APIRIPI 1:20 - Kîrîîkanîro Kîîyerû

²⁰ Ndî na wîrîgîîro bûûnene mûno atî, kîrî bûra bunthe ndûthaga, gûtirî rîo nkaarûtha ûntû bwa kûmbîkîra nthoni. Na ûgu i bu nkaraga mbîrîgîîrîîte. Wîrîgîîro bwakwa n'atî, ngaakaraga na ûcamba bwingî mûno îîndî na magiita monthe, mbonanagie na mantû mara ndûthaga bûra Kîrîstû arî ûmûnene, nwîgue ingaatûûra mwoyo kana inkaûragwa.

APIRIPI 1:20 ပူးပေါင်းရင်းမြစ်များ

NJOANA 21:19

Yiesû augire ûgu kwonania gîkuû kîra Petûrû agaakua gîgaatûma Ngai atîîywa. Akûrîîkia kuuga ûgu, Yiesû eera Petûrû, “Nthingata!”

NGÛGÎ 20:24

Ntionaga mwoyo wakwa ûrî gîtûmi. Îromba rîakwa i nthirie ngûgî îra Mwathani Yiesû aampeere nduta, ntûmîîrie ntheto îmbega ya ûtugi bwa Ngai.

NGÛGÎ 21:13

Paûrû atwîra, “Ibûkûndîthia kîeba bûkîndîrîra! Indîthuuranîrîte gûkuîra Njerusaremu n'ûntû bwa Mwathani Yiesû, tatiga kûthaîkwa akî.”

NGÛGÎ 4:31

Bakûrîîkia kûromba ûgu, bantû agu baarî ainaina. Booyûrwa i Kîrundu Ûmûtheru bonthe. Baatûmîîria kiugo kîa Ngai barî na ûcamba.

AROOMA 12:1

Kwoogu, aruayia na aarayia, n'ûntû bwa kîao kîa Ngai, inkûbûûria bwînenkanîre kîrî Ngai bûrî igongwana bîri mwoyo. Mûtûûrîre wenu nwîgue ûrî mûtûûrîre ûmûtheru na ûkûmûkenia. Înu n'yo njîra ya kûmûtûmîkîra bûra kwagîrîte.

AROOMA 5:5

Gûtirî rîo wîrîgîîro bwetû bûgaatûringa nthî, n'ûntû Ngai atûûyûrîîtie wendo bwake nkorooni cietû gûkûrûkîîra kîrî Kîrundu wake Ûmûtheru ûra atwete.

AROOMA 6:13

Bûtikaarûthe mantû maathûûku na gîcuncî kîa mîîrî yenu bûtûmîkîra wîyia na kîo. Îruteeni kûrû kîrî Ngai bûrî antû bara barutîîtwe gîkuûni baareetwa mwoyooni. Înenkeraani Ngai icuncî bienu bionthe bitûmîke kûrûtha mantû maagîru.

AROOMA 6:19

Ndîtûmîra ngerekano îno n'ûntû n'îmbûthû kaingo bûmenya bûra nkûbwîra. Ta bûra bwanenkanîrîte icuncî bimwe bia mîîrî yenu biatuîka nkombo cia mantû mataagîrîte na kûrega kwathîka, îîndî nenkanîraani îcuncî bia mîîrî yenu bituîke nkombo cia wagîru, kaingo bûtûûraga ûtûûro bûûtheru.

AROOMA 8:19

Bionthe bira Ngai aûmbire ibieteereete bikîendaga kwona mûno rîra Ngai akoonania bara barî aana baake.

AROOMA 9:33

wata bûra kwandîkîîtwe *Maandîkooni Maatheru, “Ga nkûbwîra, nkaiga iiga Kîrîmaani gîa Cayûni na antû baingî bagaatiira iiga rîru bataratare bagwe. Ûra akaarîîtîgia rîtimwîkîrithia nthoni.”

1 AKORINTHO 15:31

Mbîgagua ndî ûgwatiini bwa kûûragwa ntugû cionthe. Na ûgu i bu kûrî. Nwa ta ûmma bwa gûkena kûra bûnkenagia ndeni ya Mwathani wetû Yiesû Kîrîstû.

