1 Korintus 1:20 - Kaili Ledo

²⁰ Jadi nuapa gunana tona napande? Nuapa gunana tona natau? Nuapa gunana tona napande notesa ri dunia hitu? Alatala nompakalanto pura-pura kapande nu manusia ledo ria gunana.

1 Korintus 1:20 ပူးပေါင်းရင်းမြစ်များ

Matius 13:22

Savua nanavu ranggarui nirapaka tona nangepe Tesa nu Alatala bo niparasayara. Tapi ira aga nasesa nompekirika katuvura mboto riara dunia hitu, bo ira aga naino ka doi. Haitu pura-pura nangupi Tesa nu Alatala sampe ledo ria aselena riara nggatuvura.

Yohanes 12:31

Sii-sii nakavamo tempona dosa nu manusia ri dunia ratangara. Sii-sii temponamo Magau nu Seta anu nakuasa ri dunia, radagi.

Suro-Suro 17:18

Nosinjula tesa muni ia nte guru-guru anu nangoseaka pepatuduki i Epikuros bo guru-guru nangoseaka pepatuduki anu niuli Stoa. Bara sako-ndua guru-guru haitu nosisanai ante i Paulus. Naupu sia, naria sanu nanguli, “Nuapa nisani ntona moitu? Pangisanina aga sakide, tapi tesana nadea!” Bo naria tona ntanina nanguli, “Ia bara madota mompopaisani viata-viata nisomba ntosangatana ka kita!” Niulikara ivesia apa i Paulus notesa i Yesus, bo nitesana muni tona natuvu mpanjili lako ri kamatena.

Roma 1:20

Lako ri tempo dunia nipajadi nu Alatala sampe sii-sii, nisani nu manusia kuasaNa ledo naupu-upu bo Ia mpuu-mpuu Alatala. Nau ledo nikitata lenjeNa, nisanita Ia Alatala apa nisanita ingguNa lako ri pura-pura anu nipajadiNa ri dunia. Jadi ledo ria tona mamala manguli <>

Roma 1:22

Pangulira iramo tonoto pekiri, tano aga todoyo!

1 Korintus 1:19

Apa ri Buku Gasa Alatala notesa ivei: “Kulava nia ntona napande bo Kupakaingu pekiri ntona natau.” Yesaya 29:14

1 Korintus 1:26

Sampesuvu-sampesuvu, toramo katuvumiu bara ipia tempo Alatala nompokio komiu majadi todeaNa. Ledo nadea komiu napande ri panggita ntona ri dunia. Ledo nadea komiu nakuasa bo ledo nadea naria nturona.

1 Korintus 1:27

Tapi Alatala nompelisi tona nireke nadoyo ri panggita ntona ri dunia, ala tona natau maeya matara. NipelisiNa tona ledo nakuasa ri panggita ntona ri dunia, ala tona nakuasa maeya matara.

1 Korintus 1:28

NipelisiNa tona ledo ria nturona, tona nisalai bo tona nireke ledo ntoto ria gunana ri panggita ntona ri dunia, ala malanto anu nitoiya nu manusia ri dunia hitu ledo ria gunana.

1 Korintus 11:32

Tapi ane rapana kita rapambela pehuku nu Alatala sii-sii, patujuNa kita rapatuduki ala nee sampe kita rapakaropu mosanggani-nggani ante tona ri dunia anu ledo natundu nte Alatala.

1 Korintus 2:6

Naupa ivesia, ane kami notesa ka topomparasaya anu naroso pomparasayana, naria muni kapande nipasimbayu kami ka ira. Tapi kapande haitu ledo nasimbayu ante kapande lako ri dunia nadaa hitu atau kapande ntopomparenta ri dunia nadaa hitu, apa kuasara nalipo-lipomo.

1 Korintus 2:8

Ledo ria saitoa topoparenta ri dunia nadaa hitu nangisani patuju nu Alatala haitu. Apa ane rapana nisanira patujuNa haitu, natantumo ledo rapakura ri kayu salib i Pue anu nakuasa.

1 Korintus 3:18

Nee mombabagiu karomiu mboto! Ane maria nte komiu tona nompekiri karona mboto napande ri panggita nu manusia, agina ia majadi madoyo ri panggita nu manusia ala ia mpuu-mpuu majadi mapande.

1 Korintus 3:19

Apa anu nireke napande ri panggita nu manusia nadoyo ri panggita nu Alatala. Evamo nitulisi riara Buku Gasa ivei: “Alatala nompakanavu tona natau ante akalara mboto.” Ayub 5:13

1 Korintus 6:2

Ledo nisanimiu kita todea nu Alatala mombatangara pura-pura tona ri dunia bara maipia? Jadi ane pura-pura tona ri dunia ratangaramiu, natantu rapakulemiumo mombatangara parakara-parakara nangaa ri tatangamiu mboto!

Yakobus 4:4

Komiu nasimbayu mpo topobualo apa komiu ledo natutu nangoseaka Alatala. Ledo nisanimiu? Ane rapoinota anu nipodota ntona nadaa ri dunia hitu, kita majadi bali nu Alatala. Isema-sema mompoino anu nipoino ntona nadaa ri dunia hitu, ia nompajadi karona mboto bali nu Alatala.