1 Korintus 6:11 - Kaili Ledo

¹¹ Bara ipia bara sako-ndua komiu nokainggu ivesia muni. Tapi katuvumiu nipakagasa nu Alatala. Komiu najadi todeaNa nipatani ka Ia, bo komiu nipakanoa ri panggitaNa. Haitu pura-pura najadi ante kuasa Nosa Gasa nu Alatala sabana komiu nomparasaya i Pue Yesus Kristus.

1 Korintus 6:11 ပူးပေါင်းရင်းမြစ်များ

Matius 20:4

Niulina ka ira, ‘Koimo komiu mokarajaa ri taluaku ria, damo kubayari gaji masipato ka komiu.’ Jadi hau mpuumo ira nokarajaa.

Lukas 18:14

Nanguli i Yesus, “Kuuli ka komiu, tempo ira randua nanjili, topesingara balasitee nitarima nu Alatala, tapi toFarisi ledo. Apa, isema-sema nompakaoge karona mboto, kana rapakaede nu Alatala, tapi isema-sema nompakaede rarana, kana rapakaoge nu Alatala.”

Yohanes 13:10

Tapi nanguli i Yesus ka ia, “Tona naupu nandiu nagasa njumanggaromo, domo paraluu radiu. Aga kadana kana ratoposi pakagasa. Komiu nagasamo, aga saito ledo nagasa.”

Yohanes 13:8

Tapi nanguli vaimo i Petrus ka i Yesus, “Nee, Pue! Nee mpuu ratoposiMiu kadaku!” Nesanamo i Yesus, “Ane ledo Kutoposi kadamu, iko ledo mpuu anaguruKu.”

Yohanes 5:4

Apa sanggani-nggani malaeka nu Alatala nanau ri uve kola haitu nompopojompe uvena. Bo isema-sema mokolu mesua riara uve tempo uve haitu nojompe, kaliu-liu nabelo lako ri duana.

Suro-Suro 13:39

Kita ledo namala rakabasaka lako ri dosata ane aga nangoseaka Atura-atura nipapola Nabi Musa. Tapi isema-sema nomparasaya i Yesus, rakabasaka lako ri pura-pura dosana bo majadi nanoa ri panggita nu Alatala.

Suro-Suro 22:16

Jadi, nuapa vai nipopeamu? Peanggamo, dekeimo karomu radiu, tandana iko nangoseaka i Yesus. Pekakaimo nte i Yesus ala raampungiNa dosamu.’ ”

Suro-Suro 26:18

Kutudu iko hau mombabuka matara, ala ira domo matuvu ri kalandana tapi matuvu riara reme nu Alatala, ala ira rakabasaka lako ri kuasa Magau nu Seta bo matundu nte Alatala. Bo dosa-dosara raampungi bo ira majadi todea nu Alatala anu nipelisiNa, sabana pomparasayara Yaku.’ ”

Roma 3:24

Tapi Alatala nombareke kita nanoa ri panggitaNa sabana kamate i Yesus Kristus anu nombakabasaka kita lako ri pehuku nu dosa. Haitu nipovia nu Alatala ka kita lako ri kabelo raraNa, ledo nibayarita.

Roma 4:5

Tapi ledo ivesia kita ante Alatala. Alatala nombareke kita nanoa, ledo sabana kita nokarajaa nompasimbuku nokainggu nabelo. Tapi kita nireke nanoa sabana kita nomparasaya Alatala anu nompakule nombareke tona nadosa mpo tona ledo nasala. Jadi kita nireke nanoa lako ri pomparasayata.

Roma 5:1

Kita najadi nanoa ri panggita nu Alatala sabana kita nomparasaya i Yesus. Jadi sii-sii kita natuvu nosinggabelo ante Alatala sabana anu nipovia nTuputa Yesus Kristus ka kita.

Roma 5:9

Kita najadi nanoa ri panggita nu Alatala sabana raa i Yesus anu namate mombasompo dosata. Jadi, natantumo i Yesus mombakabasaka kita lako ri pehuku nu Alatala anu makava ngena.

Roma 8:30

Bo kita anu nipakatantuNa lako ri lamba pamulana haitu, nipokioNa majadi todeaNa. Bo kita anu nipokioNa majadi todeaNa, nirekeNa nanoa ri panggitaNa. Bo kita anu nirekeNa nanoa, radekeiNa bagia ri kakuasaNa bo kaogeNa mboto.

Roma 8:33

Isema mabia mompangadu kita anu nipelisi nu Alatala? Ledo ntoto ria! Apa Alatala mboto nanguli kita ledo nasala.

1 Korintus 1:30

Lako nte Alatala sampe kita najadi nosangu rara ante i Yesus Kristus. Bo lako nte i Kristus sampe nisanita kapande nu Alatala. Ia nompoposinggabelo kita ante Alatala sampe kita najadi todea nagasa nipatani ka Alatala. Bo Iamo nombakabasaka kita lako ri pura-pura anu nadaa.

1 Korintus 12:2

Nisanimiu mbotomo tempo komiu dopa nomparasaya i Yesus, komiu nasaro nasalandala nikeniaka ntupu-tupu ntanina anu ledo nosuara.

