1 Korintus 2:14 - Kaili Ledo

¹⁴ Tona nangoseaka dotana mboto bo ledo naria Nosa Gasa nu Alatala nte ia, ledo nitarimana pepatuduki lako nte Nosa Gasa sabana nirekena pepatuduki haitu aga tesa ntodoyo. Ledo nipakulena mombapaha batuana sabana pepatuduki haitu aga namala rapaha ntona ante pekeniaka Nosa Gasa.

1 Korintus 2:14 ပူးပေါင်းရင်းမြစ်များ

Matius 16:23

Tapi i Yesus neili bo nanguli ka ia, “Palaimo lako ri sii, Magau Seta! Iko, Petrus, aga nombabonto Yaku ala ledo Kuoseaka dota nTuamaKu! Pekirimu tutu pekiri nu manusia, ledo pekiri lako nte Alatala!”

Yohanes 10:20

Nadea ira nanguli, “Ia haitu nipesua nu seta! Nagila ntotomo Ia! Rapokuya raepeta tesaNa?”

Yohanes 12:37

Naupa nadeamo kabaraka nipoviaNa ri ngayora, ledo niparasayara Ia.

Yohanes 14:17

Topetulungi haitumo Nosa Gasa nu Alatala anu mompopaisani anu nakana ka komiu. Tona ri dunia hitu anu ledo nomparasaya, ledo mamala mantarima Ia sabana ledo nikitara Ia bo ledo nosisani ante Ia. Tapi komiu nosisani ante Ia sabana Ia nosanggani-nggani ante komiu sii-sii, bo domo masae Ia monturo riara ntaimiu.

Yohanes 14:26

Tapi ane Nosa Gasa nu Alatala makava, rapatudukiNa ka komiu mpengaya-ngaya bo rapopatoraNa ka komiu pura-pura anu nitesaKu ka komiu. Apa Iamo Topetulungi anu ratudu nTuamaKu manjambei Yaku.

Yohanes 15:26

Kutudu Topetulungi lako nte TuamaKu tumai nte komiu, haitumo Nosa Gasa nu Alatala anu mompopaisani anu nakana. Tempo makava Ia, Iamo mompopaisani Yaku ka komiu.

Yohanes 5:44

Berimbamo komiu mamala momparasaya Yaku? Apa komiu aga madota rabila nu roa. Ledo nipasimbukumiu manggava pebila nu Alatala Saito-itoNa!

Yohanes 8:43

Natantumo ledo nipahamiu tesaKu sabana ledo nipokonomiu mantarima pepatudukiKu.

Suro-Suro 16:14

Naria saito mombine ri sia lako ri ngata Tiatira nosanga i Lidia. Ia topobalu kae nosura sese mpalola, anu nasuli mpuu alina. Ia nombasomba Alatala mamimo. Tempo niepena tesa i Paulus, Alatala nompakanoto rarana sampe nitarimana pepatuduki haitu.

Suro-Suro 17:18

Nosinjula tesa muni ia nte guru-guru anu nangoseaka pepatuduki i Epikuros bo guru-guru nangoseaka pepatuduki anu niuli Stoa. Bara sako-ndua guru-guru haitu nosisanai ante i Paulus. Naupu sia, naria sanu nanguli, “Nuapa nisani ntona moitu? Pangisanina aga sakide, tapi tesana nadea!” Bo naria tona ntanina nanguli, “Ia bara madota mompopaisani viata-viata nisomba ntosangatana ka kita!” Niulikara ivesia apa i Paulus notesa i Yesus, bo nitesana muni tona natuvu mpanjili lako ri kamatena.

Suro-Suro 17:32

Tempo todea nangepe tesa tomate natuvu mpanjili lako ri kamatena, naria sanu ira nompongirika i Paulus, sabana ledo niparasayara tomate mamala matuvu mpanjili. Tapi naria muni sanu nanguli, “Kami da madota mangepe hanupa tesamu tutu!”

Suro-Suro 18:15

Tapi haitu aga posisala panggava ka tesa-tesa bo sanga-sanga bo atura-atura agamamiu mboto! Kana rapasiayumiu mboto. Yaku hii ledo mombatangara parakara ivehitu!”

Suro-Suro 25:19

Ira aga nosisala panggava ka agamara mboto, bo muni ka saito tona nosanga i Yesus. Tona haitu namatemo, tapi i Paulus nanguli Ia natuvu mpanjili.

