1 Korintus 14:3 - Kaili Ledo

³ Tapi ane tona nompasimbayu tesa nu Alatala, ia notesa ka manusia bo tesana haitu nompakaroso rara roa ntanina bo nompakadidi rarara, bo nompakavoe rarara.

1 Korintus 14:3 ပူးပေါင်းရင်းမြစ်များ

Lukas 3:18

Ivesiamo i Yohanes nompatuduki tona bo mpengaya-ngaya pepatuduki nipakena tempo nompatolele Kareba Belo.

Suro-Suro 13:15

Naupu nibaca sanggoto lako ri Buku Atura Agama bo Buku Nabi-nabi, pakeni-pakeni ri banua petupu haitu nantudu tona hau mompekutana i Paulus nte roana, “Sampesuvu-sampesuvu, ane maria tesamiu mompakaroso pomparasaya ntodea gahitu, radekei kami loga ka komiu motesa ka kami.”

Suro-Suro 14:22

Ri ngata-ngata haitu ira nompakaroso rara ntopangoseaka i Yesus bo nompopatora ira nee molengga-lengga momparasaya. Niulira, “Kita kana mombarasai kasusa bo kapari ruru pade mamala kita mombarasai kasana ri Poparenta nu Alatala.”

Suro-Suro 15:32

Naliu haitu, i Yudas bo i Silas nasae notesa nte topomparasaya ri Antiokhia ala mompakadidi rarara bo mompakaroso pomparasayara, apa ira randua nabi anu nompakule mompasimbayu tesa nidekei nu Alatala ka ira.

Suro-Suro 4:36

Ivesia muni nipovia i Yusuf. Nipobaluna tanana bo doi haitu nikenina bo nidekeina ka suro-suro i Yesus. I Yusuf haitu toLewi lako ri levuto Siprus. Suro-suro nombadae ia i Barnabas, batuana, “topompakavoe rara ntona.”

Suro-Suro 9:31

Jadi todea topangoseaka i Yesus ri njumangu bagia Yudea, Galilea bo Samaria domo nipandasa. Kasae-sae kadea-dea tona nomparasaya i Yesus, bo todea topomparasaya nantambai karoso pomparasayara sabana ira natundu nte Alatala, bo sabana Nosa Gasa nantulungi ira.

Roma 12:8

Isema-sema nidekeika pompakule mompakaroso rara ntona ntanina, kana rapakarosona mpuu-mpuu. Isema-sema nidekeika pompakule mombadekei anu naria nte ia ka tona ntanina, kana radekeina ante joi rarana. Isema-sema nidekeika pompakule manggeniaka todea, kana rakeniakana ira ante rarana mpuu-mpuu. Isema-sema nidekeika pompakule mompoasi tona nandasa, kana rapoasina ante damba rarana.

Roma 14:19

Haitu sampe kita kana mompasimbuku matuvu mosinggabelo ante roata, bo mosipakaroso rara.

Roma 15:2

Kita masipato movia anu manggeni belo ka roata bo mompakasana rarana, ala mompakaroso pomparasayana.

1 Korintus 10:23

Yaku namala novia nuapa-nuapa nipodotaku, tapi ledo pura-pura nanggeni belo ka yaku. Yaku namala novia nuapa-nuapa nipodotaku, tapi ledo pura-pura mompakaroso rara ntodea topomparasaya.

1 Korintus 14:12

Jadi ivesia muni komiu. Ane komiu mompake basa nopuna lako nte Nosa Gasa, tantu ledo rasani nu roa batuana. Komiu mpuu-mpuu madota manggava pompakule lako nte Nosa Gasa nu Alatala. Tapi aginapa komiu merapi Tupu mombadekei ka komiu pompakule mantulungi topomparasaya bo mompakaroso pomparasayara.

1 Korintus 14:17

Nau posambayata haitu mabelo mpuu, tapi ledo ria gunana ka tona ntanina, sabana pomparasayana ledo nipakaroso nangepe posambayata.

