Ibrani 1:3 - Tetun

³ Niakaan Oan neꞌe natudu Maromak Niakaan kabaas, hanesan loro matan sinak mak tubu nosi lalenok. Niakaan ilas, oin ida no Maromak. Hodi Niakaan Manfatin makaꞌas, Nia nalaꞌo hotu-hotu iha laleꞌan no raiklaran. Nia moos loke dalan atu kasu mohu ema raiklaran salan, nebee sia dadi moos. Hotu Nia namaan aan saꞌe baa laleꞌan, tuur nabesi aan iha Maromak sorin kwana iha fatik mak kneter kaliuk.

Ibrani 1:3 ပူးပေါင်းရင်းမြစ်များ

Mateus 22:24

“Ama Manorik! Bei Musa nakerek nela baa ita ema Yahudi, ukun-badu ida naꞌak: kalo mane ida mate nela feen, mais la noo oan, alin musti nola feto faluk nia, nebee foo husar-binan baa maun mak mate nia.

Markus 16:19

Yesus dale notu no Niakaan maktuir sia, Naꞌi Maromak moos foti saꞌe Nia baa laleꞌan. Iha nia, Nia nabesi aan iha Naꞌi Maromak liman kwana nodi kaer ukun namutuk no Naꞌi Maromak.

Yohanis 1:14

Naꞌi Maromak Manfatin dadi baa ema raiklaran. Nia tuur heik iha itakaan klaran. Ita hobun Niakaan kabaas, tan Nia, Naꞌi Maromak Oan mesak mak kabaas manesak no Aman. Nia natudu laran diꞌak baa ita, tan lisan nunia tebes. Nia nanis tebes no loos.

Yohanis 1:29

Baa awan, Yohanis naree Yesus mai baa sia. Hotu Yohanis dale naꞌak, “Mana lai! Bibi malae oan mak Naꞌi Maromak nadiꞌa kedan, Nia mai tiꞌan. Nia mak atu dadi sera, kasu ema raiklaran salan.

Yohanis 1:4

Nia, mak Moris Huun. Nia moos, Kroman maksinak naroma ema neon.

Kristus Klosan Lian 2:33

Oras neꞌe Niakaan Ama Maromak foti Nia kaer beran mak aas kaliuk. Nia nabesi aan iha Naꞌi Maromak sorin kwana iha fatin mak Naꞌi Maromak nadiꞌa kedan tiꞌan bodik Nia. Niakaan Ama moos foo Kmalar Lulik baa Nia, tuir saa mak Nia nameno kedan hori uluk. Oras neꞌe Niakaan Kmalar Lulik nia moos tuun baa ami. Lia mak emi rona no haree ohin nia, neꞌe mak Naꞌi Maromak foo Niakaan Kmalar Lulik.

Kristus Klosan Lian 7:56

Hotu nia dale naꞌak, “Nuneꞌe, ama sia. Haꞌu karee laleꞌan nakloke. Ema Raiklaran Isin noꞌi nariik iha fatin kneter kaliuk iha Naꞌi Maromak sorin kwana.”

Roma 1:16

Haꞌu la kmoe keke Yesus Manfatin Diꞌak. Tan Manfatin nia nodi Naꞌi Maromak beran sori nola ema hotu-hotu nosi sala. Ema Yahudi sia rona uluk Manfatin nia, foin ema klubun seluk sia.

Roma 8:34

Arumak emi haneo haꞌak, sei noo ema mak bele dale naꞌak, Naꞌi Maromak musti kastikar ita ka? La noo! Naꞌi Maromak la kastikar ita ona, tan Nia boi ita tiꞌan, no Yesus Kristus mate selu nola ita. Liu tan tenik, Naꞌi Maromak nalo Yesus moris nikar, hotu foti Nia nebee nabesi aan baa fatin kneter kaliuk iha Naꞌi Maromak sorin kwana. Iha nia, Yesus namulak bodik ita.

