1 TESALÓNICA 5:9 - Tepehua Huehuetla

⁹ Pus lai calhilaksiyau ju Dios ni aquintamak'alhtaxtuyan ni jantu quintalhilhca'ulanin ju Dios ni va camak'alhk'ajnank'alhiyau. Para quintalhilhca'ulanin ni catak'alhtaxtuyau va ixlaca'atalh qui'ucxtin'an Jesucristo.

1 TESALÓNICA 5:9 ပူးပေါင်းရင်းမြစ်များ

MATEO 26:24

Pus akts'iya acniya' tachi ju ts'okcanta la'ixchivinti Dios ju quilacata. Quit'in ju quimalakachatachilh Dios ni lapanac actsucuya' ju ani. Para painich ju anu' lapanac ju aquimak'axt'ak'a'. Palai k'ox ca'ixva ni jantu ca'istsuculh ju anu' jok'at.

IXTAMALAKACHAN JU JESÚS 1:20

Pus chanich ju ts'okcanta laxa'alhiqui ju Salmos junta ma lhichivinincalh ju Judas: Chach va is'akstu taya ju ixchaka' chai jantu xamati' catsuculh ju anch. Chunch ma najun. Chai alacatam ma chani najun: Chach tanuchokolh apumatam la'ixlhich'alhcat. Chunch ma najun junta ts'okcanta.

IXTAMALAKACHAN JU JESÚS 1:25

Aquilamasuniuch tamalhch ju sacxt'ut'ach ju uxint'i ni mintamalakachan cava chai ca'amaklhtayanalh ju la'ixlhitai ixjunita ju Judas. Ju Judas ni taxtulh ni va alactu'unulh chai ank'alhi ju lacajipi junta akts'iya istasq'uini ni ca'alh. ―Chunch ju tajuni ju Dios.

IXTAMALAKACHAN JU JESÚS 13:48

Pus ju yu'unch ju jantu israelitanin ixtajunita acsni tak'asmatlh ju ixchivinti Pablo na talhik'achalh. Ixtanajun ni na k'ox ju chivinti ixlacata ju k'ai ucxtin Jesús. Chai talaca'i tachi chun ju isacxtuta ju Dios ni laich ca'alilh ju is'atsucunti'an ju lactiyan.

ROMA 11:30

Ju uxijnan vachu' ix'alin avilhchan acsni jantuca' ixlac'a'iniyat'it ju Dios. Para ju chavai ju Dios ta'aktaijutan laca'amapaininti va ixlaca'atalh ni jantuch talaca'ita ju quint'a'israelitanin.

ROMA 11:7

Pus acsni iclajunau ju chunch va iclamavasalaniputunau ixlacata ju quint'a'israelitanin. Ju yu'unch jantu talhitajuta ju salaka ix'alhunut'an ju ixtapuxcajui. Va lacats'unin ju quint'a'israelitanin ju talhitajuta. Va yu'unch ju asacxtutach ju Dios. Chai ju ali'in alap'asninicalh ju ix'alhunut'an.

1 TESALÓNICA 1:10

Vachu' ju uxijnan p'acxanat'it ju ists'alh Dios ju caminanta lact'iyan. Yuchach ju malok'onilh ju Dios acsni ixnita. Yuchi ju Jesús ju aquintamak'alhtaxtuyan ni jantu camak'alhk'ajnanauch tachi ju catamak'alhk'ajnana' ju ali'in acsni ca'amalacasuniya' ju ixtalhk'amti ju Dios.

1 TESALÓNICA 3:3

Ju chunch jantu xamati' lai catamak'antalhanayan ixlacata junima mak'alhk'ajnat. Pus uxijnan mi'akstu'an c'ats'ayat'it ni chunch ju lhilhcanicantauch ni camak'alhk'ajnanau ju quijnan'an ju lhilaca'antauch ju Jesús.

