1 Petrus 1:17 - Kaili Ledo

¹⁷ Sampesuvu-sampesuvu, komiu nanggasangai Alatala Tuamamiu tempo komiu nosambaya. Jadi komiu kana matuvu mekou nte Ia ane komiu da nonturo mpo topesovo ri dunia hitu. Apa Iamo mombatangara pura-pura tona nangoseaka pokainggura mboto bo Ia ledo nompelenje.

1 Petrus 1:17 ပူးပေါင်းရင်းမြစ်များ

Matius 16:27

Jadi, oseakamo Yaku nau sampe mamate. Apa domo masae Yaku, Ana nu Manusia makava lako ri suruga ante kuasa bo reme lako nte TuamaKu, mosanggani-nggani ante malaeka-malaekaNa. Bo tempo haitu Kubalasi pura-pura tona nangoseaka pokaingguna.

Matius 22:16

Nitudura bara sako-ndua ana-anagurura bo bara sako-ndua tona nosabingga nte Magau Herodes hau nte i Yesus bo manguli ivei: “Guru, nisani kamimo Komiu tona nanoa. Komiu nompatuduki pakalanto dota nu Alatala ka manusia. Komiu ledo naeka ante isema-sema sabana Komiu ledo nompelenje.

Matius 6:9

Jadi posambaya ivei: Alatala, Tuama kami ri suruga, Aga Komiu masipato rapetupu bo rapakaoge. Komiumo Magau kami.

Roma 11:20

Haitu nakana mami, tapi toramo, ira nipoara sabana ira ledo nomparasaya, bo komiu nitarima sabana komiu nomparasaya. Jadi nee malanga raramiu, agina komiu maeka!

2 Korintus 1:2

Kuperapi Tuamata Alatala bo Tuputa Yesus Kristus mombadekei belo ka komiu bo mompakatinonto raramiu.

2 Korintus 5:6

Jadi haitu sampe rara kami bate-batena naroso. Nisanita ane kita da natuvu nte karota ri dunia hitu, kita dopa nosanggani-nggani ante i Pue Yesus ri suruga.

2 Korintus 7:1

Sampesuvu-sampesuvu nipotoveku. Pura-pura janji nu Alatala haitu nipambela ka kita. Jadi kita kana mombakabasaka pura-pura pokainggu bo pekiri nadaa. Kita kana mangoseaka Alatala ante rarata mpuu-mpuu, bo kana maeka movia anu ledo rapokonoNa.

2 Korintus 7:11

Kasusa raramiu nombaca suraku bara ipia mpuu-mpuu kasusa rara nangoseaka dota nu Alatala. Peintamo anu najadi! Lako ri kasusa rara nirasaimiu haitu, komiu mpuu-mpuu nadota movia anu nanoa. Niulimiu komiu ledo nosabingga ka tona nompoara kami. Naraumo komiu nompekirika dosa nipovia nu roamiu haitu, bo naekamo raramiu mangoseaka pokaingguna. Nalentoramo raramiu manggita yaku. Nioseakamiumo anu niuliku ka komiu. Nasadiamo komiu nombahuku tona nasala haitu. Riara mpengaya-ngaya nipopakitamiumo komiu ledo nasala riara parakara bara ipia.

Galatia 2:6

Jadi pakeni-pakeni ntodea topomparasaya anu nireke nalanga nturora nasituju ante Kareba Belo nipatoleleku. (Nau nalanga panggana nau ledo, nasimbayu ri panggitaku, sabana Alatala ledo nompelenje.) Ledo ria nuapa-nuapa nitambaira ka Kareba haitu.

Efesus 1:17

Yaku nekakai nte Tuamata Alatala anu nakuasa bo naoge, anu nisomba nTuputa Yesus Kristus. Yaku nerapi ala Ia mombadekei Nosa GasaNa ka komiu. Bo Nosa Gasa mompakanoto raramiu bo mompopaisani Alatala ka komiu sampe komiu mpuu-mpuu mosisani belo ante Alatala.

Efesus 3:14

Jadi, [ane yaku nantora kanoto nu Alatala bo niaNa lako ri lamba pamulana], yaku nantaputu nosambaya ri ngayo nTuamata Alatala.

Efesus 6:9

Bo komiu anu najadi tua atau madika, komiu muni kana mokainggu mabelo nte batuamiu. Nee momparangga ira, sabana nisanimiu mboto Tupumiu bo Tupura aga saito. Iamo naria ri suruga bo Ia ledo nompelenje.

Filipi 2:12

Jadi sampesuvu-sampesuvu nipotoveku, komiu nasaro nangoseaka pepatudukiku tempo yaku da nosanggani-nggani ante komiu. Jadi kuperapi komiu batena mangoseaka pepatudukiku, nemopa sii-sii kita nosinggavao. Alatala nompakasalama komiu bo nidekeiNa katuvu nabelo ka komiu. Jadi pasimbuku njuumo matuvu manoa, maeka mokainggu nadaa, sampe kaupuna katuvumiu nabelo haitu ledo makura nuapa-nuapa.

Kolose 3:25

Tapi isema-sema movia anu nadaa rabalasi ante pehuku masipato ka daa nipoviana, sabana Tupu ledo nompelenje.

Ibrani 12:28

Jadi haitu sampe kita masipato manguli tarima kasi nte Alatala, sabana Ia nombadekei loga ka kita majadi todea riara PoparentaNa bo PoparentaNa haitu ledo ntoto mogoya. Bo kita kana metupu nte Alatala ante cara nipodambaNa. Kita kana mekou nte Ia bo maeka movia anu ledo nipokonoNa.

Ibrani 4:1

Sampesuvu-sampesuvu, da naria pojanji nu Alatala nombadekei loga ka kita menonto mosanggani-nggani ante Ia. Haitu sampe kita kana mainga ala nee maria saitoa kita maboli.

1 Petrus 2:11

Sampesuvu-sampesuvu nipotoveku, katuvuta ri dunia hitu nasimbayu mpo topesovo bo torata anu nonturo aga sampalai. Jadi yaku mpuu-mpuu nerapi nte komiu, nee raoseakamiu dota rara nadaa anu batena nangeva nyawamiu nangoseaka dota nu Alatala.

1 Petrus 3:15

Tapi bilamo i Kristus riara ntaimiu bo pakaoge Ia sabana Ia Tupumiu nagasa. Bo ane rapekutana ntona komiu, nuapa sabana komiu nanjarumaka i Pue, komiu kana masadia mesana ka ira. Bo pesanamiu haitu kana rapovia ante ede rara bo ante tesa-tesa nalusu.