1 Korintus 6:9 - Kaili Ledo

⁹ Jadi, ledo nisanimiu tona ledo nangoseaka dota nu Alatala ledo ntoto manggava bagia riara Poparenta nu Alatala? Nee sampe komiu rabagiu! Tona nokainggu nabuga, tona nompakande tupu-tupu ntanina, tona nobualo, bo tona nompogau simbo langgai atau simbo mombine, ira pura-pura ledo ntoto manggava bagia riara Poparenta nu Alatala.

1 Korintus 6:9 ပူးပေါင်းရင်းမြစ်များ

Matius 19:29

Isema-sema nompalaisi banuana bara sampesuvuna bara tina tuamana, bara ana-anana, bara taluana sabana ia nangoseaka Yaku, tona haitu radekei saatu-nggani kadeana. Bo ia muni radekei katuvua mabelo sampe ri kasae-saena.

Matius 25:34

Bo Kuuli ka ira ri sabingga ngganaKu ivei: ‘Kamaimo komiu nipobelo nTuamaKu. Pesuamo riara KamagauaKu, naria ponturo ri sii nipakasadia ka komiu lako ri lamba pamulana.

Lukas 21:8

Nesana i Yesus, “Pakabelo-belo! Nee sampe komiu rabagiu. Madea ngena tona makava mompobalu sangaKu. Raulira iramo ‘Magau Topepakasalama.’ Bo raulira muni, nakavamo kaupu nu dunia! Tapi nee raoseakamiu tesara.

Suro-Suro 20:32

Jadi sampesuvu-sampesuvuku, hitupa yaku nekakai nte Alatala nerapi Iamo mombajagai komiu. Bo kuuli ka komiu, oseakamo tesa nu Alatala anu nompopaisani kabelo nu Alatala ka kita. Aga Iamo nakuasa mompakaroso pomparasayamiu bo mombadekei belo ka komiu, haitumo belo nipakasadiaNa ka tona nipelisiNa majadi todeaNa.

Suro-Suro 24:25

I Paulus nanguli pokaingguta kana manoa, bo kita ledo mamala mangoseaka dota rarata nadaa, apa makava Eo Potangara ngena tempo Alatala mombatangara pura-pura manusia. Nangepe tesa i Paulus, naeka mpuumo i Feliks. Nanguli ia, “Ivesiamo ruru. Ane maria loga damo kupokio pade motesa vai kita.”

Roma 1:18

Lako ri suruga Alatala nombahuku manusia anu ledo natundu nte Ia bo nokainggu nadaa. Pokainggura nadaa haitu nombalava tona mangisani pepatuduki nakana.

1 Korintus 15:33

Tapi nee sampe komiu rabagiu ntona anu nanguli tomate ledo rapakatuvu mpanjili. Toramo! Ane kita movega ante tona nadaa, tantu rapasialata pokainggura.

1 Korintus 15:50

Sampesuvu-sampesuvu, iveimo patujuku: karota ri dunia hitu nipovia lako ri isi bo raa. Kita ledo mamala monturo ri Poparenta nu Alatala ri suruga ante karota anu mamate bo mapopo, sabana ri suruga ledo ria kamatea.

1 Korintus 3:16

Sampesuvu-sampesuvu, ledo nisanimiu komiu nasimbayu mpo banua niponturo nu Alatala? Bo Nosa GasaNa nonturo ri tatangamiu.

1 Korintus 5:1

Niepeku lelena naria saito komiu nokainggu nabuga ntoto. Ia nompogau berei ntuamana mboto. Iyapa tona ledo nomparasaya Alatala, ledo nokainggu nadaa ivehaitu!

1 Korintus 5:10

Anu nipatujuku, nemo mosimporoa ante tona nangaku nomparasaya i Yesus, tano mai pokaingguna nabuga, nadoko, nompakande tupu-tupu ntanina, nanjalai tona ntanina, topanginu, atau topangangga. Nemo mosimporoa ante tona ivehaitu. Nau aga mangande mosanggani-nggani nemo! Patujuku ledo mombatagi komiu mosimporoa ante tona anu ledo nosisani ante Alatala bo nokainggu nabuga, anu ledo ria kabasa-basana manggava untu ka karona mboto, topebagiu, bo topompakande tupu-tupu ntanina. Ledo ira nipatujuku. Apa ane komiu ledo moroa nte tona nadosa ri dunia, natantu komiu kana molinja lako ri dunia hitu!