1 AKORINTHO 6:20

n'ûntû ka bwagûrirwe goro mûno. Kwoogu ibûbatîîrue bûkumagia Ngai na njîra ira bûtûmagîra na cio mîîrî yenu.

1 AKORINTHO 7:34

Mantû i maîrî. Na mûka ûra atarî na mûrûme kana mwarî ûra atakûrî akûgûrwa eegagua akîrutîra Mwathani ngûgî rîonthe. Aûmagia akara arî ûmûtheru kîîmwîrî na gîînkoro. Îndî mûka ûra mûgûre eegagua arî na ngûgî cia kîînthîgûrû cia kûruta, agîcûûgia gûkenia mûrûme wake.

2 AKORINTHO 10:8

Mbaragia nkeneete mûno i watho bûra Mwathani atwete, ta bu watho bwa kûbûkûria na ti bwa kûbwînyangia. Kwoogu ntikwîgua rîrî îgi kuuga ûgu.

2 AKORINTHO 3:12

Kwoogu, n'ûntû tûrî na wîrîgîîro bûbu, tûrî na ûcamba bûûnene mûno.

2 AKORINTHO 4:10

Magiita monthe wîgagua tûrî ûgwatiini bwa kûûragwa ta Yiesû kaingo inya ya mwoyo wake yonekana bwega naati.

2 AKORINTHO 5:15

Kîrîstû aakuîrîîre antû bonthe kaingo bara barî mwoyo batigaatûûre n'ûntû bwa mantû maao bongwa, îndî ibatûûre kûrutîra ngûgî ûra aabakuîrîîre na aariûka.

2 AKORINTHO 7:14

Indeerire Tito bûra bûnkeneetie. Na ibwonanîîtie wabu i nkeneete. Bûra bunthe twabwîrire n'ûmma. Na ibwonanîîtie mantû mara twerire Tito wabu i ma mma.

2 AKORINTHO 7:4

Inkûbwîtîgia mûno na nwa ndîkumîrie biû. Ibûmbûmagîîria mûno nkeegua nkeneete mûno mathîînaani mara monthe tûrî na mo.

APIRIPI 1:14

Na n'ûntû bwa kûthaîkwa gwakwa, eetîgîri baingî ibagîîte ûcamba mûno na batigûkuthûka gûtûmîîria ntheto cia Ngai.

APIRIPI 2:17

Na wana kinya ûkeegua inkwîrwa mbûragwe mbûyûrîîrie kîgongwana kîa ngûgî yenu kîra bûrutagîra Ngai n'ûntû bwa wîtîgio bwenu nwa nkene. Na kwoogu ingûkeneera bûgîkeneera bwinthe.

AKOROSAI 1:24

Inkeneete i bûra nnyamaaraga n'ûntû bwenu nkîûyûrîîria kûnyamaara kûra mwîrî wa Kîrîstû ûbatîîrue ûnyamaara kinya îîndî. Mwîrî wa Kîrîstû i kanica. Na mathîîna mama mwîrî wakwa wonaga, wonaga mo n'ûntû bwa kanica.

1 ATHESARONIKE 5:23

Itûkûromba Ngai ûra atweyaga ûkiri abûtuîkithie baatheru na njîra cionthe. Itûkûromba atûme nkoro cienu na mîîrî yenu îkarage îtarî na mabîtia, mwanka rîra Mwathani wetû Yiesû Kîrîstû agaacooka.

1 PETÛRÛ 4:16

Îndî t'îgi muntû kûnyamaarua n'ûntû bwa kwîgua i mûthingati wa Kîrîstû. Kumia Ngai n'ûntû bwa kûgwetanîrua na riîtwa rîru.

1 NJOANA 2:28

Kwoogu îîndî, aana baakwa, karagaani bûrî ndeni ya Kîrîstû kaingo ntugû îra agaacooka tûtikaaye kwîgua nthoni kana ûguaya.