1 Korintus 1:30 - Kaili Ledo

³⁰ Lako nte Alatala sampe kita najadi nosangu rara ante i Yesus Kristus. Bo lako nte i Kristus sampe nisanita kapande nu Alatala. Ia nompoposinggabelo kita ante Alatala sampe kita najadi todea nagasa nipatani ka Alatala. Bo Iamo nombakabasaka kita lako ri pura-pura anu nadaa.

1 Korintus 1:30 ပူးပေါင်းရင်းမြစ်များ

Matius 1:21

I Maria mompoanaka saito ngana langgai, bo ngana haitu kana mupoposanga Yesus sabana Iamo mompakasalama todeaNa lako ri dosara.”

Lukas 11:49

Sabana haitu, Noto nu Alatala nanguli pakalanto ivei: ‘Nabi-nabi bo suro-suroKu Kutudu hau nte ira gahaitu. Sanu rapatesira, bo sanu rapandasara.’ Alatala nanguli ivesia sabana nisaniNa komiu anu natuvu sii-sii nasimbayu kadaamiu ante totuamiu nggaulu.

Lukas 21:15

Apa Yaku mboto mombadekei ka komiu tesa-tesa bo noto mpekiri sampe ledo maria saitoa balimiu mompakule mombadagi bara mombabali tesamiu.

Yohanes 1:18

Dopa naria saitoa tona nanggita Alatala. Tapi AnaNa saito-itona anu nasimbayu nte Alatala bo narapa nte Ia, Iamo nompopaisani Alatala ka kita.

Yohanes 14:6

Nesana i Yesus, “Yakumo hii dala, Yakumo nompopaisani anu nakana bo Yakumo nombadekei katuvua nabelo. Ledo ria saitoa mamala makava ri ngayo nTuamaKu ane ledo ante Yaku.

Yohanes 17:26

NipopaisaniKumo Komiu ka ira. Bo da Kupopaisani hanupa Komiu ka ira ala Ira mompotove tona ntanina nasimbayu mpo Komiu nompotove Yaku, bo ala Yaku mboto monturo riara ntaira.”

Yohanes 17:8

Apa nitesaKu ka ira puramo tesa niuliMiu ka Yaku, bo tesa-tesa haitu nitarimara puramo. Tata, nisanira Yaku mpuu-mpuu nakava lako nte Komiu, bo niparasayara Komiu nantudu Yaku.

Yohanes 8:12

Naupu haitu nanguli vaimo i Yesus ka todea, “Yakumo hii reme dunia. Isema-sema mangoseaka Yaku ledo matuvu ri kalandana, tapi manggava reme anu mombadekei katuvua mabelo.”

Suro-Suro 26:18

Kutudu iko hau mombabuka matara, ala ira domo matuvu ri kalandana tapi matuvu riara reme nu Alatala, ala ira rakabasaka lako ri kuasa Magau nu Seta bo matundu nte Alatala. Bo dosa-dosara raampungi bo ira majadi todea nu Alatala anu nipelisiNa, sabana pomparasayara Yaku.’ ”

Roma 1:17

Kareba Belo nompopaisani dala ka kita majadi manoa ri panggita nu Alatala, haitumo momparasaya i Yesus. Ledo ria dala ntanina, aga momparasaya lako ri pantepuuna sampe ri kaupuna. Apa nitulisi ri Buku Gasa ivei: <>

Roma 11:36

Apa pura-pura anu naria, nopuna lako nte Alatala bo natuvu lako ri kuasaNa bo Iamo Tupuna. Iamo masipato ratoiyata bo rabilata sampe ri kasae-saena! Amin!

Roma 12:5

Ivesia muni kita topomparasaya i Kristus. Nau kita nadea, kita najadi sangu riara i Kristus. Bo kita nosidai mpo sipa-sipa nu karo.

Roma 16:11

Pakavote tabeku ka i Herodion, roaku toYahudi, bo muni ka sampesuvuku sampomparasaya ri banua i Narkisus.

Roma 16:7

Pakavote tabeku ka i Andronikus bo i Yunias, sampesuvuku toYahudi. Ira muni nitarunggu nosanggani-nggani ante yaku bara ipia. Pura-pura suro i Yesus nombabila ira. Dopame yaku nomparasaya i Yesus, lave nomparasayamo ira.

Roma 4:25

I Yesus nidekei nu Alatala rapatesi mombasompo dosata bo naupu haitu Ia nipatuvu mpanjili ala kita mamala majadi manoa ri panggita nu Alatala.

Roma 4:6

Pepatuduki haitu nasimbayu nte tesa Magau Daud nggaulu. Apa i Daud notesaki kasana ntona anu nireke nu Alatala nanoa, ledo lako ri pokaingguna.

Roma 5:19

I Adam ledo natundu nte Alatala. Aselena, pura-pura manusia najadi nadosa. Tapi i Yesus natundu nte Alatala. Aselena, pura-pura manusia mamala majadi manoa ri panggita nu Alatala.

