Romano 11:22 - Tachi Ak'õre Pedea

²² Minachia k'ɨ̃risiat'ɨ sãmaasã́ Tachi Ak'õrepa ichi sõpiadepa k'aripapari mãɨnepa sãmaasã́ ɨtɨapari. Judiorãpa ĩjãanaé pasi pẽra Tachi Ak'õrepa ɨtɨak'ari ãchi itu bɨsima. Mãɨne mãra judiorãwẽ ichi sõpiadepa k'aripa bɨma mãɨnepa k'aripa baipɨ. Maamina mãɨnepa p'ananai p'anɨma. Mãrapa ĩjãa p'ananaiwẽpɨra, Tachi Ak'õrepa mãra sida ɨtɨak'ari itu bɨipɨ pak'uru jua t'ɨat'uk'oaru jĩra.

Romano 11:22 ပူးပေါင်းရင်းမြစ်များ

Luca 8:15

Maamina net'a tau ĩjũa piade baedapa nãɨ jara bɨma: sõ jĩp'a berãpa mãɨnepa k'ɨ̃risia pia berãpa Tachi Ak'õre pedea ũrinak'ari piarã ĩjãapatama. Ãchia ĩjãa p'anɨ itu bɨdak'a pẽra nepia oopatama.

Juan 15:2

Mɨ pak'uru jua chaudak'aɨ ichia mãɨ t'ɨat'uparima, maamina chi chaupataɨ pak'uru jua mãɨ t'ɨat'uparima atepe chaudamẽrá.

Juan 8:31

Maapae Jesupa judiorã ichide ĩjãautarã́ jarasima: —Mãrapa mɨ pedea ĩjãa p'ananaipɨra, piarã mɨ ome p'ɨrrɨapataɨrã p'ananaipɨ.

Hecho 11:23

Mãɨ Bernabé ẽpẽra jĩp'a basima. Jesude minachia ĩjãa basima; Tachi Ak'õre Jaoredepa pia basima. Bernabé Antioquiade cheside unusima Tachi Ak'õrepa ichi sõpiadepa ũpẽarã k'aripa bɨt'a. Mãɨpuru minachia sõ arapaasima. Mãɨne ãareaɨrã́ jarapachima sõnepa ewaricha Tachi Chiparide piarã ĩjãanamẽrá. Mãɨya bɨde minachia p'anɨrãpa chi Tachi Chiparide ĩjãasidama.

Hecho 14:22

P'uurucha ũpẽarã k'aripapachidama Jesude minachia ĩjãanamẽrá. Chi ãchia Jesude ĩjãa p'anɨt'a itu bɨpidaemaapa nãɨya jarapachidama: «Tachi Ak'õre juade p'ananai k'orea ichidirã paara, nãɨ ĩjũane minachia mĩanaipɨ».

Romano 11:21

Judiorãpa ĩjãanawẽa p'anɨ k'orea Tachi Ak'õrepa ãchi itu bɨsima pak'uru jua t'ɨat'uru jĩra. Ara mãɨ jĩra mãra judiorãwẽpa ĩjãanaepɨra, Tachi Ak'õrepa mãra sida itu bɨipɨ.

Romano 2:7

Chi eda waapẽarãpa pia oo p'anɨma Tachi Ak'õrepa ãchi pia unumẽrá, pia jaramẽrá mãɨnepa ewaricha ãchi ome chok'ae bamẽrá. Mãɨrã piarã chok'ae p'anapiipɨ.

1 Corintio 15:2

Mɨa jarateada piarã ĩjãa p'ananaipɨra, Tachi Ak'õrepa k'aripaipɨ. Mãɨyawẽpɨra, machia pari ĩjãasidama.

Gálata 6:9

Mãɨpuru sẽnawẽa nepia oo p'anat'ɨ. Sẽnawẽa p'anɨpɨra, Tachi Ak'õrepa bɨda ewaride tachia nepia atadaipɨ.

1 Tesalonicense 3:5

Mãɨ k'orea mɨa waa p'ue choawẽ pẽra Timoteo mãramá peesima wapida Cristode ĩjãa p'anɨ k'awai k'orea. Mɨa k'ɨ̃risia basima tiorepa mãrá Cristo itu bɨpisit'a. Mãɨyanapara taipa mãrá Cristo k'orea jarateadada pari beei pasima.

1 Tesalonicense 3:8

Jãapae tai piarã sõpia p'aneesidama, k'awa p'anɨ pẽra mãrapa Tachi Chiparide choa p'anɨt'a.

Hebreo 10:23

Tachi Ak'õre pedea auda pẽra tachia nɨ p'anɨt'a mãɨnepa mãɨ k'orea ãareaɨrã́ jara p'anɨt'a mi ãpia pida k'ẽet'aadaiwẽa p'anɨma.

Hebreo 3:14

Tachia naa ĩjãanaananepa aba piuutadea Cristode ĩjãa p'ananaipɨra, ichi ome p'ananaipɨ.

Hebreo 3:6

Maamina Tachi Ak'õre warra Cristo ichi ẽpẽrarã chiparipɨ. Ãchi ome jõma arí oo bɨma. Tachia Cristode ĩjãa p'ananaipɨra mãɨnepa ichidepa ne jitadai k'orea arapá nɨ p'ananaipɨra, Tachi Ak'õreneerãpɨ.

1 Juan 2:19

Ãchi tachi ome p'anana wãsidama, maamina piarã tachidepemawẽ pasima. Piarã tachidepema padapara, tachi ome wapida ará p'ananai pasima. Maamina mãɨyasima pia k'awadamẽrá jõmãɨrã tachidepemawẽt'a.

Apocalipsi 2:5

Mãɨpuru mãrapa naa k'ɨ̃ria uru p'anana mãɨne k'ɨ̃risiat'ɨ. Mãicha Tachi Ak'õremá chet'ɨ. Nepia oot'ɨ naena mãrapa oopachida jĩra. Mãra mãicha Tachi Ak'õremá chedaepɨra, mɨa mãra ɨtɨade wãipɨ. Mãɨne mãra ĩpira ãyá bɨipɨ.