1 Korintus 7:29 - Kaili Ledo

²⁹ Sampesuvu-sampesuvuku, patujuku ivei: kita topomparasaya kana mantora tempota domo masae. Jadi nompamula sii-sii tona nobereimo nee aga mompekirika bereina.

1 Korintus 7:29 ပူးပေါင်းရင်းမြစ်များ

Lukas 14:20

Bo tona ntanina nanguli, ‘Dako noberei yaku, jadi ledo makapo tou!’

1 Korintus 7:28

Tapi ane rapana komiu moberei, haitu ledo madosa. Bo ane randaa moberei ledo rapodosana. Tapi toramo, topoberei tantu mantingayo mpengaya-ngaya kasusa riara nggatuvura. Bo anu kupodota ala komiu ledo rapambela kasusa haitu.

1 Korintus 7:30

Bo tona notumangi ante susa rara, nee aga mompekirika kasusa rarana. Tona nadamba nemo aga mompekirika kadamba nu rarana. Tona nopagoli nemo aga mompekirika balu-baluna.

1 Korintus 7:31

Bo tona nompasimbuku mbara-mbara dunia hitu nemo aga mompekirika mbara-mbarana. Apa dunia nisanita sii-sii, domo masae malipo.

1 Petrus 1:24

Riara Buku Gasa nitulisi ivei: “Katuvu manusia pura-pura nasimbayu mpo kavoko, bo pura-pura kuasa bo kagayana mpo sese nggavoko. Kavoko haitu nalele bo sesena naronto.

1 Petrus 4:7

Naparamo kaupu nu dunia. Jadi komiu kana mainga bo mompakanoto raramiu ala komiu mamala mosambaya.

1 Yohanes 2:17

Dunia bo pura-pura anu naria riarana anu nipoino manusia magero, tapi isema-sema mangoseaka dota nu Alatala, matuvu mabelo sampe ri kasae-saena.