1 Korintus 8:9 - Kaili Ledo

⁹ Tapi sampesuvu-sampesuvu, pakabelo-belo! Nau nisanimiu ledo makuya mangande kandea haitu, nee sampe tona anu dopa naroso pomparasayana rapakenimiu mangande kandea haitu, sampe ia manavu riara dosa.

1 Korintus 8:9 ပူးပေါင်းရင်းမြစ်များ

Matius 18:10

Jadi pakabelo-belo, nee mompandaente ngana kodi eva ngana hitu. Sabana Kuuli ka komiu, malaeka-malaeka anu nombajagai ira, bate-batena naria ri ngayo nTuamaKu ri suruga.

Roma 15:1

Kita anu naroso pomparasayata masipato mosabara nte roata anu da nonggai rarana sabana dopa naroso pomparasayana. Nee aga mompekirika kasana nu rarata mboto.

1 Korintus 10:24

Nee aga mompekirika kabelo karomiu mboto, tapi pekirika muni kabelo ntona ntanina.

1 Korintus 10:28

Tapi ane maria tona manguli ka komiu, “Kandea hitu nipakande ka tupu-tupu ntanina,” nee rakandemiu kandea haitu ala ledo monggai rara nu roa mompekirika bara nasala bara ledo.

1 Korintus 10:29

Patujuku, ledo ponggai raramiu nipekiriku tapi ponggai rara nu roa. Tapi bara maria tona manguli, “Nakuya dotaku mamala ralava ntona ntanina?

1 Korintus 10:32

Nee sampe pokainggumiu manggeni tona ntanina manavu riara dosa, nau toYahudi nau tona ledo toYahudi, nau todea topomparasaya Alatala.

1 Korintus 8:10

Patujuku ivei: Nisanimiu ledo nakuya mangande kandea haitu. Tapi rapana, komiu hau mangande ri banua pesomba ka viata, bo rakita ntona anu dopa naroso pomparasayana. Natantumo ia muni mabia mangande kandea nipesomba ka viata atau tupu-tupu ntanina haitu.

1 Korintus 8:12

Pokainggumiu ante sampesuvumiu haitu nasala sabana pokainggumiu nanggeni ia novia anu nirasaina nadosa sabana pomparasayana dopa naroso. Bo pokainggumiu haitu nadosa ri panggita i Kristus.

1 Korintus 9:22

Ane yaku nosanggani-nggani nte tona ledo naroso pomparasayana, yaku najadi nasimbayu mpo ira ala yaku mamala mantulungi mompakaroso pomparasayara. Yaku nangoseaka mpengaya-ngaya pokainggu bo kabiasa ntona ala yaku mamala manggeni sanu ira momparasaya.

2 Korintus 11:21

Ledo naeya mata kami nanguli kami ledo mabia mokainggu ivesia nte komiu! Tapi ane maria tona mabia mangoe karora mboto, yaku muni mabia mangoe karoku mboto! Yaku notesa mpo todoyo!

2 Korintus 11:29

Apa ane naria sampesuvu sampomparasaya nalente, yaku muni nombarasai kalentena haitu. Ane naria sanu nanavu riara dosa, yaku muni nasusa raraku nompekirika ira.

2 Korintus 6:3

Kami nompasimbuku matuvu ante pokainggu nabelo ala ledo maria tona manjalai pokarajaa kami nompatolele Tesa nu Alatala.

Galatia 5:13

Sampesuvu-sampesuvu, komiu nipokio nu Alatala ala rakabasaka lako ri Atura agama. Aga nee sampe haitu majadi loga mangoseaka mpengaya-ngaya dota rara nadaa! Komiu kana mosimpotove bo mositulungi.

Kolose 2:8

Komiu kana mainga, nee sampe komiu rabagiu ntona ante pepatuduki ledo nakana bo ledo ntoto noguna. Apa pepatuduki haitu aga nangoseaka pekiri nu manusia, bo nopuna lako ri malaeka-malaeka nadaa anu nombakuasai dunia. Pepatuduki haitu ledo nopuna lako nte i Kristus.

1 Petrus 2:16

Komiu kana matuvu mpo tona nikabasaka lako ri pehuku nu dosa. Tapi nee sampe haitu majadi loga ka komiu movia anu nadaa! Komiu kana matuvu mpo batua nu Alatala anu natundu nte Ia.

2 Petrus 2:19

Guru-guru haitu nojanji ivei: “Ane raoseakamiu pepatuduki kami, komiu makabasaka lako ri atura-atura! Komiu mamala movia nuapa-nuapa rapodotamiu.” Tapi nau niulira makabasaka, ira mboto nikuasai pokainggu-pokainggu anu nompakarugi manusia. Apa tona nidagi dota rarana nadaa, batuana ia nipobatua nu dota rarana haitu.

Pompakita 2:14

Tapi da nariapa bara sako-ngaya inggumiu anu ledo nipodambaKu. Naria tona nte komiu nangoseaka pepatuduki i Bileam nggaulu. I Bileam nompatuduki Magau Balak mompakanavu toIsrael riara dosa. Nipatudukina ia mompakeni ira mangande kandea nipopali sabana nipakande ka tupu-tupu ntanina, bo nompatuduki ira ledo makuya mosipogau nte tona ledo bereina mboto.