nte Alatala anu natuvu sampe ri kasae-saena.

Yakobus 1:21

Jadi, kabasaka puramo kabiasamiu naruto bo nadaa. Pakaede raramiu bo pariaramo tesa nu Alatala anu nitudaNa riara ntaimiu. Apa tesa haitu nakuasa mompakasalama komiu.

Yakobus 4:8

Pekitulungimo nte Alatala bo Alatala mpuu-mpuu mombatulungi komiu. Komiu topovia dosa, tumo movia dosa. Komiu toporompenga pekiri, pakasangumo pekirimiu mangoseaka Alatala.

1 Petrus 2:17

Bilamo pura-pura tona. Potovemo sampesuvumiu sampomparasaya. Pekoumo nte Alatala bo bilamo magau!

1 Petrus 3:1

Ivesia muni komiu totua-totua mombine kana mekou nte bereimiu langgai. Apa ane bereimiu ledo nomparasaya tesa nu Alatala, pekoumiu haitu mamala mompakeni ia momparasaya. Ledo paraluu raulimiu nuapa-nuapa ka ia,

1 Petrus 3:20

haitumo nyawa ntona anu ledo natundu nte Alatala tempo Nabi Nuh nggaulu. Tempo Nabi Nuh da novia kapala, naoge mpuu posabara nu Alatala mompopea ira majea lako ri dosa-dosara. Tapi tempo uve nanggabuntu nompakalodo isi dunia, aga uvalu tona nesavi kapala haitu. Bo kapala haitu noliu ri uve oge sampe ira uvalu nipakasalama.

1 Petrus 3:8

Jadi sampesuvu-sampesuvu, kupapolamo tesaku. Komiu pura-pura kana mosangu pekiri bo mosangu rara. Posimpotovemo mpo tona nosampesuvu. Komiu kana mosipoasi mata bo nee malanga rara.

1 Petrus 4:17

Nakavamo tempona Alatala mombatangara pura-pura manusia. Bo kita todeaNa mboto mokolu ratangaraNa. Ane kita todeaNa mokolu ratangaraNa natantu mantamo mpuumo pehukuNa ka tona ledo nadota nomparasaya Kareba Belo lako nte Ia!

1 Petrus 4:8

Tapi anu nelabi nopoko, komiu kana mpuu-mpuu mosimpotove. Apa ane kita mompotove roata, kita masadia muni mombaampungi tona ntanina.

2 Petrus 1:7

bo mosimpotove nte sampesuvumiu sampomparasaya. Bo komiu kana mompotove pura-pura tona.

1 Yohanes 3:11

Iveimo kareba niepemiu lako ri pantepuuna pomparasayamiu i Kristus: kita kana mosimpotove.

1 Yohanes 3:23

Hitumo niparentaNa ka kita: kita kana momparasaya AnaNa, i Yesus Kristus. Bo kita kana mosimpotove nangoseaka parenta i Kristus mboto ka kita.

1 Yohanes 4:12

Dopa naria saitoa manusia nanggita Alatala. Tapi ane kita mosimpotove, haitumo tandana Alatala naria riara ntaita, bo toveNa ka kita mpuu-mpuu naria aselena riara nggatuvuta.

1 Yohanes 4:20

Isema-sema nanguli ia nompotove Alatala, tano mai navuu matana nanggita sampesuvuna sampomparasaya, ia mai topodava! Ane ia ledo nompotove sampesuvuna anu nikitana, natantumo ledo mamala ia mompotove Alatala anu ledo nikitana.

1 Yohanes 4:7

Sampesuvu-sampesuvu nipotoveku, kita kana mosimpotove sabana tove nopuna lako nte Alatala. Isema-sema nepotove, iamo ana nu Alatala, bo nosisani belo ante Alatala.

Pompakita 2:4

Tapi naria sangaya inggumiu anu ledo nipodambaKu. Komiu domo nompotove Yaku mpo bara ipia tempo komiu dako nomparasaya.