Roma 5:21

Bara ipia dosa nakuasa riara nggatuvu manusia sampe pura-pura manusia kana mamate bo rapopogaa lako nte Alatala. Tapi sii-sii, pepotove nu Alatala nakuasa riara nggatuvuta. Apa lako ri pepotoveNa haitu, Alatala nombareke kita nanoa ri panggitaNa bo nidekeiNa ka kita katuvua nabelo sampe ri kasae-saena. Haitu pura nipoviaNa sabana Tuputa i Yesus Kristus.

Roma 8:1

Jadi sii-sii domo ria pehuku rapambela ka tona nosangu rara ante i Yesus Kristus.

Roma 8:23

Ledo aga dunia nandasa, tapi kita topomparasaya muni nandasa nirasaita, nantongoraka tempona Alatala mombakabasaka karota lako ri kuasa kamatea, bo mombadekei belo ka kita ana-anaNa. Nisanita tempo haitu kana makava, sabana nitarimatamo Nosa Gasa nu Alatala, tandana Alatala mpuu-mpuu mompakadupa pojanjiNa ka kita.

Roma 8:9

Tapi komiu domo nangoseaka dota raramiu nadaa. Komiu nangoseaka dota Nosa Gasa nu Alatala ane Nosa Gasa mpuu-mpuu nonturo riara ntaimiu. Isema-sema ledo ria Nosa Gasa i Kristus riara ntaina, ia ledo todea i Kristus.

1 Korintus 1:24

Tapi ane tona nipokio nu Alatala majadi todeaNa, nau toYahudi, nau toYunani, nisanira kamate i Kristus haitu nompopakita kuasa bo kapande nu Alatala ka ira.

1 Korintus 12:18

Alatala nompakatantu pura-pura sipa nu karo nipataka ri kasipatona nangoseaka dota nu Alatala mboto.

1 Korintus 12:27

Komiu pura-pura nirapaka karo i Kristus bo komiu saito-saito simbo nirapaka sipa nu karoNa.

1 Korintus 12:8

Saito tona nidekeika nu Nosa Gasa pompakule mapande motesa. Tona ntanina nidekeika nu Nosa Gasa haitu muni pompakule mombatentei anu nipopaisani nTupu ka ia.

1 Korintus 4:15

Apa nau nonjobu-njobu guru nompatuduki komiu mangoseaka i Kristus, ledo naria najadi tuamamiu. Aga yakumo najadi mpo tuamamiu sabana yaku anu paratama nanggeni Kareba Belo ka komiu bara ipia.

1 Korintus 6:11

Bara ipia bara sako-ndua komiu nokainggu ivesia muni. Tapi katuvumiu nipakagasa nu Alatala. Komiu najadi todeaNa nipatani ka Ia, bo komiu nipakanoa ri panggitaNa. Haitu pura-pura najadi ante kuasa Nosa Gasa nu Alatala sabana komiu nomparasaya i Pue Yesus Kristus.

2 Korintus 12:2

Sapulu pata-mpae naliu, naria saito topangoseaka i Kristus niposisaniku anu niore hau ri ponturo nu Alatala ri suruga. Ledo nisaniku ane karona mpuu-mpuu neore atau aga anu nipopakita ka ia. Aga Alatala nangisanina.

2 Korintus 4:6

Tempo Alatala nompajadi dunia niuliNa, “Lako ri kalandana meumbamo reme!” Ivesia muni nipakaremeNa pekirita ala pekirita majadi manoto bo rasanita kaogeNa. ToIsrael nggaulu nanggita kaoge nu Alatala nenggila ri lenje i Musa. Ivesia muni rasanita kaoge nu Alatala ane raposisanita i Kristus.

Galatia 1:4

I Yesus nombadekei karoNa rapatesi mombasompo dosata nangoseaka dota nTuamata Alatala. PatujuNa ala Ia mamala mombakabasaka kita lako ri kuasa nu dunia nadaa.

Galatia 3:13

Kita manusia masipato rahuku nu Alatala, sabana kita pura-pura nombaliunaka AturaNa. Tapi i Kristus nombakabasaka kita lako ri pehuku haitu, sabana tempo Ia namate ri kayu salib, Iamo nihuku manjambei kita. Nisanita i Kristus nihuku nu Alatala sabana naria tesa riara Buku Gasa nanguli ivei: “Isema-sema namate niloe ri kayu, haitu tandana ia nihuku nu Alatala.”

Efesus 1:10

ri tempo nipakatantuNa. Iveimo niaNa haitu: pura-pura anu naria ri suruga bo ri dunia rapoposinggabeloNa lako ri posangu rarara nte i Kristus, bo i Kristus mombabalenggai pura-pura.

Efesus 1:14

Nosa Gasa haitu panggangisita, ala rasanita Alatala mpuu-mpuu mombadekei ka kita pura-pura anu nijanjiNa ka todeaNa. Jadi, nisanita Alatala mpuu-mpuu mombakabasaka kita lako ri dunia nadaa hitu sabana kita todeaNa. Haitumo sampe masipato kita mantoiya kaoge nu Alatala anu nipokumaaka!

