1 Korintus 6:10 - Kaili Ledo

¹⁰ Ivesia muni ante topangangga, tona ledo ria kabasa-basana manggava untu ka karona mboto, tona nanginu sampe nalangu, tona nanjalai-lai roa, bo topeago. Ira muni ledo ntoto manggava bagia riara Poparenta nu Alatala.

1 Korintus 6:10 ပူးပေါင်းရင်းမြစ်များ

Matius 21:19

Ri soso dala nikitaNa sanggayu kayu ara. Jadi hau Ia nanggaparai kayu haitu, tapi nau aga sangu vuana ledo ria nikavaNa, aga tavana bayangi. Jadi niuliNa ka kayu haitu, “Mompamula eo hitu, domo movua iko!” Bo kaliu-liu nalelemo kayu haitu.

Matius 23:13

Tapi mandasa mpuumo komiu guru-guru agama bo toFarisi! Komiu aga nabelo ri sumba tapi nadaa riara. Komiu nombalava tona ntanina majadi todea riara Poparenta nu Alatala. Komiu mboto ledo madota raparenta nu Alatala bo ledo nidekeimiu tona ntanina anu madota raparentaNa.

Matius 23:33

Komiu tona nadaa bo muli ntona nadaa! Nisarumakamiu komiu ledo rapambela pehuku riara narakaa?

Yohanes 12:6

Kakanana ledo tona napakasi nitora i Yudas, tapi aga karona mboto apa ia topelea. Iamo anaguru anu niparasaya nombaboli doira, bo sanggani-sanggani nipeleana doi haitu. Haitu sampe niulina ivesia.

Suro-Suro 20:32

Jadi sampesuvu-sampesuvuku, hitupa yaku nekakai nte Alatala nerapi Iamo mombajagai komiu. Bo kuuli ka komiu, oseakamo tesa nu Alatala anu nompopaisani kabelo nu Alatala ka kita. Aga Iamo nakuasa mompakaroso pomparasayamiu bo mombadekei belo ka komiu, haitumo belo nipakasadiaNa ka tona nipelisiNa majadi todeaNa.

1 Korintus 15:50

Sampesuvu-sampesuvu, iveimo patujuku: karota ri dunia hitu nipovia lako ri isi bo raa. Kita ledo mamala monturo ri Poparenta nu Alatala ri suruga ante karota anu mamate bo mapopo, sabana ri suruga ledo ria kamatea.

Galatia 5:21

Nario matara nte mbara-mbara ntona, ira nanginu sampe nalangu bo nasiromu nangande bo nanginu sampe nabasa, bo nadea muni pokainggu ntanina ivehaitu. Jadi evamo niuliku ka komiu bara ipia, kupopatora ka komiu sangganipa: tona nokainggu ivegahaitu ledo ntoto manggava bagia ri Poparenta nu Alatala.

Efesus 4:28

Topangangga kana menonto mangangga. Ira kana mokarajaa ante palera mboto mompaelo katuvura ala mamala ira mantulungi tona ntanina napepa.

Efesus 5:5

Toramo pakabelo-belo! Tona nosipogau nte tona ledo bereina mboto bo tona nokainggu nabuga ledo ntoto manggava bagia riara Poparenta nu Alatala bo i Kristus. Ivesia muni ante tona nario matana bo ledo ria kabasa-basana, sabana anu niporiona haitu najadi anu nisombana bo haitu nasimbayu kadaana nte topompakande tupu-tupu ntanina.

1 Tesalonika 4:6

Nee movia dosa ka sampesuvumiu sampomparasaya bo nee rabagiu ia ante mangala bereina, sabana Alatala mombahuku pura-pura tona nokainggu ivehaitu. Haitu pura-pura nipatuduki bo nipopatora kami ka komiu bara ipia.

1 Petrus 4:15

Nee sampe maria komiu mombarasai kasusa sabana nepatesi bara nangangga bara novia anu nadaa atau nombagalo urusa ntona ntanina.