1 Petrus 1:12 - Kaili Ledo

¹² Bo Alatala nompakalanto ka ira anu nibotora haitu ledo nosinggambela ante ira mboto tapi nosinggambela ante komiu anu natuvu sii-sii. Kajadia-kajadia nibotora haitu, nipatolele ntopanggeni Kareba Belo ka komiu sii-sii. Nikenira kareba haitu ante petulungi Nosa Gasa nu Alatala, anu nipopanau lako ri suruga. Kakanana malaeka-malaeka nTupu mboto nadota mangisani batuana kajadia-kajadia pangane anu nipatolele ka komiu.

1 Petrus 1:12 ပူးပေါင်းရင်းမြစ်များ

Matius 11:25

Tempo haitu nosambayamo i Yesus. NiuliNa, “Tata, Komiumo Tupu nu langi bo tana. Yaku nosukuru nte Komiu sabana nipopaisaniMiu pura-pura anu pangane ka tona ledo natau. Tapi nitabuniakaMiu ka tona nangisani bo tona napande,

Matius 11:27

Naupu haitu, i Yesus notesa ka tona ri sia, “Pura-pura nidekei nTuamaKu ka Yaku. Ledo ria tona mpuu-mpuu nosisani ante Yaku, Ana nu Alatala, aga TuamaKu Alatala. Bo ledo ria tona mpuu-mpuu nosisani ante TuamaKu aga Yaku, AnaNa, bo isema-sema Kupodota, Kupopaisanika TuamaKu ka ia.

Matius 16:17

Nanguli i Yesus, “Mabelo mpuu iko, Simon, ana i Yunus! Sabana, ledo manusia nompopaisani haitu ka komiu. TuamaKu ri suruga nompopaisani ka iko isema Yaku.

Markus 16:15

NiulikaNa ira, <

Lukas 15:10

Ivesia muni malaeka-malaeka nu Alatala. Madamba mpuu rarara ane saito tona najea nokainggu nadaa.”

Lukas 2:26

Nosa Gasa haitu nompopaisani ka ia, dopa ia mamate ane dopa rakitana Magau Topepakasalama anu nijanji nu Alatala.

Lukas 9:6

Naupu sia, hau ira nompebutu ngata mompatolele Kareba Belo, bo mompakabelo tona nadua ri umba-umba.

Yohanes 15:26

Kutudu Topetulungi lako nte TuamaKu tumai nte komiu, haitumo Nosa Gasa nu Alatala anu mompopaisani anu nakana. Tempo makava Ia, Iamo mompopaisani Yaku ka komiu.

Suro-Suro 10:44

Da notesa i Petrus, nanaumo Nosa Gasa nu Alatala bo nombakuasai pura-pura topangepe tesa haitu.

Suro-Suro 16:10

Jadi naupu nikita i Paulus haitu, kaliu-liu nanggalivomo kami hau ri propinsi Makedonia, sabana nipekiri kami, Alatala mpuu-mpuu nantudu kami mompatolele Kareba Belo ka tona hamai.

Suro-Suro 2:33

Ia nianggataka nu Alatala bo nipoponturo ri ponturo nibila ri sabingga nggana nu Alatala ri suruga. Bo nitarimaNa Nosa Gasa nijanji nTuamaNa, Alatala. Jadi sampesuvu-sampesuvu, pangane nikitamiu bo niepemiu kami notesa nte mpengaya basa. Haitu najadi sabana kuasa Nosa Gasa anu nipopanau i Yesus ka kami.

Suro-Suro 4:31

Naupu ira nosambaya, banua nikasiromura haitu nogoya. Ira pura-pura nikuasai nu Nosa Gasa nu Alatala, bo nipatolelera tesa nu Alatala bo domo ntoto naeka rarara.

Suro-Suro 4:8

Jadi i Petrus nikuasai nu Nosa Gasa nu Alatala, bo nesanamo ia, “Totua-totua, pakeni ntodea bo pakeni agama.

Suro-Suro 8:25

Naupu i Petrus bo Yohanes nosabi bo nompatolele tesa i Pue ka todea, nanjilimo ira hau ri ngata Yerusalem. Bo riara polipara haitu nipatolelera Kareba Belo ri ngata dea ri bagia Samaria.

Roma 1:15

Haitumo sampe naoge raraku mompatolele Kareba Belo ka komiu toponturo ri ngata Roma muni.

Roma 1:17

Kareba Belo nompopaisani dala ka kita majadi manoa ri panggita nu Alatala, haitumo momparasaya i Yesus. Ledo ria dala ntanina, aga momparasaya lako ri pantepuuna sampe ri kaupuna. Apa nitulisi ri Buku Gasa ivei: <>

Roma 10:15

Bo berimba munimo tona mompatolele Kareba Belo ane dopa ria tona mombasuro ira manggeni kareba haitu? Riara Buku Gasa nitulisi ivei: <> Yesaya 52:7

Roma 15:19

bo sabana kabaraka-kabaraka bo tanda-tanda nipokumaaka nipoviaku ante kuasa Nosa Gasa. Lako ri ngata Yerusalem sampe ri tana Ilirikum, nipatoleleku pura-pura Kareba Belo i Yesus Kristus ka tona.