Efesus 1:7

Kita nikabasaka lako ri pehuku nu dosa sabana raa kamate i Kristus bo posangu rarata nte Ia. Dosata niampungi nu Alatala sabana toveNa anu nelabi kaogena.

Efesus 2:10

Kita hii nipajadi nu Alatala manusia nabaru anu nosangu rara nte i Yesus Kristus. Patuju nu Alatala novia ivehaitu ala kita mompakule mokainggu mabelo, mpo nipakatantuNa mami ka kita lako ri nggauluname.

Efesus 4:30

Jadi, nee rapoviamiu anu mompakabuku rara Nosa Gasa nu Alatala. Toramo! Alatala nombadekei Nosa Gasa ka kita, tandana kita najadi todeaNa. Bo Nosa GasaNa haitu muni najadi panggingisita ala rasanita kita mpuu-mpuu rakabasaka lako ri dunia nadaa hitu ngena.

Efesus 5:26

PatujuNa ala kita majadi todea nu Alatala. NipegasaNa kita nadosa sabana kita nomparasaya tesaNa bo kita nidiu nte uve tandana kita topangoseaka Ia.

Filipi 3:9

bo mpuu-mpuu mosangu rara ante Ia! Alatala nombareke yaku nanoa ri panggitaNa, ledo sabana pangoseakaku Atura-atura agama, tapi sabana pomparasayaku i Kristus. Yaku najadi nanoa ri panggita nu Alatala ledo lako ri pokaingguku, tapi lako nte Alatala mboto. Bo Alatala nompakanoa yaku lako ri pomparasayaku.

Kolose 1:14

AnaNa haitu nantolosi kita, sampe dosata niampungi.

Kolose 3:16

Kareba anu notesaki i Kristus kana rapariarata bo ratanondoakata sampe mamala mosipatuduki bo mosipopatora, nangoseaka noto anu naria riara ntaita. Podadekamo dade Mazmur lako ri Buku Gasa, bo dade-dade pantoiya Alatala bo dade-dade nidekei nu Nosa Gasa. Kita kana modade ante mpuu-mpuu rarata, manguli tarima kasi ka Alatala.

1 Tesalonika 5:23

Kuperapi nte Alatala, topombadekei katuvua nabelo ka kita, ala Ia mboto mompakagasa katuvumiu sampe komiu mpuu-mpuu matuvu mpo todeaNa nagasa. Kuperapi Alatala mombajagai karomiu, rara ntaimiu, bo pekirimiu sampe ledo ntoto maria nuapa-nuapa rasalai tempo Tuputa Yesus Kristus makava mpanjili.

Titus 2:14

I Kristus nombadekei karoNa nipatesi nanjambei kita ala mombasompo dosata. NikabasakaNa kita lako ri pura-pura pokaingguta nadaa, nipegasaNa kita bo nipataniNa kita majadi todeaNa mboto anu matutu nokainggu nabelo.

Yakobus 1:5

Ane makura noto pompekirimiu, perapimo lako nte Alatala. Bo radekeiNa pompekiri nanoto niperapimiu, sabana najoi raraNa nombadekei noto ka pura-pura tona. Ledo ntoto natove raraNa.

2 Petrus 1:1

Sampesuvu-sampesuvuku anu mpuu-mpuu nomparasaya i Yesus Kristus, nasimbayu mpo kami. Iamo Alatala bo Topompakasalama kita, anu nompopompakule pura-pura kita nomparasaya sabana Ia nanoa bo ledo nompelenje. Sura hitu lako nte yaku, i Simon Petrus. Yaku batua bo suro i Yesus Kristus.

1 Yohanes 5:6

I Yesus Kristus nakava ri dunia. Ia nidiu i Yohanes Topediu bo natitimo raaNa tempo Ia namate ri kayu salib. Ia ledo aga nidiu tapi Ia namate muni bo raaNa natiti. Nosa Gasa mboto nompakalanto ka kita i Yesusmo Ana nu Alatala. Bo anu niuli Nosa Gasa nakana mpuu.

Pompakita 14:4

Ira haitumo nasimbayu mpo tona ledo sanggani nosampaturu ante mombine, nagasa mpuu pokainggura. Ira nangoseaka Ana Bimba ri umba-umba nikalauNa. Iramo nitoloki lako nte pura-pura manusia ri dunia bo nipatani ka Alatala bo ka Ana Bimba, nasimbayu mpo tona nombadekei asele ntalua pamulana ka Alatala.

Pompakita 5:9

Totua-totua gahaitu nodade sanggayu dade nabaru ka Ana Bimba ivei: “Komiumo masipato mangala sura haitu bo mombabuka populuna. Sabana, Komiu nipatesi bo ante raa nggamateMiu haitu nitoloMiu manusia lako ri njumangu dunia majadi todea nu Alatala, haitumo tona lako ri pura-pura ngata, bo lako ri pura-pura valaa bo tona lako ri mpengaya-ngaya basa ri dunia.