1 TIMOTEO 1:13

Chunch qui'ulhtulh ju Jesús mas na macxcai xaclhichivinin ju Dios ju mak'anchich chai xac'alhimakchapui ju ixtalhilaca'anta ju Cristo chai na macxcai chivinti xac'ajuni. Para ju Dios qui'aktaiju laca'amapaininti va ixlaca'atalh ni jantu xacmachakxai tuchi xacnavi acsni tuca' xaclhilaca'anta ju Cristo.

1 TIMOTEO 1:16

Pus ju Jesucristo ix'apumalacasuniputun ju lapanacni laqui'atsucunti ni jantu tavanan jeks ui ju yuchi. Yuchi xaquilhi'aktaijui ju quit'in laca'amapaininti mas palai na xac'alactu'unun ju quit'in. Chai astan cata'alina' ju lapanacni ju vachu' catalhilaca'ana' ju Jesucristo chai ixlhiyuchi ca'alina' ju is'atsucunti'an jonk'alhita lact'iyan.

2 TIMOTEO 2:10

Chai yuchi chux iclhimak'alhk'ajnan va ixlacata'an ju asacxtulh ju Dios. Chai ju chunch ju yu'unch lai catatak'alhtaxtuya' ni catalhilaca'ana' ju Cristo Jesús. Chai vachu' laich catat'atolhk'alhiyanta ju Cristo ju lact'iyan.

1 PITALU' 2:10

Pus ju mak'anchich jantu uxijnan ju tasacxtun ju Dios. Alai ali'in ju asacxtucalh. Para ju chavai ixlapanacni Dios unt'at'it. Ju mak'anch jantu ix'akt'ai'uc'ant'at'it laca'amapaininti. Para ju chavai ju Dios ta'aktaijutan la'ix'amapaininti.

1 PITALU' 2:8

Chai ju Dios vachu' najun ni vachu' valh ju Cristo tachi ju tu'u' chiux ju puk'alhk'oscan chai tachi ju tu'u' lhkajani chiux ju lai puta'akk'ajucan. Pus tachi ju va tapuk'alhk'os ju Jesús ni jantu taquiclaca'iputun ju ixchivinti Dios. Chai ju Dios alhcata ni catak'alhk'osa' ju chunch talai.

2 PITALU' 1:1

Ju quit'in icSimón Pitalu'. Ju quit'in xalapanac icjunita la'ixmacni ju Jesucristo. Chai ixtamalakachan icjunita. Va iclamac'amiyau ju uxijnan ju ta'aktaijutan ju Dios ni laich vachu' xalhilac'ap'inat'it ju Jesús. Pus ju quijnan chai vachu' ju uxijnan na tu'u' lhiulayau ni lai lhilaksiyau ju Dios. Pus ju quiDios'an chai ju qui'amak'alhtaxtunu'an Jesucristo sok tanavi acsni talacasq'uin ni tak'alhtaxtuyau acsni lhilaksiyau ju Jesús.

2 PITALU' 2:3

Chai ni na talhaccha'aniyan pus cata'a'okxchok'omaxtuniyan ju mintumin'an la'ixchivinti'an. Pus ni ak'asmatnit'it tachi ju va stavasalanti alhiulat'it. Para mak'anchich ix'amuc'anicanta ixtalak'alhin'an chai akts'iya ca'alina' ju ixmak'alhk'ajnat'an ju jonk'alhita.

JUDAS 1:4

Tasq'uini ni aclajuniu ni jantu xanaviyat'it cuenta acsni tavanan sek tatanucha lamilhi'uxijnan ju ali'in lapanacni. Ju yu'unch lana jantu tatalhoni ju Dios. Chai tanajun ni va ixlaca'atalh ni na lai navi lamapainin ju Dios pus yuchi lai lhinavican lhu ju alactu'unti. Pus acsni tanajun ju chunch va jantu vas tachivinin acsni tanajun ixlacata ju Jesucristo. Para ju quijnan'an ixlapanacni juntau chai va yuchach ju qui'ucxtin'an junita. Pus mas chunch talai ju yu'unch para mak'anchich ists'ok'ulacanta ni camamak'alhk'ajnicana' ju lapanacni ju chunch tajunita.