1 Korintus 4:5 - Kaili Ledo

⁵ Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

1 Korintus 4:5 ပူးပေါင်းရင်းမြစ်များ

Matius 10:26

“Tapi nau rasalai ntona komiu, nee maeka nte tona mangeva komiu. Apa pura-pura anu nakana, anu nitabuniaka sii-sii kana malanto rakita ngena. Pura-pura rahasia sii-sii kana rasani ntonamo bara maipia.

Matius 24:30

Ri tempo haitu meumba tanda ri langi mompakalanto kakavaKu, Ana nu Manusia. Bo pura-pura manusia ri dunia motumangi ante eka nu rara, ane rakitara Yaku, Ana nu Manusia, manau riara kulimu ante kuasaKu bo kaogeKu nipokumaaka.

Matius 24:46

Mabelo mpuu batua haitu ane tempo madikana manjili lako ri polipana, nipovianamo bago niparasaya ka ia.

Matius 25:21

Nanguli madika, ‘Nabelomo! Komiu batua nabelo, natutu nantui bago anu niparasayaka komiu. Komiu namala niparasaya ante mbara-mbara sakide. Sabana haitu, mbara-mbara nadea kuparasayaka komiu. Kamaimo madamba mosanggani ante yaku.’

Matius 25:23

Nanguli madika, ‘Nabelomo! Komiu batua nabelo, bo natutu nantui bago niparasayaka komiu. Komiu namala niparasaya ante mbara-mbara sakide. Sabana haitu, madea kuparasayaka komiu. Kamaimo madamba mosanggani ante yaku.’

Lukas 6:37

“Nee rapakasalamiu tona ala komiu ledo rapakasala nu Alatala. Nee mompakatantu sala ntona kana rahuku, ala komiu ledo rahuku nu Alatala. Ampungimo tona ntanina ala komiu muni raampungi nu Alatala.

Yohanes 21:22

Nesana i Yesus, “Ane rapana Yaku madota ia matuvu sampe Yaku makava mpanjili ri dunia hitu, haitu ledo paraluu musani. Tapi iko, nee menonto mangoseaka Yaku!”

Yohanes 21:23

Lako rahaitu natolelemo kareba ka topomparasaya i Yesus nanguli anaguru nipotoveNa haitu ledo mamate. Tapi ledo ivesia tesa i Yesus. Ivei niuliNa: “Ane rapana Yaku madota ia matuvu sampe Yaku makava mpanjili ri dunia hitu, haitu ledo paraluu musani.”

Yohanes 5:44

Berimbamo komiu mamala momparasaya Yaku? Apa komiu aga madota rabila nu roa. Ledo nipasimbukumiu manggava pebila nu Alatala Saito-itoNa!

Roma 14:4

Roata haitu batua nu Alatala, ledo batuata. Ledo masipato kita manjalai batua ntona ntanina. Bara makana bara masala batua haitu, haitu urusa nu tuana mboto, ledo urusata. Bo tona nangande mpengaya-ngaya kandea haitu tantu rareke nakana sabana Tupu nakuasa nombatulungi ia novia anu nakana.

Roma 2:1

Jadi sampesuvu-sampesuvu, ane komiu nompakasala tona ntanina, ledo mamala raulimiu <> Apa pokainggumiu mboto nasimbayu nte pokainggura. Jadi ane komiu nompakasala tona ntanina, batuana komiu nompakasala karomiu mboto.

Roma 2:16

Jadi, ivesiamo majadi ri Eo Potangara. Nangoseaka Kareba Belo anu nipatoleleku, ri Eo Potangara Alatala mombatudu i Yesus Kristus mombatangara pura-pura anu nitabuniaka riara ntai nu manusia.

Roma 2:29

Tapi toYahudi anu mpuu-mpuu todea nu Alatala, haitumo tona mpuu-mpuu rarana nangoseaka Alatala. Bo tona mpuu-mpuu nisuna, nisuna riara ntaira. Batuana, ira najadi todea nu Alatala sabana pokarajaa Nosa Gasa nu Alatala riara ntaira, ledo sabana pangoseakara atura-atura nitulisi. Tona ivehaitu ratoiya nu Alatala, nau ledo nitoiya nu manusia.

Roma 2:7

Sanu tona ledo nasau rarara nokainggu nabelo sabana ira madota ratoiya bo rabila nu Alatala, bo madota manggava katuvu nabelo anu ledo maupu-upu. Bo Alatala mombadekei katuvu nabelo sampe ri kasae-saena ka tona gahaitu.

1 Korintus 1:7

Jadi, ledo ntoto nakura pompakule nidekei nu Nosa Gasa ka komiu sii-sii, komiu ranja nantongoraka peonga nTuputa i Yesus Kristus mpanjili ri dunia.

1 Korintus 11:16

Ane maria tona madota mosinjanaika pepatuduki hitu, aga sangaya kuuli ka ira: Ledo ria kabiasa ntanina nioseaka kami bo pura-pura todea topomparasaya Alatala.

1 Korintus 11:26

Apa nggani-nggani komiu mangande roti bo manginu uve anggur hitu, komiu mompatolele kareba kamate i Pue Yesus sampe Ia makava mpanjili ri dunia hitu.

1 Korintus 15:23

Tona namatemo kana rapakatuvu mpanjili nangoseaka sunjuna nipakatantu. I Kristus tona pamulana nipakatuvu mpanjili. Bo maliu haitu tona nosangu rara nte Ia rapakatuvuNa mpanjili tempo Ia makava mpanjili ri dunia.

