1 Korintus 6:15 - Kaili Ledo

¹⁵ Ledo nisanimiu karota nasimbayu ante sipa nu karo i Kristus? Jadi ledo ntoto masipato kita mompake karota, anu nasimbayu ante sipa nu karo i Kristus, bo mompogau bajinga.

1 Korintus 6:15 ပူးပေါင်းရင်းမြစ်များ

Lukas 20:16

Natantu rapatesina pura-pura ira, bo radekeina taluana ka tona ntanina mojampangina.” Topangepe porapa haitu nanguli ka i Yesus, “Nee mpuu sampe majadi ivehaitu!”

Roma 12:5

Ivesia muni kita topomparasaya i Kristus. Nau kita nadea, kita najadi sangu riara i Kristus. Bo kita nosidai mpo sipa-sipa nu karo.

Roma 3:31

Jadi, kita nireke nanoa sabana pomparasayata i Yesus. Tapi nee rapekirimiu Atura agama ledo noguna. Ledo ntoto nakana! Kakanana, lako ri pomparasayata haitu kita nompakaoge Atura agama.

Roma 3:6

Tapi panggava haitu ledo nakana! Ane rapana Alatala ledo nanoa, tantu Ia ledo mamala mombatangara pura-pura manusia.

Roma 6:15

Jadi, ane kita domo nipou Atura agama, tapi nanjarumaka pepotove nu Alatala, berimbamo? Mamala kita batena movia dosa? Ledo ntoto mamala!

Roma 6:2

Tantu ledo! Ledo masipato kita bate-batena movia dosa, sabana namala raulita kita namate nosanggani ante i Kristus ala kita domo rakuasai nu dosa.

Roma 7:13

Ane ivesia, nuapa batuana? Anu nabelo nompakadaa yaku? Tantu ledo! Dosamo mai anu nompakadaa yaku! Atura agama nabelo nipake nu dosa nompakanavu yaku sampe yaku masipato rahuku mate bo rapopogaa lako nte Alatala. Atura agama nabelo haitu, nompakalanto naria dosa riara ntaiku, bo nompakalanto nadaa mpuu dosa.

Roma 7:7

Niuliku pangane i Kristus nombakabasaka kita lako ri Atura agama. Jadi ane ivesia, nuapa raulita? Nadaa Atura agama? Tantu ledo! Atura-atura agama nabelo, sabana lako ri Atura haitu nisanita nuapa niuli dosa. Ane rapana ledo ria parenta nanguli <> ledo kusani kadaa nu dota anu naria riara ntaiku.

1 Korintus 11:3

Tapi hitu paraluu rasanimiu: langgai pakeni nu bereina mombine, i Kristus pakeni nu langgai, bo Alatala pakeni i Kristus.

1 Korintus 12:27

Komiu pura-pura nirapaka karo i Kristus bo komiu saito-saito simbo nirapaka sipa nu karoNa.

1 Korintus 6:13

Sanu muni nanguli kandea nipasadia rakande, bo tailiko nipovia rapangisi kandea. Bo kandea bo tailiko rapakaropu nu Alatala pura bara maipia. Jadi, nisarumakamiu ledo makuya nuapa-nuapa rapoviata ante karota. Kakanana ledo ivesia. Karota ledo nipovia mompogau tona ledo bereita mboto. Tapi karota nipovia ala rapaketa movia dota i Pue. Iamo Tupu nu karota.

1 Korintus 6:17

Tapi isema-sema nomparasaya i Pue Yesus, najadi nosangu rara nte Ia.

1 Korintus 6:19

Ledo nisanimiu karomiu nasimbayu mpo banua petupu anu niponturo Nosa Gasa nu Alatala? Ia natetida riara ntaimiu. Alatala mboto nombadekei Nosa Gasa ka komiu. Iamo Tupu nu karomiu, ledo komiu mboto tupuna.

1 Korintus 6:3

Ledo nisanimiu kita topomparasaya mombatangara malaeka-malaeka nTupu bara maipia? Jadi ane rapakulemiu mombatangara malaeka, natantu rapakulemiu mompakaupu parakara biasa ri katuvumiu eo-eo.

Galatia 2:17

Jadi, ane kami toYahudi manjarumaka majadi manoa ri panggita nu Alatala lako ri posangu rara kami ante i Yesus Kristus, batuana kami domo nanjarumaka Atura agama. Bo ane kami domo nanjarumaka Atura agama, batuana kami najadi nasimbayu mpo tona ledo toYahudi anu niuli nadosa sabana ledo nioseakara Atura agama. Jadi berimbamo? Mamala raulita i Kristus nanggeni kami majadi nadosa? Natantu ledo!

Galatia 3:21

Jadi nuapa batuana? Atura agama nositaliku ante pojanji nu Alatala? Tantu ledo. Ane rapana rapakuleta mangoseaka Atura agama sampe rakavata katuvua nabelo, tantu haitumo majadi dalata mompakanoa karota mboto ri panggita nu Alatala.

Galatia 6:14

Tapi yaku ledo ntoto madota mangoe ka nuapa-nuapa; yaku aga mangoeka anu nipovia nTuputa i Yesus Kristus ri kayu salib. Lako ri kamateNa haitu, nalantomo ka yaku ledo ria nuapa-nuapa riara dunia anu namala mompakanoa yaku ri panggita nu Alatala. Jadi nikabasakakumo pura-pura anu ri dunia anu nisarumakaku bara ipia, bo yaku aga nanjarumaka i Kristus.

Efesus 4:12

NipaleleNa pedekei haitu ala kita todea nu Alatala rapakagana ala rapakuleta mantui pokarajaa nu Alatala. PatujuNa muni ala kita anu najadi karo i Kristus mantambai karosota,

Efesus 5:23

sabana langgai nombabalenggai bereina mombine nasimbayu mpo i Kristus nombabalenggai todea topomparasaya. I Kristus mboto nompakasalama todea topomparasaya anu nirapaka sipa nu karoNa.

Efesus 5:30

Haitu nipovia i Kristus sabana kita todea topomparasaya nireke sipa nu karoNa mboto.

Kolose 2:19

Tona haitu domo nanjarumaka i Kristus. Tano mai, i Kristusmo nirapaka Balengga ntopomparasaya, bo kita anu nomparasaya nirapaka karoNa. I Kristusmo nompiara karoNa bo nompopakasangu todeaNa nasimbayu mpo uva bo oyu nipasiumpu bo nompoposidumpa buku-buku majadi sangu karo. Jadi Iamo nanggeniaka karoNa, haitumo todeaNa, nantambai naroso, nangoseaka dota nu Alatala.