1 Korintus 14:26

Jadi sampesuvu-sampesuvuku, nuapa rapoviata? Ivei: ane kita masiromu mombasomba Alatala, saito-saito simbo maria bagiana. Sanu tona modade, sanu mompatuduki, sanu mompakalanto tesa nitarimana lako nte Alatala. Sanu tona motesa riara basa-basa nopuna lako nte Nosa Gasa, bo tona ntanina mombabatuasi tesa-tesa haitu ala rasani ntodea batuana. Pura-pura anu nipoviamiu haitu kana rapovia ala mompakaroso pomparasaya ntodea.

1 Korintus 14:31

Ane ivesia, komiu pura-pura mamala mompasimbayu tesa nu Alatala mosimpaleliu saito-saito ala pura-pura topomparasaya mamala rapatuduki bo rapakaroso.

1 Korintus 8:1

Kapolana, nipekutanamiu kandea nipakande ka tupu-tupu ntanina. Nakana mami niulimiu kita pura-pura napande. Nisanita ledo ria tupu ntanina aga Alatala. Tapi kuuli ka komiu, kapande nompakalanga rarata. Aginapa mompotove roa sabana pepotove nompakaroso rara ntona.

2 Korintus 1:4

Ia nompakaroso rara kami riara mpengaya-ngaya kasusa bo kapari nirasai kami, ala karoso rara nitarima kami lako nte Alatala, rapake kami mompakaroso rara ntona ntanina anu nombarasai kasusa bo kapari.

2 Korintus 2:7

Hitupa komiu kana mombaampungi ia bo mompakavoe rarana. Nee sampe ia masusa gaga bo maupu rarana.

Efesus 4:29

Sampesuvu-sampesuvu, ane komiu motesa, nee rasovadakamiu tesa nadaa tapi sovadakamo tesa-tesa masipato, anu mombatulungi bo mompakaroso rara ntona ntanina. Tesa-tesa ivehaitu manggeni belo ka topangepena.

Efesus 6:22

Ia nituduku tou nte komiu bo manguli anu najadi nte kami ri sii, ala raramiu rapakavoe.

Kolose 4:8

Kutudu ia tou nte komiu ala rasanimiu kareba kami ri sii, bo ala rapakarosona raramiu.

1 Tesalonika 2:11

Nisanimiu mbotomo, kami nasaro nompatuduki komiu mpo totua langgai nompatuduki anana mboto. Kami nompakaroso raramiu bo nasaro nompopatora komiu matuvu mompakadamba rara nu Alatala. Apa Iamo nompokio komiu majadi todeaNa ri PoparentaNa bo mombarasai kaogeNa.

1 Tesalonika 2:3

Kami ledo nombaunaka komiu mangoseaka pepatuduki nasala. Ledo muni naria patuju nadaa riara ntai kami bo ledo muni kami nopatuju mombabagiu tona.

1 Tesalonika 3:2

bo i Timotius sampesuvuta sampomparasaya nitudu kami tuou nte komiu. I Timotius roa kami nokarajaa ka Alatala. Ia nantulungi kami nompatolele Kareba Belo anu notesaki i Kristus. Ia nitudu kami tou mompakadidi raramiu bo mompakaroso pomparasayamiu

1 Tesalonika 4:1

Kaupuna, sampesuvu-sampesuvu: bara ipia kami nompatuduki ka komiu pokainggu masipato rapoviamiu ala madamba rara nu Alatala. Bo nisaniku nipoviamiumo anu nipatuduki kami. Tapi kami merapi nte mpuu-mpuu rara bo mompopatora komiu ante kuasa nidekei i Pue Yesus ka kami: pasimbukumo hanupa matuvu nte pokainggu mompakadamba Alatala!

1 Tesalonika 4:18

Sabana haitu, sampesuvu-sampesuvu, posipakavoemo raramiu ante pepatuduki hitu.

2 Tesalonika 3:12

Jadi ante kuasa nidekei i Pue Yesus Kristus ka kami, kami momparenta bo mompopainga ira matinonto mokarajaa bo mompaelo katuvura mboto!

