O̱no̱zzo̱k 14:7 - Tennet

⁷ Egereny zin enne muluwe ci a̱ppwe̱ azi ne, “O̱to̱ngo̱o̱ltte̱ Ta̱mu̱ta̱dde̱n kar i̱di̱ngdi̱nga̱nni̱t nonno, eci i̱ki̱ya̱ i̱i̱te̱ni̱ ci okko enne ettedik ol lo̱ki̱ko̱. I̱di̱ngdi̱nga̱nni̱t nonno wa eenyca ta̱mu̱-keng ki lo̱o̱c, ki nyatapar ci a̱ddi̱ki̱re̱ ki moren wak erenane.”

O̱no̱zzo̱k 14:7 ပူးပေါင်းရင်းမြစ်များ

Kananet 22:12

Izek zin anjilo nonno ne “Ma zin ogonik nonno gi̱i̱ imma. I̱yo̱ko̱ ka̱gga̱wa̱ ming o̱ngo̱o̱le̱ i̱nna̱ Ta̱mu̱ta̱dde̱n, eci iróng i̱nna̱ a̱ju̱ra̱ka̱ annit ngerunne ci o̱de̱ ṯok ko̱.”

Lu̱ge̱z 20:11

Eci Ta̱mu̱ta̱dde̱n adiman ta̱mu̱-keng ki lo̱o̱c, nyatapar ci a̱ddi̱ki̱re̱ ki kaal cik abak ecito bu̱k, kar abarik ki̱ye̱be̱z i̱i̱nya̱we̱ cik een turgerem. A̱mu̱yu̱k zin Manyi I̱i̱te̱n wa Yu̱bze̱nto̱ kar kaanyik kize i̱i̱te̱n ci a̱li̱le̱.

Ma̱te̱yo̱ 25:13

“I̱yo̱ko̱ zin, e̱re̱yyo̱ ju̱rru̱m, eci niga iróng a̱gga̱yyu̱ i̱i̱te̱n icima i̱i̱ ci okko Ngerrti E̱e̱to̱ obodak lo̱o̱c.”

Lu̱ka̱ 17:18

I̱llo̱i̱ e̱e̱ti̱ imma ci oboda ki̱ki̱ya̱ kaanyik Ta̱mu̱ta̱dde̱n zany ize i̱do̱ngo̱je̱ni̱t cu do̱ niko?”

Buk wa To̱ni̱a̱u̱ 14:15

“Gotonogget! Ma ogonnu kaal ne̱ko̱. Ke̱e̱ggi̱nna̱ naga ol cik diirik ki i̱yo̱ko̱ niga ko̱. Kanyahakung kaviyak cik abunna, kar utungtek kaal cik gerzek ko̱ lo̱o̱c, u̱tu̱gu̱z kaal cik abunna Ta̱mu̱ta̱dde̱no̱, wa bali eenyca ta̱mu̱-keng ki lo̱o̱c, eenyca nyatapar ci a̱ddi̱ki̱re̱ ki kaal cik aavtte ecito do̱o̱k.

1 Peturu 4:7

Ize ojon i̱i̱te̱ni̱ ci aṯurneke kaala veelek. I̱yo̱ko̱ zin, abunna ming egenyyu oroot, abunna bo̱do̱k ming okkomnu lawinta kak.

O̱no̱zzo̱k 11:13

Imma i̱i̱te̱ne̱ neci ele anyak looci ki̱rki̱ri̱k kar ce̱e̱zi̱ cik orog ci a̱ddi̱ki̱re̱ ko̱ lo̱lo̱i̱t cidici ku̱yu̱kte̱. U̱ru̱kte̱ ol cik e̱e̱ggi̱n i̱bbo̱nge̱t turgerem (7,000) ki̱ri̱ki̱ri̱ye̱ neci. Kar ol wak anyigzai aruge ko̱ ka̱bba̱ri̱te̱t ki̱di̱ngdi̱nga̱ni̱t Ta̱mu̱ta̱dde̱n ci aave ta̱mu̱-kenga.

O̱no̱zzo̱k 11:18

O̱mo̱zze̱ ol lo̱o̱co̱we̱ do̱o̱k; abarik i̱yo̱ko̱ i̱ki̱ya̱ mozinet cunne. I̱ki̱ya̱ i̱i̱te̱ni̱ ci ettedonik lo̱ki̱ko̱ ol balik a̱da̱i̱to̱, ki mucenet du̱cca̱k cigunnek ki a̱ri̱tto̱k cik zoz ci Ta̱mu̱ta̱dde̱no̱ ki ol cigunnek a̱li̱le̱ ki ol wak o̱ngo̱o̱le̱ zar cigunnek, ol cikidik ki ol wak a̱ddi̱ki̱re̱, kar atin Ta̱mu̱ta̱dde̱n kedez ol cik egerzanit lo̱o̱c.”