2 Korintus 4:4

Oras neꞌe, ema waꞌin naloon baa diabu ulun. Nia nalo balu kakutak naktomak, toꞌo neon naktomak no la fiar baa Naꞌi Maromak. Tan siakaan matan delek nunia, sia la bele naree Naꞌi Maromak Niakaan sinak. Sia la simu Lia Diꞌak nosi Kristus mak mai naroma sia. Masik Kristus ilas ida no Naꞌi Maromak, sia la titu.

Kolose 3:1

Naꞌi Maromak foo moris foun baa emi tiꞌan, nuꞌu Nia nalo emi moris hikar hamutuk ho Kristus. Oras neꞌe, Kristus nabesi aan baa fatin kneter kaliuk iha Naꞌi Maromak sorin kwana. Etuk, emi musti hanoin lia mak fatan no Kristus neon.

Titus 2:14

Nia latan isin lolon atu sori ita nosi sala. Nia namoos ita, nebee ita fatan dadi baa Niakaan ema mak nalo lia diꞌak nohuun.

Ibrani 1:13

Naꞌi Maromak moos dale baa Niakaan Oan naꞌak, “Oa! Mai tuur iha fatik kneter kaliuk iha Haꞌukaan sorin kwana neꞌe. Haꞌu atu kalo Okaan funu sia toꞌo loꞌu baa O.” Naꞌi Maromak dale kedan nunia nosi lia Niakaan Oan, mais Nia la dala ida dale nunia nosi lia Niakaan makbukar laleꞌan sia.

Ibrani 10:12

Mais itakaan naꞌilulik boot Kristus, latan isin lolon duꞌuk nodi mate dadi sera bodik ita. Nodi dadi sera isin ida dei, Nia loke dalan atu soe mohu itakaan salan hotu-hotu. Nunia hotu, Nia namaan aan saꞌe baa nabesi aan iha Naꞌi Maromak sorin kwana, iha fatin mak kneter kaliuk.

Ibrani 12:2

Ita moos musti hatutuk matan baa Kristus dei, keta titu karuk-kwana. Nia mak loke dalan nodi tulun ita, nebee ita bele fiar baa Naꞌi Maromak. Hanoin ka, lale? Baa oras Yesus terus susar iha ai karuus, ema tolak nahaat Nia, mais Nia naterus aan bei-beik. Nia natene, kalo susar nia siku, Niakaan neon diꞌak ona. Lia nia tebes. Nia mate, hotu Naꞌi Maromak foti Nia atu nabesi aan iha Naꞌi Maromak sorin kwana, nebee Sia rua kaer ukun bele-bele.

Ibrani 4:14

Ita bele kaer metin itakaan fiar, tan Naꞌi Maromak Oan Yesus dadi tiꞌan baa itakaan naꞌilulik boot. Nia makaꞌas liu naꞌilulik seluk sia, tan Nia tama laleꞌan tiꞌan nodi naloos kedan ita iha Naꞌi Maromak oin.

Ibrani 7:27

Tan lia nia, Yesus diꞌak liu naꞌilulik boot tuan sia hotu-hotu. Uluk, naꞌilulik boot tuan sia musti sera duꞌuk sera tunun sura loron, nebee Naꞌi Maromak kasu mohu siakaan salan. Foin sia bele nalo sera bodik ema seluk. Mais Yesus la nalo hei-hein nunia, tan Nia latan isin lolon duꞌuk dadi baa sera dala ida dei. Sera nia toꞌo tiꞌan, bodik Naꞌi Maromak kasu mohu ema raiklaran salan.

Ibrani 8:1

Lia isin nosi lia mak haꞌu kdale neꞌe sia, nuneꞌe: oras neꞌe, ita hoo naꞌilulik boot mak makaꞌas liu naꞌilulik boot uluk sia. Nia, mak Yesus. Nia nabesi aan kaer ukun iha laleꞌan, iha Naꞌi Maromak Mak Aas Kaliuk sorin kwana.

Ibrani 9:16

Haꞌu kodi knaninuk kosi ema simu bein sasoin. Noo ama ida nalo hakerek latan sasoin bodik oan. Mais oan foin bele simu nola sasoin nia, kalo aman mate tiꞌan.