1 Korintus 2:10

Tapi belo nipakasadia nu Alatala haitu, nipopaisaniNa ka kita lako ri Nosa GasaNa. Apa Nosa Gasa nu Alatala nangisani mpengaya-ngaya, sampe nau patuju nu Alatala anu dopa nisani nu manusia, nisaniNa pura.

2 Korintus 1:22

bo nidekeiNa Nosa GasaNa riara ntaita, tandana kita todeaNa. Nosa GasaNa haitu panggangisita ala rasanita janji nu Alatala ka kita mpuu-mpuu rapakadupaNa.

2 Korintus 6:6

Riara mpengaya haitu, nalantomo kami mpuu-mpuu batua nu Alatala, apa pokainggu kami nagasa, nisani kami Tesa nu Alatala, kami nosabara bo nabelo rara nte tona. Nosa Gasa nokarajaa riara nggatuvu kami bo kami nompotove tona ntanina ante rara mpuu-mpuu.

Galatia 1:12

Kareba Belo ledo nitarimaku lako nte manusia, bo ledo muni manusia nompatuduki yaku. Tapi i Yesus Kristus mbotomo nompopaisani Kareba Belo haitu ka yaku.

Galatia 1:16

Ia nompopaisani AnaNa i Yesus ka yaku ala yaku mamala mompatolele Kareba Belo anu notesaki AnaNa haitu ka tona ledo toYahudi. Tempo yaku nipokio nu Alatala, yaku ledo kaliu-liu hau nte manusia merapi rapatuduki, apa i Yesus mbotomo nompopaisani Kareba haitu ka yaku.

Efesus 3:10

PatujuNa ala sii-sii pura-pura malaeka bo anu nakuasa ri langi mangisani notoNa nompasiayu mpengaya-ngaya, sabana rakitara niaNa haitu rapakadupa ante todea topomparasaya i Kristus.

1 Tesalonika 2:9

Sampesuvu-sampesuvu, natantu da nitoramiu pompasimbuku kami bo kasusa kami bara ipia. Eo bongi kami nompasimbuku nokarajaa nompaelo mboto ala komiu ledo masesa mompekirika katuvu kami tempo nompatolele Kareba Belo nu Alatala ka komiu.

1 Timotius 3:16

Nabelo mpuu pepatuduki nakana niparasayata, anu dopa nisani ntona nggaulu tapi sii-sii nipopaisani nu Alatala ka kita ivei: Ia najadi manusia bo Nosa Gasa nosabiki Ia mpuu-mpuu tona nipelisi nu Alatala. Ia nikita nu malaeka nu Alatala bo karebaNa nipatolele ka tona dopa nosisani nte Alatala. Ia niparasaya ntona ri umba-umba ri dunia bo Ia nianggataka hau ri suruga.

Ibrani 11:13

Ira pura-pura pangane batena nomparasaya sampe namate, nau ledo nitarimara mboto anu nijanji nu Alatala. Namala raulita nikitara nggavao kadupana. Nisanira kadupana da masaepa, tapi naupa ivesia nadamba rarara bo ledo nonggai rarara nantongoraka kadupana pojanji nu Alatala. Niulira dunia hitu ledo ponturora nakana, ira aga topesovo bo topanjayo ri dunia hitu.

Ibrani 2:4

Bo Alatala mboto nompakalanto kareba nipatolelera mpuu-mpuu nakana. Apa nipoviaNa mpengaya-ngaya kabaraka bo tanda nipokumaaka, bo nipaleleNa pompakule lako ri Nosa GasaNa nangoseaka dotaNa mboto.

Ibrani 4:2

Apa kita muni nangepe Kareba Belo nu Alatala nasimbayu mpo totuata nggaulu. Tapi kareba niepe ntotuata ledo ria gunana ka ira, sabana aga niepera bayangi, ledo niparasayara kareba haitu.

1 Petrus 1:25

Tapi Tesa nu Alatala bate-batena sampe ri kasae-saena.” Yesaya 40:6-8 Tesa nu Alatala haitumo Kareba Belo anu nipatolele ka komiu.

1 Petrus 4:6

Haitumo sampe Kareba Belo nipatolele muni ka tona namatemo. Ira namatemo sabana pehuku nu Alatala, nasimbayu nte pura-pura manusia ntanina. Tapi Kareba Belo nipatolele ka ira ala nyawara mamala matuvu mabelo mangoseaka dota nu Alatala.

Pompakita 5:11

Naupu haitu nipeintaku, bo niepeku suara malaeka nadea, nonjobu-njobu bo nojuta-juta kadeana. Ira nombatiku Gadera Kamagaua nosanggani-nggani ante ampa Anu Natuvu bo ropulu bo ampa totua.