1 Korintus 13:13 - Kaili Ledo

¹³ Jadi pura-pura pompakule maupu tapi naria talu-ngaya anu ledo maupu-upu, haitumo pomparasaya, panjarumaka bo pepotove. Bo lako ri talu-ngaya haitu, nopokopa pepotove.

1 Korintus 13:13 ပူးပေါင်းရင်းမြစ်များ

Lukas 10:27

Nesana tona haitu, “Anu nitulisi ri sia: Potovemo Tupumu, Alatala ante mpuu-mpuu raramu, ante pura-pura pekirimu, pura-pura pokainggumu bo pura-pura pompakulemu. Potovemo singgamanusiamu mpo pompotovemu karomu mboto.”

Lukas 22:32

Tapi niposambayaKukamo iko, Simon, ala pomparasayamu ledo moura. Jadi maupu iko rapesori bo muoseaka mpanjili Yaku, iko kana mompakaroso pomparasaya nu roamu.”

Roma 15:13

Alatala mpuu-mpuu puna panjarumakata! Kuperapi Ia mompakadamba mpuu raramiu bo mombadekei ka komiu katuvua mabelo sabana komiu nomparasaya Ia. Kuperapi panjarumakamiu nte Ia mantambai maroso ante kuasa lako ri Nosa GasaNa.

1 Korintus 14:1

Jadi sampesuvu-sampesuvu, pasimbukumo momparibavo mompotove tona ntanina. Bo pasimbuku munimo manggava pompakule-pompakule lako nte Nosa Gasa. Bo pompakule nogunapa haitumo pompakule mompasimbayu tesa nitarima lako nte Alatala.

1 Korintus 16:14

Nuapa-nuapa rapoviamiu, poviamo ante pepotove.

1 Korintus 3:14

Ane nabelo pokarajaara rakita nu Alatala, topokarajaa haitu manggava tambo lako nte Alatala.

1 Korintus 8:1

Kapolana, nipekutanamiu kandea nipakande ka tupu-tupu ntanina. Nakana mami niulimiu kita pura-pura napande. Nisanita ledo ria tupu ntanina aga Alatala. Tapi kuuli ka komiu, kapande nompakalanga rarata. Aginapa mompotove roa sabana pepotove nompakaroso rara ntona.

1 Korintus 8:3

Tapi isema-sema mpuu-mpuu nompotove Alatala, ia niposisani nu Alatala.

2 Korintus 5:10

Apa kita pura-pura kana mantingayo i Kristus bara maipia ala ratangaraNa. Maupu ratangaraNa, simbo rakavata anu nipakatantu nangoseaka anu nipoviata tempo kita natuvu ri dunia hitu, bara povia nabelo bara povia nadaa.

2 Korintus 5:15

Bo i Kristus mpuu-mpuu namate nanjambei kita pura-pura. Patuju nu kamateNa haitu ala kita anu da natuvu ri dunia hitu domo matuvu mangoseaka dotata mboto, tapi dota i Kristus anu namate bo natuvu mpanjili ala manggeni belo ka kita.

Galatia 5:6

Ane nosangu rara ante i Yesus Kristus kita, ledo ria gunana kita nisuna atau ledo nisuna. Aga nomparasaya i Kristus noguna. Bo ane kita mpuu-mpuu nomparasaya, rapotoveta roata.

Filipi 1:9

Jadi, iveimo pomperapiku nte Alatala, ala pepotovemiu mantambai, bo mantambai rasanimiu anu nakana, bo mantambai kanoto mpekirimiu.

Kolose 1:27

Apa dota nu Alatala ala rasani ntodeaNa kabelo bo kaoge niaNa ka pura-pura manusia. NiaNa haitumo: i Kristus natuvu riara ntaita, jadi nisanita kita mpuu-mpuu matuvu mabelo nte Alatala sampe ri kasae-saena.