Ibrani 9:26

Kalo Nia musti tama sura tinan hanesan naꞌilulik tuan sia, neꞌe naꞌak, Nia musti mate rua-ruan hori raiklaran foin nahuu toꞌo oras neꞌe, nebee Nia kasu mohu ema hotu-hotu salan. Mais, Nia la nalo nunia. Tan Nia dadi sera isin ida dei, nodi hoꞌas lakon ema hotu-hotu salan.

1 Petrus 1:21

Tan Kristus Niakaan hahalok nia, emi bele diꞌa-diꞌak ho Naꞌi Maromak. Nia mak nalo Kristus moris nikar, nodi foti-nahaas Kristus, nebee emi bele fiar hodi haloon baa Nia.

1 Petrus 3:22

Oras neꞌe, Yesus namaan aan saꞌe baa laleꞌan tiꞌan. Iha nebaa, Nia nabesi aan iha fatin mak kneter kaliuk iha Naꞌi Maromak sorin kwana. Tan lia nia, makbukar laleꞌan sia, makaer ukun sia, no makaer beran hotu-hotu, musti nanono baa Nia.

2 Petrus 1:16

Uluk, haꞌu ko haꞌukaan mamaluk sia katak baa emi hosi itakaan Naꞌin Yesus Kristus. Ami moos katak haꞌak, nosi ikus, baa oras Nia namaan aan mai nikar, Nia atu mai nodi beran makaꞌas kaliuk. Saa mak ami katak nia, ami hatene tan ami haree hodi matan duꞌuk baa oras Yesus sei namutuk no ami. Lia nia, lahoos lia aikanoik.

2 Petrus 1:17

Baa loron nia, ami hamutuk ho Yesus iha Naꞌi Maromak Niakaan foho lulik leten. Hotu Ama Maromak duꞌuk katak nosi Yesus Niakaan makaꞌas baa ami. Iha foho lulik leten nia, ami rona lia maliak ida mak kabaas kaliuk. Lia maliak nia sai nosi laleꞌan nodi naꞌak, “Ema neꞌe, Haꞌukaan Oan mak Haꞌu kadomi. Nia nalo Haꞌu neon diꞌak.”

1 Yohanis 1:7

Mais kalo ita moris tuir dalan loos, neꞌe naꞌak, ita moris iha Naꞌi Maromak kroman. Hodi nunia, ita bele moris neon ida, laran ida. Itakaan neon dadi moos, tan oras Naꞌi Maromak Oan Yesus mate, Nia nodi raan kasu mohu itakaan salan hotu-hotu.

1 Yohanis 3:5

Emi hatene tiꞌan haꞌak, Kristus mai raiklaran neꞌe atu kasu mohu itakaan salan. Nia duꞌuk la noo sala.

Yudas 1:25

Nia mesan, Maromak mak loos. Nia mesan mak sori ita nodi itakaan Naꞌin Yesus Kristus. Ita foo kneter hotu-hotu baa Nia. Nia makaꞌas kaliuk. Niakaan beran boot kaliuk. Nia kaer ukun hotu-hotu, hori uluk, baa oras neꞌe, toꞌo nima-nimak. Tebes! Nosi haꞌu, Yudas

Lia Raiklaran Falu Fila 3:21

Ema mak tuir Haꞌu toꞌo mate, Haꞌu klatan beran baa nia, nebee tuur kaer ukun namutuk no Haꞌu. Tan Haꞌu moos katerus aan tuir Haꞌukaan Ama, oras neꞌe Haꞌu ktuur kaer ukun kamutuk ko Nia.

Lia Raiklaran Falu Fila 4:11

“Aaa, Naꞌi Maromak! Ami tonu-haboot Ita Boot! Ami foti-hahaas Ita Boot naran. Ita Boot mak amikaan Naꞌin. Ita Boot mak amikaan Maromak! Ita Boot mak fatan simu amikaan tonun. Ita Boot mak fatan simu amikaan kneter. Tan, Ita Boot mak Beran Kaliuk. Tan, Ita Boot mak Boot Kaliuk. Ita Boot mak haseꞌi hotu-hotu. Ita Boot mak halo hotu-hotu moris. Hotu-hotu mak iha, dadi tan Ita Boot mak haseꞌi. Hotu-hotu mak moris, noo nawan tan Ita Boot mak foo.”