Galatia 2:16

Tapi nau ivesia, nisani kami manusia nireke nanoa ri panggita nu Alatala ledo sabana nangoseaka Atura-atura agama, tapi sabana pomparasayara i Yesus Kristus. Jadi kami mboto nomparasaya i Yesus Kristus ala majadi manoa ri panggita nu Alatala. Kami najadi nanoa sabana pomparasaya kami i Kristus, ledo sabana nangoseaka Atura-atura agama! Apa ledo ria saitoa majadi manoa ri panggita nu Alatala sabana pangoseakana Atura-atura agama.

Galatia 3:11

Nalanto mpuu ledo ria tona nireke nu Alatala nanoa lako ri pangoseakana Atura agama, apa naria tesa ntanina ri Buku Gasa nanguli ivei: “Tona najadi nanoa ri panggita nu Alatala sabana pomparasayana, iamo matuvu mabelo.”

Galatia 3:24

Jadi Atura agama haitu nirapaka topopaa ngana anu nombajagai kita sampe makava i Yesus Kristus, ala kita majadi manoa ri panggita nu Alatala sabana pomparasayata i Kristus.

Galatia 3:8

Lako ri lamba pamulana Alatala nonia ala tona ledo toYahudi majadi manoa ri panggitaNa sabana pomparasayara. Jadi kareba nabelo haitu nipopaisaniNa nokolu ka i Abraham, evamo nitulisi ri Buku Gasa ivei: “Pura-pura manusia ri dunia manggava belo lako nte Yaku sabana komiu.”

Efesus 5:26

PatujuNa ala kita majadi todea nu Alatala. NipegasaNa kita nadosa sabana kita nomparasaya tesaNa bo kita nidiu nte uve tandana kita topangoseaka Ia.

Efesus 5:8

Komiu mboto natuvu ri kalandana bara ipia, tapi sii-sii komiu natuvu ri karemena sabana komiu nosangu rara ante i Pue. Jadi komiu kana matuvu ante pokainggu masipato ka tona anu natuvu ri karemena.

2 Tesalonika 2:13

Jadi, sampesuvu-sampesuvu nipotove i Pue, masipato kami masaro manguli tarima kasi ka Alatala sabana komiu. Sabana, Alatala nompelisi komiu lako ri ulu jadi ala komiu rapakasalamaNa. Komiu nipakasalama ante kuasa Nosa Gasa anu nombabaliki komiu majadi todea gasa nu Alatala, bo komiu nipakasalama sabana pomparasayamiu pepatuduki nakana.

Ibrani 10:22

Jadi kita kana metupu nte Alatala ante rarata naliangu bo pomparasayata ledo nolengga-lengga. Apa rara ntaita nipakagasamo ante raa i Kristus, jadi nisanita domo ria salata. Kita nidiu ante uve gasa, tandana kita nipakagasaNamo.

Ibrani 10:29

Ane ivesia pehuku ka tona nombasapuaka Atura agama, nemopa ka tona anu nompojejea Ana nu Alatala. Tona haitu nompandaente raa i Yesus, tano raa haitumo nompakaasa pojanji nu Alatala bo nompakalali dosana. Bo tona haitu muni nanjalai Nosa Gasa anu nompopaisani pepotove nu Alatala ka todeaNa.

Ibrani 2:11

I Yesus nompegasa katuvuta nadosa. Kita anu nipegasaNa bo Ia anu nompegasa kita nosangu Tuama. Haitu sampe i Yesus ledo naeya mataNa nanguli kita sampesuvuNa.

1 Petrus 1:22

Sampesuvu-sampesuvu, katuvumiu nipakagasamiu sabana komiu nangoseaka pepatuduki nakana. Haitumo sampe komiu namala nompotove sampesuvumiu sampomparasaya ante rara naliangu. Sabana haitu, posipotovemo ante rara mpuu-mpuu.

1 Petrus 3:21

Uve oge haitu nirapaka ada pediu anu nompakasalama kita sii-sii. Ada pediu haitu ledo ada pompegasa tapa lako ri karota, tapi tandana kita topangoseaka i Yesus. Ada haitu nireke pojanjita nte Alatala ala kita mangoseaka Ia sabana niampungiNa dosata. Bo niampungiNa mpuu dosata sabana i Yesus natuvu mpanjili lako ri kamateNa.

1 Yohanes 2:12

Yaku notulisi hitu ka komiu, ngana-ngana, sabana dosamiu niampungimo lako ri kamate i Yesus.

Pompakita 1:5

bo lako nte i Yesus Kristus. Iamo sabi anu namala raparasaya, Iamo tona paratama nipakatuvu mpanjili lako ri kamateNa. Iamo nomparenta pura-pura magau riara dunia. Ia nompotove kita bo nombakabasaka kita lako ri dosata ante raa kamateNa.

Pompakita 7:14

Nesanamo yaku, “Tua, ledo nisaniku, komiu nangisanina.” Bo nangulimo ia ka yaku, “Ira gahaitumo tona nipakasalama tempo pepandasa anu nelabi mpuu kadaana. Nitoposira pakeara sampe naramputi ante raa nu Ana Bimba, haitumo, dosara niampungi.