1 Korintus 13:5 - Kaili Ledo

⁵ Ia ledo nasodo nte roa bo ledo aga nangelo kabelo nu karona mboto. Ia ledo nasalisa narau bo ledo nompariara kasala nipovia ntona ka ia.

1 Korintus 13:5 ပူးပေါင်းရင်းမြစ်များ

Matius 5:22

Tapi Kuuli ka komiu, isema-sema narau rarana nte sampesuvuna masipato ratangara. Bo isema-sema nanjalai sampesuvuna masipato raposintingayo ri Polibu Mbaso Agama. Tapi isema-sema manguli ka sampesuvuna, ‘Kanavumo ri narakaa iko!’ ia haitumo masipato ratedaka riara apu narakaa.

Matius 9:4

Tapi nisani i Yesusmo pekirira. Haitu sampe niuliNa ka ira, “Nakuya rara ntaimiu nompekiri nadaa?

Markus 3:5

Jadi i Yesus neili nangganoto tona ri sia. Narau mpuu raraNa tapi nabuku muni raraNa nanggita ira nakaa gaga bagara. Ledo ntoto naasi matara nanggita tona nakoyo palena. Bo nanguli Ia ka tona haitu, <> Niodo ntona haitu mpuumo palena, bo nabelomo.

Lukas 7:39

Nanggita haitu, nompekirimo i Simon, “Tona hitu ledo nabi. Ane rapana Ia nabi, tantu rasaniNa isema mombine nanggangisi Ia haitu, apa mombine haitu nadosa.”

1 Korintus 10:24

Nee aga mompekirika kabelo karomiu mboto, tapi pekirika muni kabelo ntona ntanina.

1 Korintus 10:33

Yaku mboto nompasimbuku matuvu mompakadamba pura-pura rara ntona riara mpengaya-ngaya pokaingguku. Yaku ledo aga nompekirika kabelo karoku mboto tapi yaku nompekirika kabelo ntona pura-pura, ala ira pura-pura mamala rapakasalama.

1 Korintus 11:18

Paratama, niepeku ane komiu nasiromu, komiu natebagi-bagi bo nosinjanai. Bo tantu nakana sanu kareba haitu.

1 Korintus 12:25

Ivesiamo karota matuvu masiayu bo pura-pura sipa mosioseaka.

1 Korintus 7:36

Ane maria langgai nompekirika pokaingguna domo masipato nte tengeana, bo tengeana haitu nantambaimo umuruna sampe nirasaina ira kana moberei, agina ia movia anu nipodotana haitu. Agina ira moberei, haitu ledo rapodosana.

2 Korintus 5:19

Jadi siimo kareba nipatolele kami: Alatala nompoposinggabelo mpanjili manusia nte Ia sabana anu nipovia i Kristus. Domo nirekeNa dosa-dosata. Bo niparasayaNa ka kami pokarajaa mompatolele TesaNa ka tona ntanina ala ira muni mamala mosinggabelo nte Ia.

Galatia 5:13

Sampesuvu-sampesuvu, komiu nipokio nu Alatala ala rakabasaka lako ri Atura agama. Aga nee sampe haitu majadi loga mangoseaka mpengaya-ngaya dota rara nadaa! Komiu kana mosimpotove bo mositulungi.

Filipi 2:21

Pura-pura roaku ntanina aga nasesa nompekirika bagora mboto, ledo nompekirika dota i Yesus Kristus.

Filipi 4:8

Kaupuna, sampesuvu-sampesuvu, tanondoakamo anu nakana, anu nanoa, bo anu masipato rapakaoge. Pekirikamo anu nagasa, anu nagaya, bo anu nabelo raepe ntona. Tanondoakamo anu mpuu-mpuu nabelo, bo anu masipato ratoiya.

2 Tesalonika 3:7

Nisanimiu mbotomo pokainggu kami bara ipia tempo kami nonturo nte komiu, kami ledo namau nokarajaa. Pokainggu kami haitu kana rapasialamiu.

2 Timotius 2:10

Jadi yaku nombatidamaka mpengaya-ngaya kasusa ala mamala kutulungi tona nipelisi nu Alatala sampe ira muni mamala momparasaya i Yesus Kristus bo rapakasalama bo matuvu mabelo mosanggani-nggani nte Alatala sampe ri kasae-saena.

2 Timotius 4:16

Tempo parakaraku nitangara paratama, ledo ria saitoa nombatulungi yaku; nepalaika puramo roa. Kuperapi Tupu ledo mombareke salara haitu.

Yakobus 1:19

Sampesuvu-sampesuvu nipotoveku, pariaramo pakabelo-belo tesaku hitu. Kita kana masadia mangepe, tapi nee kaliu-liu motesa, bo nee masalisa marau.