1 Korintus 8:1 - Kaili Ledo

¹ Kapolana, nipekutanamiu kandea nipakande ka tupu-tupu ntanina. Nakana mami niulimiu kita pura-pura napande. Nisanita ledo ria tupu ntanina aga Alatala. Tapi kuuli ka komiu, kapande nompakalanga rarata. Aginapa mompotove roa sabana pepotove nompakaroso rara ntona.

1 Korintus 8:1 ပူးပေါင်းရင်းမြစ်များ

Suro-Suro 15:10

Jadi nakuya komiu ledo nadota nantarima anu nipovia nu Alatala sii-sii? Nakuya komiu aga madota mompasuu ira mantuntuni atura-atura anu nakaja mpuu raoseaka? Totuata nggaulu bo kita mboto ledo nompakule nangoseaka atura-atura haitu.

Suro-Suro 15:29

Nee rakandemiu kandea nipesomba ka tupu-tupu ntanina. Nee rakandemiu raa, bo nee rakandemiu bau lako ri binata nikoje, haitumo anu ledo nisuvuraka raana. Bo nee mosampaturu ante tona ledo bereimiu mboto. Ane raoseakamiu atura-atura haitu, nabelomo. Sampe ri siimo ruru isi sura kami.”

Suro-Suro 21:25

Tapi tona ledo toYahudi anu nomparasaya i Yesus, nipakatu kamimo sura ka ira nompakatantu atura-atura anu paraluu raoseakara. Haitumo, ira ledo mamala mangande kandea nipesomba ka tupu-tupu ntanina, ledo mamala mangande raa bara mangande bau nu binata nikoje, bo ledo mamala mosampaturu ante tona ledo bereira mboto.”

Roma 11:25

Sampesuvu-sampesuvu sampomparasaya! Ledo mabelo malanga gaga raramiu. Jadi yaku madota ala rasanimiu nia nu Alatala anu dopa nisani nu manusia nggaulu, haitumo, anu majadi nte toYahudi. Sii-sii nadea toIsrael nakaa bagara bo ledo nomparasaya. Tapi kakaa bagara haitu aga sampalai, sampe magana kadea ntona ledo toYahudi anu momparasaya i Yesus.

Roma 12:16

Komiu kana matuvu mosintuvu nte roa. Nee malanga raramiu tapi komiu kana masadia mosimporoa ante tona naede katuvuna. Nee rapekiri karomiu napandepa pade kakanana.

Roma 14:10

Jadi, nee rapakasala roa-roamiu sampomparasaya. Bo nee raparitambemiu ira. Apa kita pura-pura kana mantingayo Alatala bara maipia bo Ia mombatangara kita pura-pura.

Roma 14:14

Yaku nosangu rara ante i Pue Yesus, jadi nisaniku mpuu ledo ria kandea nuapa-nuapa nipopali ri panggita nu Alatala. Tapi ane maria tona nomparasaya sangaya kandea nipopali, ia mpuu-mpuu masala ane rakandena.

Roma 14:19

Haitu sampe kita kana mompasimbuku matuvu mosinggabelo ante roata, bo mosipakaroso rara.

Roma 14:22

Ane niparasayata pokaingguta haitu ledo nasala, aginamo rabolita pomparasayata haitu riara ntaita ri ngayo nu Alatala. Nasana mpuu kita ane nipoviata anu niparasayata riara ntaita nabelo, bo ane pekiri rara ntaita mboto ledo nanjalai kita.

Roma 14:3

Tona nangande mpengaya-ngaya kandea ledo masipato momparitambe tona ledo nangande bau. Bo tona ledo nangande bau, ledo muni masipato manjalai tona nangande mpengaya-ngaya kandea. Sabana topangande mpengaya-ngaya haitu muni nitarima nu Alatalamo majadi todeaNa.

Roma 15:14

Sampesuvu-sampesuvuku, nisaniku mboto komiu batena nokainggu nabelo nte tona ntanina, bo nisanimiumo pura-pura anu masipato rapoviamiu, bo nipakulemiu mosipakaroso rara.

1 Korintus 1:5

Katuvumiu nipakasugiNa riara mpengaya-ngaya sabana komiu nosangu rara ante i Yesus Kristus. NidekeiNa ka komiu kapande notesa bo mpengaya-ngaya pangisani nabelo.

1 Korintus 10:15

Komiu tona napande, jadi coba taseremiu mboto tesaku hitu bara nakana bara ledo.

1 Korintus 10:28

Tapi ane maria tona manguli ka komiu, “Kandea hitu nipakande ka tupu-tupu ntanina,” nee rakandemiu kandea haitu ala ledo monggai rara nu roa mompekirika bara nasala bara ledo.

1 Korintus 14:20

Sampesuvu-sampesuvuku, tumo mompekiri mpo ngana-ngana. Komiu kana manoto mpo tona nambasomo. Tapi ane anu daa, komiu kana masimbayu mpo ngana kodi anu dopa nisanina novia nadaa.