O̱no̱zzo̱k 15:4

Ngene atin ci iróng o̱ngo̱o̱li̱nni̱ i̱nne̱ta̱, Manyi, kar kanyahak di̱ngdi̱ngo̱n zar cigunnek? Eci i̱nne̱t do̱ ci a̱li̱li̱. A̱vvu̱ atin ol lo̱o̱co̱we̱ do̱o̱k kar ki̱vi̱ta̱ ki̱di̱ngdi̱nga̱nti̱ i̱nne̱ta̱, eci ol do̱o̱k icinnet zoz cunne abunna ko̱.”

O̱no̱zzo̱k 16:9

Ovoc zin a̱bu̱re̱zi̱ neci ol oroot zee kar zin ol kotorit zar cik Ta̱mu̱ta̱dde̱no̱, wa anyak komiz ci alame zerenin ne̱ko̱ do̱o̱k, abarik utuburet iróng ngen urta mu̱nye̱n cigge̱k kar ki̱di̱ngdi̱nga̱ni̱t nonno.

O̱no̱zzo̱k 18:10

O̱to̱ngo̱o̱ltte̱ zin nege zo̱ze̱ ci pirnanet cinne, kar atin kibilet reena kar ku̱tu̱lu̱zzo̱: “‘O̱lle̱ nonga! O̱lle̱ nonga ngatunne! Orog ci a̱ddi̱ki̱re̱ ye̱i̱, Babilon bai, orog ci anyak komiz do̱o̱k! I̱ki̱ya̱ li̱be̱ne̱t cunne i̱i̱ co̱de̱ ṯok niko!’

O̱no̱zzo̱k 18:17

Imma zin i̱i̱ co̱de̱ ṯok niko iditai kaala ne̱ke̱ ne lai!’ “Imma lo̱ddi̱ki̱re̱ wak amacuc baburnya ki ol wak eron ki nogo ko̱, ki ol wak amuda da̱i̱ne̱t cigge̱k nyatapar ci a̱ddi̱ki̱re̱, abile atin nege do̱o̱k reena many.

O̱no̱zzo̱k 18:19

Ovvo atin nege a̱ddu̱te̱k todowa o̱o̱tti̱ cigge̱k, kar zin komozte ku̱tu̱lu̱zzo̱: “‘O̱lle̱ nonga! O̱lle̱ nonga! Orog ci a̱ddi̱ki̱re̱, i̱go̱k ol do̱o̱k balik anyak i̱be̱t nyatapare ci a̱ddi̱ki̱re̱ ke̱ izeto nege i̱tto̱k kaale cik orog cu! Okkoye i̱i̱ co̱de̱ ṯok iditai i̱tto̱kze̱t ci orog neci veelek!

O̱no̱zzo̱k 19:5

I̱ki̱ya̱ zin mului lecere ci alaano, azi ne: “Kinnatit Ta̱mu̱ta̱dde̱n wanna, niga du̱cca̱ha̱ ciginnek do̱o̱k, niga ol wak o̱ngo̱o̱li̱nnu̱ nonno, ol cikidik ki ol wak a̱ddi̱ki̱re̱!”

O̱no̱zzo̱k 4:11

“Elenonu i̱nna̱ ki di̱ngdi̱nga̱ni̱ne̱t Manyitinna Ta̱mu̱ta̱dde̱n, kar ruba di̱ngdi̱ngo̱n ki inatinet ki doiz, eci i̱nna̱ eteehenya kaal do̱o̱k, kar zin zo̱ze̱ cunne keteehenycai kaala do̱o̱k kar zin ka̱vvu̱to̱ to do̱o̱k.”

O̱no̱zzo̱k 4:9

Gon ming ovvo kaala ne̱k aruge e̱e̱ggi̱n we̱c ko̱ ovvo aanyik di̱ngdi̱ngo̱n, bak o̱ngo̱o̱le̱ kar kanycik zany E̱e̱t ci aave lecere ci alaanzetinu ko̱, nonno ci abak udut,

O̱no̱zzo̱k 8:10

Utubu zin anjilo wa een i̱i̱yo̱ ko̱ ture cinne, kar zin munyunyoci ci a̱ddi̱ki̱re̱ alanyit kiwagon urezi ki̱tta̱ mer ta̱mu̱-kenga, ki̱ta̱k moren lo̱lo̱i̱t cikidik ki ngintik anyak ebere cik maamu.