Kolose 1:5

Komiu nomparasaya bo nepotove sabana komiu bate-batena nanjarumaka Alatala bo nantongoraka anu nipakasadiaNa ka komiu ri suruga. Anu nisarumakamiu haitu niepemiumo tempo Kareba Belo nipatolele ka komiu bara ipia. Kareba Belo haitu mpuu-mpuu nakana

Kolose 3:14

Tapi nelabipa pade pura-pura pangane, kita kana mosimpotove. Sabana, ane kita todea topomparasaya nosimpotove, kita mpuu-mpuu nosangu rara.

1 Tesalonika 5:8

Tapi kita tona natuvu ri karemena. Jadi kita kana mompakanoto rarata. Kita kana bate-batena momparasaya Alatala bo mompotove tona ntanina ala kita maroso masimbayu mpo tantara nobaju ase. Kita kana maroo manjarumaka Alatala mompakasalama kita, ala kita maroso mpo tantara nosonggo baja.

1 Timotius 1:5

Patuju parentaku hitu ala kita mosimpotove, ante tove neumba lako ri rara nagasa, pekiri rara ntai anu ledo nombasalai kita, bo pomparasayata i Kristus mpuu-mpuu nakana.

2 Timotius 1:7

Apa Nosa Gasa nipopanau nu Alatala ka kita ledo nompakaeka kita, tapi nompakaroso rarata, bo nompopompakule kita mombatidamaka dota rarata mboto bo mompotove singgamanusiata.

Ibrani 10:35

Jadi, sampesuvu-sampesuvu, nee menonto momparasaya, sabana ane maroo komiu momparasaya, mambaso mpuu tambomiu bara maipia.

Ibrani 10:39

Sampesuvu-sampesuvuku, kita hitu ledo topoura sampe rapambela pehuku, tapi kita nomparasaya Alatala bo nanggava katuvua nabelo sampe ri kasae-saena.

Ibrani 6:11

Dota kami, ala komiu pura-pura mompasimbuku mokainggu ivehaitu sampe ri kaupuna ala komiu mpuu-mpuu manggava pura-pura anu nisarumakamiu lako nte Alatala.

Ibrani 6:19

Ane mantamo talonto sakaya, natantumo sakaya haitu ledo maave. Ivesia muni kita: ane maroso panjarumakata ledo masalandala kita. Ledo mabali panjarumakata sabana anu nisarumakata haitumo i Pue Yesus. Ia naria ri Tombi Nelabi Kagasana ri suruga, bo

1 Petrus 1:21

Iamo sampe komiu nomparasaya Alatala. Alatala nompakatuvu mpanjili Ia lako ri kamateNa bo nombadekei kuasa bo kaoge nipokumaaka ka Ia. Jadi haitumo sampe komiu nomparasaya bo nanjarumaka Alatala.

1 Yohanes 2:10

Tona nompotove sampesuvuna, iamo natuvu riara reme sampe ledo naria nuapa-nuapa ante ia anu mamala mompakanavu ia riara dosa.

1 Yohanes 2:14

Yaku notulisi hitu ka komiu, ngana-ngana, sabana komiu nosisanimo ante Tuamata, Alatala. Yaku notulisi hitu ka komiu, totua-totua, sabana komiu nosisanimo ante i Yesus anu naria lako ri lamba pamulana. Yaku notulisi hitu ka komiu, kabilasa bo randaa sabana pomparasayamiu narosomo. Nipariaramiumo Tesa nu Alatala, bo nidagimiumo Magau nu Seta.

1 Yohanes 2:24

Jadi pariaramo pakabelo-belo pepatuduki niepemiu lako ri pantepuuna pomparasayamiu i Kristus. Ane pepatuduki haitu mpuu-mpuu rapariaraimiu, komiu bate-batena matuvu mosangu rara nte Ana nu Alatala bo Alatala, TuamaNa.

1 Yohanes 3:3

Isema-sema manjarumaka majadi masimbayu mpo i Kristus, ia kana mombajagai pokaingguna ala katuvuna mpuu-mpuu magasa masimbayu mpo katuvu i Kristus.

1 Yohanes 3:9

Tona najadi ana-ana nu Alatala domo batena novia dosa, sabana ana-ana nu Alatala kana manjava inggu nTuamara. Domo mamala ira batena movia dosa sabana ira najadi ana-ana nu Alatalamo.