1 Korintus 4:4 - Kaili Ledo

⁴ Nabula raraku. Pangisaniku mboto, ledo naria anu masipato rapakasala riara nggatuvuku. Tapi ledo kabula raraku hitu mompakatantu yaku manoa ri panggita nu Alatala. Aga i Pue Yesus mamala mombabotusi bara nasala yaku bara ledo.

1 Korintus 4:4 ပူးပေါင်းရင်းမြစ်များ

Yohanes 21:17

Bo i Yesus nekutana vai katalu-ngganina, “Simon, ana i Yohanes, nipotovemu mpuumo Yaku?” Nangepe haitu, nasusa mpuumo rara i Petrus, sabana talu-ngganimo i Yesus nompekutana ia. Jadi nesana i Petrus, “Pue, nisaniMiu mpengaya-ngaya. NisaniMiu nipotoveku Komiu.” Nanguli i Yesus, “Ane ivesia, piaramo bimba-bimbaKu.

Suro-Suro 23:1

Nakava sumai, nikanoto i Paulusmo toPolibu Mbaso Agama bo niulina, “Sampesuvu-sampesuvuku. Sampe ri eo hitu, yaku natuvu nanoa, nagasa ri panggita nu Alatala.”

Roma 2:13

Apa ledo topangepe Atura agama nanoa ri panggita nu Alatala, tapi topangoseaka Atura haitu nireke nu Alatala nanoa.

Roma 4:2

Ane rapana i Abraham nireke nanoa sabana pokaingguna nabelo, mamalamo ia mantoiya karona mboto. Tapi ledo namala ia mantoiya karona ivesia ri ngayo nu Alatala,

1 Korintus 4:3

Jadi bara maria nte komiu tona madota momparesa pokarajaa kami bo mompakatantu bara mabelo bara ledo. Tapi yaku hii, ledo kupeili bara komiu bara tona ntanina mombatangara yaku. Ledo muni kutangara karoku mboto.

1 Korintus 4:5

Jadi nee komiu masalisa mompakatantu sala ntona ane dopa nakava tempona. Popea sampe i Pue Yesus makava mpanjili ri dunia. Iamo mompakalanto pura-pura anu nitabuniaka ri kalandana sii-sii. Iamo mompakalanto mpengaya-ngaya patuju nitabuniaka riara ntai manusia. Ri tempo haitu, Alatala mombatoiya isema-sema masipato ratoiyaNa.

2 Korintus 1:12

Nadamba mpuu rara kami apa nisani kami nabula rara kami. Kami nasaro nokainggu nanoa nte tona pura-pura, nelabipa nte komiu. Pura-pura anu nipovia kami, ledo ria nuapa-nuapa nitabuniaka kami. Patuju kami nanoa, nangoseaka dota nu Alatala. Pokainggu kami ledo nangoseaka kapande nu manusia, tapi nangoseaka pompakule nidekei nu Alatala.

2 Korintus 5:10

Apa kita pura-pura kana mantingayo i Kristus bara maipia ala ratangaraNa. Maupu ratangaraNa, simbo rakavata anu nipakatantu nangoseaka anu nipoviata tempo kita natuvu ri dunia hitu, bara povia nabelo bara povia nadaa.