1 Korintus 14:20 - Kaili Ledo

²⁰ Sampesuvu-sampesuvuku, tumo mompekiri mpo ngana-ngana. Komiu kana manoto mpo tona nambasomo. Tapi ane anu daa, komiu kana masimbayu mpo ngana kodi anu dopa nisanina novia nadaa.

1 Korintus 14:20 ပူးပေါင်းရင်းမြစ်များ

Matius 11:25

Tempo haitu nosambayamo i Yesus. NiuliNa, “Tata, Komiumo Tupu nu langi bo tana. Yaku nosukuru nte Komiu sabana nipopaisaniMiu pura-pura anu pangane ka tona ledo natau. Tapi nitabuniakaMiu ka tona nangisani bo tona napande,

Matius 18:3

bo nanguli, “Pariaramo tesaKu hitu! Ane komiu ledo mombabali inggumiu bo majadi nasimbayu eva ngana kodi hitu, komiu ledo majadi todea riara Poparenta nu Alatala.

Matius 19:14

Nanguli i Yesus ka ana-anaguruNa, “Palambakamo ngana-ngana gahitu makava nte Yaku. Nee ratagi ira. Apa aga tona nasimbayu ingguna eva ngana-ngana gahitu masipato majadi todea riara Poparenta nu Alatala.”

Matius 19:4

Nesana i Yesus, “Apa ledo nibacamiu anu nitulisi riara Buku Gasa? Ri lamba pamulana Alatala nompajadi manusia langgai bo mombine.

Markus 10:15

Pariaramo tesaKu hitu! Isema-sema ledo natundu nte Alatala nasimbayu mpo ngana kodi natundu nte totuana, ia ledo mamala majadi todea riara Poparenta nu Alatala.>>

Lukas 18:17

Pariaramo tesaKu hitu! Isema-sema ledo natundu nte Alatala nasimbayu mpo ngana kodi natundu nte totuana, ia ledo mamala majadi todea nu Alatala.”

Roma 1:13

Sampesuvu-sampesuvu, kana rasanimiu nadea ngganimo yaku nonia tou mosinggava nte komiu tapi nasaro natelava sampe sii-sii. Patujuku mosinggava nte komiu ala madea komiu mangoseaka i Pue Yesus nasimbayu mpo anu najadi nte tona ledo toYahudi ri ngata ntanina.

Roma 16:19

Komiu, nisani ntona ri umba-umba komiu naroo nangoseaka pepatuduki lako nte Alatala. Haitumo sampe yaku nadamba nompekirika komiu. Tapi yaku madota ala komiu mapande mangisani anu nabelo, tapi nee mpuu mapande mangisani anu nadaa.

1 Korintus 13:11

Jonjona, tempo yaku da nangana yaku notesa mpo ngana, raraku mpo rara nu ngana, yaku nompekiri mpo ngana. Tapi nambasopa yaku, inggu-inggu ngana haitu nikabasakaku puramo.

1 Korintus 14:19

Tapi nau ivesia, ane masiromu todea topomparasaya, aginapa kupake lima-mbela tesa anu nisani ntodea ala mombatulungi ira. Haitu nelabipa kabelona pade mompake sapulu njobu-mbela tesa riara basa anu ledo nisani ntona batuana.

1 Korintus 2:6

Naupa ivesia, ane kami notesa ka topomparasaya anu naroso pomparasayana, naria muni kapande nipasimbayu kami ka ira. Tapi kapande haitu ledo nasimbayu ante kapande lako ri dunia nadaa hitu atau kapande ntopomparenta ri dunia nadaa hitu, apa kuasara nalipo-lipomo.

Efesus 4:13

sampe kaupuna kita pura-pura mpuu-mpuu mosangu rara sabana kita nomparasaya Ana nu Alatala bo mpuu-mpuu nosisani nte Ia. Bo kita pura-pura mantambai manoto, bo pomparasayata mantambai maroso sampe domo makura nuapa-nuapa. Bo kita majadi nasimbayu mpo i Kristus mboto, nanoto bo naroso.

Filipi 1:9

Jadi, iveimo pomperapiku nte Alatala, ala pepotovemiu mantambai, bo mantambai rasanimiu anu nakana, bo mantambai kanoto mpekirimiu.

Filipi 3:15

Jadi, kita toroso nomparasaya kana mosangu pekiri mompasimbuku mangoseaka i Kristus evamo niuliku pangane. Tapi ane maria pekirimiu da nosisala nte pekiriku, damo Alatala mboto mompakanoto raramiu.

1 Petrus 2:2

Ngana kodi dako nesuvu naino rarana nantomi uve njusu ntinana. Ivesia muni komiu kana maino rara mangepe Tesa nu Alatala anu najadi kandea nagasa ka nyawamiu. Ivesiamo posisanimiu nte Alatala mantambai maroso, sampe ratarimamiu pura-pura belo nipakasadiaNa ka tona nipakasalamaNa.

2 Petrus 3:18

Tapi komiu kana mantambai mosisani belo ante Tuputa Yesus Kristus, Topepakasalama, bo mantambai mombarasai kabelo raraNa riara nggatuvumiu. Iamo masipato ratoiyata bo rabilata, sii-sii bo sampe ri kasae-saena. Amin. Tabe lako nte yaku, Petrus