1 Ko̱ri̱nto̱ 11:26 - Tennet

²⁶ Ming adakku umune cu kar uudet merte cu, uwakku niga zoz ci daiz ci Manyi Ye̱su̱ zee kobodak enne lo̱o̱c.

1 Ko̱ri̱nto̱ 11:26 ပူးပေါင်းရင်းမြစ်များ

Kaviyak wak Abunna Ta̱mu̱ta̱dde̱no̱ eher Joni 14:3

Ming kuwa kidimanneung lo̱o̱c, koboda atin abunna ming kokko kokkoyyung bu̱k, kar niga bu̱k abait ngati kabahe anna.

Kaviyak wak Abunna Ta̱mu̱ta̱dde̱no̱ eher Joni 21:22

O̱bo̱de̱k Ye̱su̱, Peturu, “Ming korongi nonno kurug zee koboda anna, nya ci a̱u̱ce̱ zinine cunne? Abunna ming anuyan.”

Kaviyak wak Abunna Ta̱mu̱ta̱dde̱no̱ eher Joni 21:23

Uzuca zoz gotonogget wak a̱tu̱we̱ azi ne iróng nuyaiti wa irez Ye̱su̱ ko̱ a̱da̱i̱. Ma̱i̱je̱ Ye̱su̱ ngen kize ne iróng enne a̱da̱i̱; azi abarik ne, “Ming korongi anna nonno kurug kobodak anna lo̱o̱c, nya ci gerze ngatinno̱ng?”

Buk wa To̱ni̱a̱u̱ 1:11

Azi nege ne, “Ol cik Ga̱li̱li̱, abillu ette ngatu angamniku ta̱mu̱-keng nya? Ye̱su̱ cu ele, ci odonge ngatinno̱ng uk ta̱mu̱-kenga ko̱, okko atin oboda go̱o̱le̱ ci acinnu niga nonno ming okko ta̱mu̱-kenga ko̱.”

1 Ko̱ri̱nto̱ 15:23

Ogone atin kaala ne̱ko̱ i̱i̱nya̱we̱ cik aavtte do̱ do̱ olle do̱o̱k. Ki̱ri̱sto̱ bali ci ingazi daiza oowa, ovvo zin ol ciginnek a̱tu̱ nonno ko̱ ingazi daiza ming okko enne obodak lo̱o̱c.

1 Ko̱ri̱nto̱ 4:5

Iróng abunna ming apahekku niga ol ba̱ci̱nno̱k, aanycik nogo kerec i̱i̱te̱n wa ettede ol lo̱ki̱ko̱; e̱re̱yyo̱ ki̱ki̱ya̱ Manyi. Imma i̱i̱te̱ne̱ ci okko Manyi obodane, i̱ye̱la̱ atin enne kaal cik a̱lu̱gnye̱ ki̱ye̱lta̱i̱ ngati voori veelek, kar ki̱ti̱ri̱wa̱ kaal cik aavtte zi̱nze̱tti̱nne̱ cik ol cik diirik. I̱i̱te̱n neci okko Ta̱mu̱ta̱dde̱n irez e̱e̱t go̱o̱le̱ ci abahe enne.

1 Te̱se̱lo̱ni̱ka̱ 4:16

Eci Manyi Ye̱su̱ eliya alucak lo̱o̱c ta̱mu̱-kenga kar ddi̱ki̱ryo̱i̱ti̱ ci anjilonyau kozoz muluwe ci a̱bu̱le̱, kar zin ol kiziyet ture ci Ta̱mu̱ta̱dde̱no̱ ming abuwe. Ma̱i̱je̱ ol balik a̱da̱i̱to̱ ngati elemtta zoz ci Ki̱ri̱sto̱ ke̱, ingazi atin daiza kuruget.

2 Te̱se̱lo̱ni̱ka̱ 1:10

Akane atin de̱zi̱ne̱t necu ming okko Ye̱su̱ oboda kataltal ele ngati ol wak a̱li̱le̱ a̱tu̱ zoz cinne kar ko̱to̱ngo̱o̱ltte̱ nonno. Kar ol balik a̱tu̱ nonno katalit. Iddonginu atin niga bu̱k ki ol ne̱ke̱, eci a̱tu̱yyu̱ zoz bali kuwahekkung obod ki Ye̱su̱ ke̱.

I̱bu̱ru̱ 9:28

Imma zin i̱yo̱ko̱, a̱da̱i̱ Ye̱su̱ Ki̱ri̱sto̱ lak co̱de̱ kize wawac ci aara ol cik meelek mu̱nye̱n. Obodak atin enne lo̱o̱c kar ki̱ki̱ya̱ kanyahak ti̱ri̱ze̱ne̱t ol wak ere nonno.

2 Peturu 3:10

Abarik atin i̱i̱te̱ni̱ ci Manyi a̱kku̱ kiwagon ogoryaiti, iróng e̱e̱ti̱ imma a̱gga̱. Okko i̱i̱te̱ne̱ neci a̱zze̱ atin ta̱mu̱-kengi ne dakdak. Imma koor ki nye̱lo̱k ki munyuny atuze gwo̱o̱ya̱ ne lai. Atuze atin looci ki kaal do̱o̱k wak aavtte lo̱o̱ta̱ ngatu ko̱ ne lai, kar kaala do̱o̱k ki̱ye̱lta̱i̱.

1 Jon 2:28

Dooli wagannik tu̱we̱nta̱, urumet zi̱nze̱tti̱ ciggo̱k nga̱to̱de̱ ki Ki̱ri̱sto̱. Kar ming okko enne obodak lo̱o̱c, karike naga nonno zi̱nze̱tti̱ de̱de̱, iróng atin a̱li̱ya̱ni̱ adaketa.

Ju̱da̱ 1:14

Imma e̱e̱ti̱ ci een zara Enok wa een do̱le̱c ci do̱le̱c ci Adami, u̱du̱wa̱ zoz ci ol ne̱ko̱: “Icinnet, a̱kku̱ Manyi ki ol ciginnek a̱li̱le̱ meelek giir,

O̱no̱zzo̱k 1:7

Icinnet, orkora enne ki di̱i̱z, kar ebere do̱o̱k kicinnet atin nonno, acin rok ol balik akati nonno; anyak atin olli lo̱o̱tu̱ do̱o̱k u̱lu̱wa̱ zo̱ze̱ cinne. De̱de̱, ogone atin! Amen.

O̱no̱zzo̱k 22:20

Okko e̱e̱ti̱ ci ibbac kaal ne̱ko̱, azi ne, “I̱i̱ny, ka̱kku̱ni̱ anna ataman.” Nonno nenen, i̱jja̱, Manyi Ye̱su̱.