1 Korintus 3:13

Rapana ane mapapu banua, tantu pareva nabelo nipake novia banua haitu maboli, tapi pareva ledo nabelo mapapu puramo. Ivesia muni ante pokarajaa ntopokarajaa ka Alatala. Kabelo nu pokarajaara saito-saito kana rapakalanto bara maipia tempo i Yesus makava mpanjili ri dunia. Pokarajaara haitu rauji nu Alatala ala malanto pokarajaara haitu bara mabelo bara ledo.

1 Korintus 3:14

Ane nabelo pokarajaara rakita nu Alatala, topokarajaa haitu manggava tambo lako nte Alatala.

1 Korintus 3:8

Topotuda bo topodundusi nasimbayu, bo ira simbo mantarima tambo nangoseaka kantamo pokarajaara mboto.

2 Korintus 10:18

Sabana, tona nipokono nu Alatala ledo topantoiya karona mboto tapi tona nitoiya nu Alatala.

2 Korintus 10:9

Patujuku ledo momparangga komiu ante suraku.

2 Korintus 4:2

Tapi ane kami, kami domo nangoseaka pokainggu nadaa anu nepakaeya. Kami ledo nebagiu bo ledo nantenggoaka Tesa nu Alatala. Alatala sabi kami bo nikitaNa kami aga nompatolele anu nakana ala rasani ntodea kami namala raparasaya.

2 Korintus 5:10

Apa kita pura-pura kana mantingayo i Kristus bara maipia ala ratangaraNa. Maupu ratangaraNa, simbo rakavata anu nipakatantu nangoseaka anu nipoviata tempo kita natuvu ri dunia hitu, bara povia nabelo bara povia nadaa.

1 Tesalonika 5:2

Apa nisanimiu mboto kakava i Pue Yesus bara maipia masimbayu mpo kakava ntopangangga bongina tempo ledo nisani-sani ntona.

Ibrani 4:13

Nau aga sangaya anu nipajadi nu Alatala, ledo ria sangua ledo nikitaNa. Pura-pura nalanto nikitaNa. Bo kita kana mompangaku pura-pura pokaingguta ka Ia bara maipia.

Yakobus 4:11

Sampesuvu-sampesuvu, nee mosisalai. Isema-sema nanjalai bo nompakasala roana sampomparasaya, ia nanjalai bo nompakasala atura nu Alatala. Ane komiu mompakasala atura nu Alatala, natantumo komiu ledo topangoseaka atura, tapi topotangara atura haitu.

Yakobus 5:7

Sampesuvu-sampesuvuku, komiu kana mosabara sampe makava Tupu. Peintamo posabara ntopotuda, ira nompopea sampe naria vuana nisarumakara. Ira nosabara nompopea uda anu mompakatuvu tuda-tudara.

Yakobus 5:9

Nee mongalu bo mosipakasala, ala komiu ledo rahuku nu Alatala. Toramo! Domo masae makavamo Ia mombatangara manusia.

1 Petrus 1:7

Patuju nu pesori-pesori haitu ala rasani kaliangu pomparasayamiu. Bulava nigonu ante apu ala rasani bara maria galona bara ledo. Pomparasayamiu noalipa pade bulava anu namala magero. Jadi pomparasayamiu kana rapesori muni ante mpengaya pesori. Bo ane pomparasayamiu mpuu-mpuu maliangu, komiu ratoiya bo rabila bo rapakaoge tempo i Yesus Kristus makava mpanjili ri dunia.

1 Petrus 5:4

Bo tempo i Kristus, Topoevu Nopoko, makava mpanjili ri dunia, radekeiNa ka komiu tambo, haitumo bagia ri kuasaNa bo kaogeNa anu ledo maupu-upu.

2 Petrus 3:12

Apa kita hii nantongoraka Eo Potangara nipakatantu nu Alatala. Jadi kita kana mompasimbuku matuvu magasa ala Eo haitu masalisa makava. Ri Eo haitu langi maropu rakande nu apu bo pura-pura anu naria ri langi magonu ante kapanena.

2 Petrus 3:4

bo manguli, “I Yesus nojanji makava mpanjili ri dunia. Tapi ledo ria nakava. Tantu ledo majadi, sabana lako ri tempo kamate ntotuata nggaulu sampe sii-sii, dunia hitu ledo nabali-bali. Pura-pura bate-batena nasimbayu lako ri lamba pamulana tempo dunia nipajadi sampe sii-sii.”

Yudas 1:14

I Henokh, muli kapitu-ntapina lako nte i Adam, nombaboto pehuku nu Alatala ka guru-guru mpodava gahaitu ivei: “Epemo! Tupu makava bara maipia ante monjobu-njobu malaekaNa

Pompakita 1:7

Peintamo! Ia makava nibungu kulimu. Ia rakita ntona pura-pura, nau ira anu nombatosu usuNa. Bo pura-pura valaa manusia ri dunia motumangi mpojea manggita Ia. Haitu mpuu-mpuu majadi! Amin!

Pompakita 20:12

Bo nikitaku tona namate neangga ri ngayo Gadera haitu, haitumo, tomaoge bo tona biasa, tona namate nalodo rantasi, tona ntanina anu namate janjina, pura-pura tona lako ri ponturo ntomate. Ira pura-pura neangga ri ngayo Gadera Kamagaua nu Alatala haitu. Bo buku-buku nitimpamo bo niparesa. Riara buku-buku haitu nitulisi pura-pura pokainggu ntona namate. Jadi pehuku ka ira nipakatantu nangoseaka pokainggu-pokainggura nitulisi riara buku-buku. Bo naria buku ntanina nitimpa muni anu niuli Buku Katuvua.