1 Korintus 3:10 - Kaili Ledo

¹⁰ Yaku hii mpo topande novia banua. Lako ri kabelo rara nu Alatala, nianggatakaNa bo nipopompakuleNa yaku novia pandasi banua, bo tona ntanina nombabangu banua ri bavo nu pandasi haitu. Tapi simbo rabanguna pakabelo-belo.

1 Korintus 3:10 ပူးပေါင်းရင်းမြစ်များ

Matius 24:45

“Rapana naria batua anu nanoto bo natutu neoseaka, iamo raanggataka nu madikana majadi topompasiayu pura-pura batua ntanina riara nu banua. Iamo mompasiayu kandea ka batua-batua ntanina eo-eo.

Matius 7:24

“Jadi isema-sema mangepe tesaKu bo mangoseakana, ia nasimbayu ante topande novia banuana ri bavo vatu.

Lukas 11:35

Jadi, pakabelo-belo! Nee sampe pekiri rara ntaita majadi malanda.

Lukas 21:8

Nesana i Yesus, “Pakabelo-belo! Nee sampe komiu rabagiu. Madea ngena tona makava mompobalu sangaKu. Raulira iramo ‘Magau Topepakasalama.’ Bo raulira muni, nakavamo kaupu nu dunia! Tapi nee raoseakamiu tesara.

Suro-Suro 18:27

Naliu haitu, i Apolos nonia hau ri propinsi Akhaya. Jadi topangoseaka i Yesus ri ngata Efesus nantulungi ia bo nompakatu sura ka topomparasaya ri propinsi Akhaya ala ira madota mantarima i Apolos sumai. Nadea tona ri propinsi Akhaya najadi topangoseaka i Yesus sabana kabelo nu Alatala, bo pepatuduki i Apolos mpuu-mpuu nantulungi ira.

Roma 1:5

Alatala nabelo raraNa nte yaku bo yaku nipajadiNa suroNa sabana i Yesus. Yaku niposuroNa mompatolele Kareba Belo ka tona ri umba-umba ri dunia bo manggeniaka ira momparasaya bo matundu nte i Yesus, ala Ia rabila bo rapakaoge

Roma 12:3

Lako ri kabelo rara nu Alatala, yaku nianggatakaNa majadi suroNa. Jadi sia sampe kuuli ka komiu pura-pura, Nee rapekirita karota mboto naoge ane ledo ivesia kakanana. Kita kana manoa bo manoto mompekirika karota mboto, nangoseaka suka pomparasaya nibagi nu Alatala ka kita saito-saito.

Roma 15:15

Tapi naupa ivesia, nabia yaku notulisi bara sako-ngaya ka komiu pangane. Patujuku mompopatora komiu, sabana haitumo pokarajaa nidekei nu Alatala ka yaku lako ri kabelo raraNa.

Roma 15:20

Riara pokarajaaku haitu yaku bate-batena nompasimbuku nompatolele Kareba Belo ka tona anu dopa niepera sanga i Kristus. Yaku ledo madota mombangu banua ri bavo pandasi nipovia ntona ntanina.

1 Korintus 3:11

Apa pandasi anu nipovia mamimo, haitumo i Yesus Kristus. Ledo ria pandasi ntanina.

1 Korintus 9:2

Nau ri panggita ntona ntanina yaku ledo nireke suro i Pue Yesus, natantu kana rarekemiumo yaku suroNa mami! Pomparasayamiu i Pue Yesusmo nompakalanto yaku hii mpuu-mpuu suroNa.

2 Korintus 10:15

Naria sanu tona nalanga rarana nangoe kabelo asele pokarajaara, tano mai aga asele pokarajaa ntona ntanina. Tapi ledo ivesia kami. Kami ledo nangoe karo kami mboto notesa pokarajaa anu ledo pokarajaa nidekei nu Alatala ka kami. Kami nanjarumaka ane pomparasayamiu mantambai karosona, mantambaipa muni kadeana asele pokarajaa kami nte komiu.

Efesus 2:20

Kita topomparasaya i Kristus nirapaka gana-gana nu banua nibangu nu Alatala. Suro-suro i Kristus bo nabi-nabi nirapaka pandasi nu banua haitu. I Yesus Kristus nirapaka vatu nu pandasi anu nelabi nopoko.

Kolose 1:29

Haitumo sampe yaku nokarajaa ntamo, yaku mpuu-mpuu nompasimbuku nokarajaa ante kuasa nidekei i Kristus, apa kuasaNa riara nggatuvuku mpuu-mpuu naroso.

Kolose 4:17

Bo ulika i Arkhipus ivei: “Pakaupumo pokarajaa nidekei nu Alatala ka iko!”

1 Tesalonika 3:2

bo i Timotius sampesuvuta sampomparasaya nitudu kami tuou nte komiu. I Timotius roa kami nokarajaa ka Alatala. Ia nantulungi kami nompatolele Kareba Belo anu notesaki i Kristus. Ia nitudu kami tou mompakadidi raramiu bo mompakaroso pomparasayamiu

1 Timotius 4:16

Jagaimo pokainggumu bo jagai muni pepatudukimu. Iko kana matutu movia pura-pura anu nipatudukiku ka iko. Apa ane mupovia ivesia, iko mboto rapakasalama bo topangepe pepatudukimu muni rapakasalama.

2 Timotius 2:15

Tapi iko kana mompasimbuku mpuu-mpuu mokarajaa mabelo ala madamba rara nu Alatala bo rarekeNa iko masipato mokarajaa ka Ia. Pasimbukumo ala ledo maeya matamu manggita pokarajaamu tapi mupatuduki tesa nakana lako nte Alatala ante kakana-kanana.

Yakobus 3:1

Sampesuvu-sampesuvuku, nee madea komiu madota majadi guru agama, apa nisanimiu mantamopa potangara nu Alatala ka guru pade ka tona ntanina.

1 Petrus 4:11

Jonjona, isema-sema nidekeika pompakule mompasimbayu Tesa nu Alatala kana motesa mpo tona niposumba nu Alatala mboto. Isema-sema nidekeika pompakule mantulungi tona ntanina, kana mantulungi ante karoso nidekei nu Alatala ka ia. Pakemo pompakule-pompakule haitu ala nau damo nuapa majadi, Alatala ratoiya bo rabila sabana anu nipovia i Yesus Kristus ri katuvumiu. Alatalamo nakuasa bo masipato ratoiya bo rabila sampe ri kasae-saena. Amin!

2 Petrus 3:15

Toramo, posabara nTupu nombadekei loga ka manusia rapakasalama. Ivesia muni nitulisi nu sampesuvuta i Paulus nipotoveta. Surana haitu nitulisina nangoseaka noto nidekei nu Alatala ka ia.

Pompakita 21:14

Tembo ngata haitu nipopeangga ri bavo sapulu rolonta vatu pandasi bo ri vatu pandasi haitu naria nitulisi sanga sapulu randua suro nu Ana Bimba.

Pompakita 21:19

Vatu-vatu pandasi ngata haitu nivera ante sapulu rongaya vatu nasuli alina, salonta sangaya muni vatuna. Lonta pamulana nivera ante vatu yaspis navoe bo nevayo mpo kaca. Lonta karanduana nivera ante vatu nilam anu nagavu mpo uve ntasi nandala. Lonta katataluna nivera ante vatu mirah naputi bo nevayo. Lonta kaampana nivera ante vatu zamrud nosura mpo pae.