1 Korintus 15:34

Jadi pakanoto mpanjili pekirimiu bo tumo rapovia dosa! Da nariapa sanu komiu dopa nosisani belo nte Alatala. Niuliku ivesia ala maeya matamiu.

1 Korintus 4:10

Kami nireke ntona todoyo sabana kami nangoseaka i Kristus. Tapi nangoseaka pekirimiu, komiumo topomparasaya nanoto! Kami nireke ntona nalente tapi nangoseaka pekirimiu, komiumo naroso! Kami nisalai ntona tapi komiu nitoiya ntona!

1 Korintus 4:18

Naria bara sako-ndua komiu nalanga rara, sabana niulimiu yaku domo tou nte komiu.

1 Korintus 4:6

Sampesuvu-sampesuvuku, porapa nitesaku ri bavona nipambela ka kami bo i Apolos ala mantulungi komiu. Nialaku jonjo kami randua ala komiu mamala meguru nee meliu lako ri anu nitulisi riara Buku Gasa. Patujuku ala ledo malanga raramiu bo ledo mantoiya saito batua i Kristus bo manjalai batua ntanina.

1 Korintus 5:2

Kakanana masipato mabuku raramiu bo maeya matamiu, bo masipato komiu mompopalai topogau haitu lako ri tatangamiu, domo radekei ia masiromu nte komiu mombasomba Alatala. Tapi ledo ivesia komiu. Komiu da nalanga raramiu, nau pokainggu roamiu ivesia!

1 Korintus 5:6

Ledo masipato malanga raramiu bo mangoe ka pokainggu ivehaitu. Ledo nisanimiu tona nokainggu nadaa namala manggeni tona ntanina movia nadaa? Tona nokainggu nadaa nasimbayu mpo ragi sakide anu namala mompopenggamba pura-pura gando.

1 Korintus 8:2

Isema-sema nompekiri nadeamo nisanina, kakanana dopa nisanina mpuu anu masipato rasanina.

1 Korintus 8:4

Jadi ane motesa kandea nipakande ka tupu-tupu ntanina, nisanitamo pinoito nogambara anu ledo nakana. Bo nisanita muni Alatala aga saito, ledo ria ntanina.

1 Korintus 8:7

Tapi naupa ivesia, ledo pura-pura topomparasaya nangisani anu haitu. Dopame ira nomparasaya i Kristus, sanu topomparasaya nabiasa nompakande tupu-tupu ntanina. Jadi sampe sii-sii ane rakandera kandea anu nipakande ka tupu-tupu ntanina, kandea haitu nirekera mpuu-mpuu kandea nu tupu-tupu haitu. Ane mangande kandea haitu, nirasaira nadosa, apa dopa naroso pomparasayara.

Efesus 4:16

bo kita todea topomparasaya nirapaka sipa nu karoNa. Ri karo manusia sipa nu karo nikuasai nu balengga. Sipa-sipa haitu niposidumpa pakabelo-belo bo niposiumpu ante uva ala majadi sangu karo. Bo ane pura-pura sipa haitu mokarajaa mangoseaka pompakule nidekei ka ia, njumangu karo haitu matuvu mabelo bo mantambai maroso. Ivesia muni kita topomparasaya. Kita pura-pura nosangu rara nte i Kristus bo Ia nompopakasangu kita. Jadi ane kita mosimpotove bo mositulungi, mantambai kabelona kasintuvuta bo karoso pangoseakata i Pue.

Kolose 2:18

Jadi, ane maria tona nompakasala komiu sabana ledo nioseakamiu pepatudukira, nee rapariaramiu tesara, mbelaka komiu masalandala bo ledo manggava belo nijanji nu Alatala ka komiu. Tona haitu aga madota mompasuu komiu metiede rara bo mombasomba malaeka-malaeka. Ira nangoeka pangisanira sabana naria anu nikitara riara pangipi. Nalanga bayangi rarara, bo pepatudukira aga nopuna lako ri pekirira mboto anu nangoseaka dunia hitu.

Pompakita 2:14

Tapi da nariapa bara sako-ngaya inggumiu anu ledo nipodambaKu. Naria tona nte komiu nangoseaka pepatuduki i Bileam nggaulu. I Bileam nompatuduki Magau Balak mompakanavu toIsrael riara dosa. Nipatudukina ia mompakeni ira mangande kandea nipopali sabana nipakande ka tupu-tupu ntanina, bo nompatuduki ira ledo makuya mosipogau nte tona ledo bereina mboto.

Pompakita 2:20

Tapi da nariapa sangaya pokainggumiu anu ledo ntoto nipodambaKu. Haitumo mombine anu nosanga i Izebel anu nompangaku karona nabi. Komiu nompaloga ia nompatuduki bo nombabagiu topangoseaka Yaku. Ia nompatuduki ira mosipogau ante tona ledo bereira mboto bo mangande kandea nipopali sabana nipakande ka tupu-tupu ntanina.