1 Timotius 1:4

Ulika ira, tumo mompekirika tutura-tutura anu ledo nakana bo sunju-sunju muli ntotua nggaulu anu ledo ria kaupu-upuna. Pura-pura haitu aga nanggeni tona mosinjanai, bo ledo nanggeni tona mangoseaka nia nu Alatala mompakasalama manusia sabana pomparasayara Ia.

1 Timotius 4:13

Papolamo mombaca Buku Gasa ka todea topomparasaya bo nee menonto mompakaroso pomparasayara bo mompatuduki ira sampe makava yaku.

1 Timotius 6:2

Ane tuana mboto topomparasaya i Yesus, nee radekei batua haitu mompandaente tuana, sabana ira nosampesuvu sampomparasaya. Tapi ia kana mantambai kabelo pokarajaana sabana tua nitulungina haitu muni topomparasaya i Pue anu nipotovera. Timotius, iko kana mompatuduki pura-pura pepatuduki hitu ka todea topomparasaya bo popatora ka ira ala raoseakara.

2 Timotius 4:2

Patolelemo Tesa nu Alatala. Iko kana mompasimbuku mompatolele Tesa haitu nau bara ratarima ntona bara ledo. Popaisani ka tona ane masala pokainggura, onteakamo tona novia dosa, bo pakadidimo rarara mokainggu mabelo. Nee masau raramu mompatuduki ira.

Titus 1:9

Ia kana maroo manggangisi pepatuduki nakana anu nipatudukita ka ia, apa pepatuduki haitu namala raparasaya. Ivesiamo rapakulena mompangajari topomparasaya mangoseaka pepatuduki nakana haitu, bo rapakulena muni mompopaisani sala ntona anu nombasapuaka pepatuduki haitu.

Titus 2:15

Jadi, Titus, patudukikamo pura-pura haitu ka topomparasaya i Kristus. Ulika ira mangoseaka pepatuduki haitu, bo ane ledo raoseakara, onteakamo ira. Nee maeya matamu, apa naria mami kuasamu mompatuduki ira. Nee rapalamba tona mompandaente iko.

Titus 2:6

Ivesia muni mupatuduki ka ngana-ngana langgai. Ulika ira, ira kana mombakuasai karo mboto. Bo iko mboto kana mokainggu mabelo riara mpengaya-ngaya ala iko majadi jonjo namala rapasiala ntona. Ane iko mompatuduki, patudukimo ante manoa bo ante mpuu-mpuu raramu.

Titus 2:9

Patudukimo batua-batua ira kana matundu nte madikara. Ira kana mokarajaa mompakadamba rara nu madikara bo ira ledo mamala mesanai.

Ibrani 10:25

Nee menonto masiromu metupu mosanggani-nggani, mpo kabiasa ntona sanu. Tapi kita kana mosipakaroso rara, nelabipa sii-sii sabana nisanita naparamo kakava i Yesus.

Ibrani 13:22

Sampesuvu-sampesuvu, kuperapi nte komiu posabaramo mangepe tesa nitulisiku hitu, sabana suraku hitu ledo nandoe ntoto.

Ibrani 3:13

Tapi eo-eo komiu kana mosipakaroso rara ala ledo maria komiu rabagiu nu dosa sampe bagamiu majadi makaa. Posipakaroso raramiu ane komiu da natuvu ri tempo niuli ri Buku Gasa “eo hitu”, batuana, kamba da naria loga.

1 Petrus 5:12

Yaku notulisi sura nambuku hitu ante petulungi i Silas, sampesuvuta sampomparasaya. Nisaniku ia namala raparasaya. Patujuku notulisi sura hitu ala mompakaroso raramiu bo mompakalanto ka komiu Alatala mpuu-mpuu nompotove bo nombatulungi kita evamo nitesaku pangane. Jadi komiu kana batena manjarumaka pepotoveNa haitu.

Yudas 1:20

Sampesuvu-sampesuvu nipotoveku, posipakaroso pomparasayamo komiu nangoseaka pepatuduki nakana, sabana pepatuduki niparasayata haitu nagasa mpuu. Bo posambayamo ante pekeniaka Nosa Gasa nu Alatala.