1 Korintus 6:10

Ivesia muni ante topangangga, tona ledo ria kabasa-basana manggava untu ka karona mboto, tona nanginu sampe nalangu, tona nanjalai-lai roa, bo topeago. Ira muni ledo ntoto manggava bagia riara Poparenta nu Alatala.

1 Korintus 6:18

Nemo mpuu rapogaumiu tona ledo bereimiu mboto! Apa dosa haitu ledo ria kasimbayuna. Isema-sema nompogau tona ledo bereina mboto, mpuu-mpuu nompakagero posangu rarana ante i Pue.

1 Korintus 6:19

Ledo nisanimiu karomiu nasimbayu mpo banua petupu anu niponturo Nosa Gasa nu Alatala? Ia natetida riara ntaimiu. Alatala mboto nombadekei Nosa Gasa ka komiu. Iamo Tupu nu karomiu, ledo komiu mboto tupuna.

1 Korintus 9:24

Natantu nisanimiumo ri posilumba, pura-pura topangova mangova, tapi aga saito nanggava hadia padagi. Jadi komiu muni kana mokainggu mpo topangova: pasimbukumo ante mpuu-mpuu rara ala rakavamiu hadia.

2 Korintus 12:21

Nakini raraku ane tou nte komiu vai yaku, Alatala mompakaeya yaku ri ngayomiu, bo yaku motumangi ri ngayomiu sabana madea komiu anu nadosa bara ipia dopa najea lako ri pokainggura nadaa bo nabuga. Bara maria da nompogau tona ledo bereina mboto, bara movia anu ledo ntoto masipato mpo anu nabiasa nipoviara bara ipia.

Galatia 6:7

Sampesuvu-sampesuvu, pakabelo! Ane rasarumakata kita mamala mombabagiu Alatala, kita aga nombabagiu karota mboto. Alatala ledo namala rapongei-ngeika! Nuapa nituda, haitumo rakato.

Kolose 3:5

Sabana haitu, kabasakamo pokainggu-pokainggu anu nopuna lako ri dunia nadaa hitu. Nee mosipogau ante tona ledo bereimiu mboto, nee movia pokainggu anu ledo masipato, nee mangoseaka dota raramiu nabuga bo dota-dota ntanina anu nadaa. Bo nee muni maoge rara manggava melabipa pade tona ntanina, sabana anu nipooge rarata haitumo najadi anu nisombata, bo haitu nasimbayu nte metupu nte tupu ntanina.

Ibrani 12:14

Komiu kana mompasimbuku matuvu mosinggabelo ante pura-pura tona. Bo pasimbuku muni matuvu magasa, sabana tona ledo nagasa katuvuna ledo ntoto mamala manggita i Pue.

Ibrani 12:16

Nee sampe maria tona mosipogau nte tona ledo bereina mboto. Bo nee sampe maria tona moinggu mpo i Esau, apa ia aga nompekirika kasana karona ri dunia hitu bo ledo nipekirikana dota nu Alatala. Kalumbuana nisulakana sanjuraya kandea.

Ibrani 13:4

Ponjamboko kana rabilamiu pura-pura. Nee mompakagero ponjambokomiu ante mompogau tona ledo bereimiu mboto, sabana Alatala mombahuku tona nompogau tona ledo bereina mboto.

Yakobus 1:16

Sampesuvu-sampesuvu nipotoveku, nee rabagiu! Alatala ledo nompesori kita movia anu nadaa.

1 Yohanes 3:7

Sampesuvu-sampesuvu nipotoveku, nee rapaloga tona mombabagiu komiu. Toramo! Isema-sema batena novia dota nu Alatala, iamo tona nanoa ri panggita nu Alatala nasimbayu mpo i Kristus nanoa ri panggita nu Alatala.

Pompakita 21:8

Aga tona naeka mangoseaka Yaku, atau ledo niparasayana Yaku, bo tona nadaa pokaingguna, topepatesi, tona nokainggu nabuga, topedoti, tona nombasomba tupu-tupu ntanina, bo pura-pura topodava, ira pura-pura kana rahuku riara ntasi apu anu navaya ante vatu-vatu colonggata. Haitumo niuli kamatea karongganina.”

Pompakita 22:15

Tapi tona nadaa, topedoti, tona nogau sala ante tona ledo bereina mboto, topepatesi, tona netupu nte tupu ntanina, topodava bo pura-pura tona nompokono dava, ponturora pura-pura aga ri savaliku ngata haitu.