1 Korintus 16:16 - Kaili Ledo

¹⁶ pekoumo nte tona ivehaitu bo nte pura-pura tona nokarajaa ntamo nosanggani-nggani nte ira nantulungi todea topomparasaya.

1 Korintus 16:16 ပူးပေါင်းရင်းမြစ်များ

Roma 16:12

Pakavote muni tabeku ka i Trifena bo i Trifosa. Randua mombine haitu nokarajaa ntamo ka Tupu. Bo pakavote tabeku ka i Persis anu nipotoveta. Ia muni mombine anu nokarajaa ntamo ka Tupu.

Roma 16:3

Pakavote tabeku ka i Priskila bo i Akwila. Ira njamboko roaku sampokarajaa nanggeni Kareba Belo i Yesus Kristus.

Roma 16:6

Bo pakavote muni tabeku ka i Maria. Ia nokarajaa ntamo ka komiu.

Roma 16:9

Pakavote tabeku ka i Urbanus, roata sampokarajaa nompatolele Kareba i Kristus. Bo pakavote tabeku ka i Stakhis nipotoveku.

1 Korintus 12:28

Ri tatangamiu sampomparasaya, Alatala nanganggataka tona mantui mpengaya-ngaya bago. Pamulana naria tona nianggatakaNa majadi suroNa. Bo karanduana, naria tona nianggatakaNa majadi nabi mompasimbayu tesa nitarimana lako nte Alatala. Katataluna, naria anu nianggatakaNa majadi guru. Bo naria muni nidekeikaNa pompakule movia kabaraka. Naria nidekeikaNa pompakule mompakabelo dua-dua ntona. Naria nidekeikaNa pompakule mantulungi tona ntanina, naria nidekeikaNa pompakule manggeniaka todea, bo naria nidekeikaNa pompakule motesa basa-basa anu nopuna lako ri Nosa Gasa.

1 Korintus 3:9

Apa kami bo i Apolos nosampokarajaa ante Alatala, bo komiumo nirapaka talua nu Alatala. Komiu muni nirapaka banua nu Alatala.

Efesus 5:21

Pekoumo nte roamiu ntanina sampomparasaya sabana komiu nombabila i Kristus.

Filipi 4:3

Bo kuperapi muni nte vega rapaku i Sunsugos, tulungimo mombine randua pangane ala ira mosangu rara mpanjili. Ira nokarajaa ntamo ante yaku nompatolele Kareba Belo nasimbayu mpo i Klemens bo roa-roaku ntanina sampokarajaa. Sangara nitulisi riara Buku Katuvua, anu nompakatantu isema masipato matuvu mabelo sampe ri kasae-saena.

1 Tesalonika 2:9

Sampesuvu-sampesuvu, natantu da nitoramiu pompasimbuku kami bo kasusa kami bara ipia. Eo bongi kami nompasimbuku nokarajaa nompaelo mboto ala komiu ledo masesa mompekirika katuvu kami tempo nompatolele Kareba Belo nu Alatala ka komiu.

1 Tesalonika 5:12

Sampesuvu-sampesuvuku, kami merapi komiu mombabila pakeni-pakeni anu nokarajaa ntamo ri tatangamiu, haitumo ira anu nipelisi nu Alatala manggeniaka komiu bo mompatuduki komiu.

1 Timotius 5:17

Pakeni ntodea topomparasaya anu nabelo pekeniakara, masipato rabila ronggani kadeana pade tona ntanina, nelabipa ira anu nompasimbuku mpuu nompatuduki bo nompatolele Tesa nu Alatala.

Ibrani 13:17

Oseakamo parenta-parenta nu pakeni-pakenimiu bo pekoumo nte ira, sabana iramo nombajagai pomparasayamiu. Makava tempona bara maipia ira kana manguli pakalanto ri ngayo nu Alatala berimbana komiu nikeniakara. Jadi pekoumo nte ira ala ira mamala mantui pokarajaa haitu ante damba nu rara. Ane komiu ledo mekou, aga masusa rarara bo haitu ledo manggeni belo ka komiu.

Ibrani 13:24

Pakavote tabe kami ka pura-pura pakenimiu bo ka pura-pura todea nu Alatala ri situ. Bo tarimamo tabe lako nte sampesuvuta sampomparasaya ri propinsi Italia.

Ibrani 6:10

Alatala ledo natenggo raraNa, Ia ledo malinga raraNa ante poviamiu bo pepotovemiu. Nipopakitamiu tovemiu ka Ia tempo komiu nombatulungi sampesuvumiu sampomparasaya, nompamula lako ri nggauluname sampe sii-sii.

1 Petrus 5:5

Ivesia muni komiu da namuda. Komiu kana mekou nte totua. Bo komiu topomparasaya pura-pura kana mompakaede raramiu bo mositulungi. Apa nitulisi riara Buku Gasa: “Alatala nangeva tona nalanga rarana, tapi nipoasiNa tona naede rarana.” Amsal 3:34

3 Yohanes 1:8

Jadi, masipato kita topomparasaya mombatulungi ira, bo ane nitulungita ira, nasimbayu mpo niporoata muni ira nompatolele pepatuduki nakana lako nte Alatala.

Pompakita 2:3

Komiu mpuu-mpuu nosabara. Komiu nipandasa ntona sabana pomparasayamiu, bo ledo naupu raramiu nangoseaka Yaku.