1 Korintus 1:18

Kami nompatolele kareba kamate i Kristus ri kayu salib nombasompo dosa manusia. Ane tona damo kapesuana ri narakaa nangepe kareba haitu, niulira tesa ntodoyo, ledo ria batuana. Tapi kita anu nipakasalama, nisanita kamate i Kristus nompopakita kuasa nu Alatala mboto!

1 Korintus 1:21

Alatala napande mpuu, bo nipakatantuNa manusia ledo mamala mosisani ante Ia ane aga manjarumaka kapandera mboto. Tapi nibotusiNa mompakasalama isema-sema momparasaya Kareba Belo nipatolele kami. Tano mai tona ri dunia nanguli Kareba haitu aga tesa ntodoyo.

1 Korintus 1:23

Tapi kami aga nompatolele Kareba kamate i Kristus ri kayu salib. KamateNa haitu nompakadua rara ntoYahudi, bo nireke ntoYunani aga tesa ledo ria gunana.

1 Korintus 1:25

Apa kareba kamate i Kristus, anu nireke manusia ledo ria gunana, haitumo nompopakita kapande nu Alatala. Bo kapande nu Alatala neliupa pade kapande nu manusia. Panguli nu manusia, kamate i Kristus aga nompopakita kalente nu Alatala, tano mai anu niuli kalente nu Alatala haitu, nakuasapa pade pura-pura kuasa nu manusia.

1 Korintus 15:44

Karobata anu nitana, karo manusia biasa lako ri dunia hitu. Tapi ane rapakatuvu mpanjili, karo haitu majadi karo masipato matuvu ri suruga. Naria karo manusia biasa, bo naria muni karo masipato matuvu ri suruga.

1 Korintus 15:46

Anu najadi nokolu ledo karo anu masipato monturo ri suruga, tapi karo manusia biasa. Karo anu masipato monturo ri suruga najadi ri puri.

1 Korintus 2:12

Ledo kapande lako ri dunia hitu nitarimata, tapi Nosa Gasa nu Alatala nitarimata ala rasanita pura-pura anu nidekei nu Alatala ka kita lako ri kabelo raraNa.

1 Korintus 3:1

Sampesuvu-sampesuvu, tempo yaku naria nte komiu, ledo nitesaku ka komiu nasimbayu mpo nitesaku ka tona nikuasai Nosa Gasa nu Alatala. Tapi nitesaku ka komiu nasimbayu mpo nitesaku ka tona anu da nangoseaka dota rarara nadaa bo ledo naria Nosa Gasa, apa pomparasayamiu i Kristus dopa naroso. Komiu da mpo ngana kodi.

Yakobus 3:15

Noto pompekiri ivehaitu ledo nopuna lako nte Alatala, tapi aga nopuna lako ri dunia nadaa hitu, lako ri dota rarata nadaa, bo lako ri seta-seta.

1 Yohanes 2:20

Tapi nitarimamiumo Nosa Gasa nu Alatala, anu nipopanau i Yesus Kristus. Haitu sampe komiu pura-pura nangisani pepatuduki nakana.

1 Yohanes 2:27

Tapi kakanana domo paraluu tona ntanina mompatuduki komiu, sabana nitarimamiumo Nosa Gasa anu nipopanau i Kristus. Bo Nosa Gasa haitumo naroo riara ntaimiu bo nompatuduki ka komiu pura-pura anu paraluu rasanimiu. PepatudukiNa haitu nakana pura, ledo naria dava. Sabana haitu, komiu kana maroo matuvu mosangu rara nte i Kristus nangoseaka anu nipatuduki Nosa Gasa ka komiu.

1 Yohanes 5:20

Nisanita muni i Yesus, Ana nu Alatala, nakava ri dunia hitu mompakanoto rarata ala kita mamala mosisani belo ante Alatala anu nakana. Kita natuvu nosangu rara nte Alatala anu nakana sabana kita natuvu nosangu rara nte AnaNa, i Yesus. Iamo Alatala anu nakana bo Iamo nombadekei katuvua nabelo sampe ri kasae-saena.

Yudas 1:19

Tona haitumo nompakagero kasintuvu ntopomparasaya. Ira nikuasai dota-dota rarara nadaa, bo Nosa Gasa nu Alatala ledo ntoto naria nte ira.