P'ilipense 2:9 - Tachi Ak'õre Pedea

⁹ Mãɨ k'orea pajãne Tachi Ak'õrepa ichi chi atepe minachia k'awa bɨ bɨsima. Ichi ãarea Chipari bɨsima.

P'ilipense 2:9 ပူးပေါင်းရင်းမြစ်များ

Mateo 11:27

»Mɨ Ak'õrepa mɨá ara ichidepema ne ãarea k'awapisima. Abaɨ pida atua p'anɨma mɨ, chi Warra sãmaasã́ bɨ; aba mɨ Ak'õrepuru k'awa bɨma. Ara mãɨ jĩra abaɨ pida atua p'anɨma mɨ Ak'õre sãmaasã́ bɨ; abapuru mɨ, chi Warrapuru mãɨ k'awa bɨma. Mɨa abaɨa mɨ Ak'õre k'awapisira mãɨ ẽpẽra pida k'awaipɨ.

Mateo 28:18

Mãɨne Jesú ãchi k'ait'a chek'ari jarasima: —Tachi Ak'õrepa mɨá jua chaarea teasima pajãne mãɨnepa nãɨ ĩjũane ne ãarea mɨ juade uru bamẽrá.

Luca 10:22

»Mɨ Ak'õrepa mɨá ara ichidepema ne ãarea k'awapisima. Abaɨ pida atua p'anɨma mɨ, chi Warra sãmaasã́ bɨ; aba mɨ Ak'õrepuru mãɨ k'awa bɨma. Ara mãɨ jĩra abaɨ pida atua p'anɨma mɨ Ak'õre sãmaasã́ bɨ; abapuru mɨ, chi Warrapuru mãɨ k'awa bɨma. Mɨa abaɨa mɨ Ak'õre k'awapisira, mãɨ ẽpẽra pida k'awaipɨ».

Juan 13:3

Jesupa k'awa basima ichi Ak'õrepa ne ãarea ichi juade bɨsit'a, mãɨnepa k'awa basima ichi Tachi Ak'õremãɨpa chek'ari mãicha ichimá wãit'a.

Juan 17:11

»Mɨ nãɨ ĩjũane waa baiwẽma maamina ãchi nãɨ ĩjũane p'aneenaipɨ. Ak'õre, pɨ minachia pia bɨma. Mɨ pɨmá wãru pẽra pɨ t'ɨ̃nepa ãchi minachia ak'ɨ base. Pɨ t'ɨ̃nepa, mɨ mãɨya jua chaarea beepisima, ãchi k'ak'ua aba bɨ jĩra p'ananamẽrá, tachi k'ak'ua aba p'anɨ jĩra.

Juan 17:12

Mɨ nãma basi ewarimisa pɨ jua chaareadepa mɨa ãarea pɨa teadaɨrã ak'ɨ basima. Ãchidepemarã mi ãpia pida atuaé pasima. Abapuru chi atuai badat'a atuasima Tachi Ak'õre pedea jara bɨ jĩra piarã mãɨyamẽrá.

Juan 17:5

Mãɨpuru Ak'õre, mɨ pɨ k'ĩrari chi choma bɨse pɨ ome nãɨ ĩjũa ooi naena chi choma bada jĩra.

Hecho 5:31

Tachi Ak'õrepa Jesú ichi juaraari bɨsima Tachi Chipari mãɨnepa Tachi K'aripaparí bamẽrá. Ichidepa israel ĩjũanepemarãpa nemietá itu bɨdak'ari mãicha Tachi Ak'õremá p'ue chedaipɨ. Mãɨyara ãchia nemietá oodada Tachi Ak'õrepa k'ɨ̃risia atuaipɨ.

Ep'esio 1:10

ichia bɨda ewaride nãɨya ãarea ooipɨ: mãɨ ewaride ne ãarea pajãnepema mãɨnepa nãɨ ĩjũanepema Cristo juade bɨipɨ.

Colosense 1:18

Cristo ichi ẽpẽrarã chiparipɨ. Ichidepa ãchi p'anɨma. Ichi ewaricha chok'ae bai k'orea naa chok'ae p'irabarisima. Mãɨpuru ne ãarea k'aepẽra chi atepe bɨma.

2 Tesalonicense 1:12

Mãɨya mãra k'orea jõmãɨrãpa Tachi Chipari Jesucristo k'orea pia jaradaipɨ mãɨnepa ichidepa mãra k'orea pia jaradaipɨ, Tachi Ak'õrepa mãɨnepa Tachi Chipari Jesucristopa ãchi sõpiadepa k'aripa p'anɨ pẽra.

Hebreo 1:4

Mãɨya Tachi Ak'õrepa ichi chi ɨt'aripa peedaɨrã k'aepẽra atepe bɨsima. Tachi Ak'õrepa ichi t'ɨ̃ bɨda mãɨ ãchi t'ɨ̃ bɨda k'aepẽra atepe piipará bɨsima.

Hebreo 1:9

Pɨa k'ɨ̃riaparima ẽpẽerã jĩp'a p'ananait'a. Nemietá unuemaaparima. Mãɨpuru Tachi Ak'õre, pɨ Ak'õrepa ãarea pɨ ome p'anɨ k'aepẽra pɨt'a chi atepe bɨsima. Mãɨya pɨ minachia arapaapisima».

Hebreo 12:2

Jesude pia k'ɨ̃risiadai p'anɨma. Ichia k'aripasima tachia naa ĩjãanamẽrá mãɨnepa k'aripaparima ewaricha ĩjãa p'ananamẽrá. K'ɨ̃risiat'ɨ sãmaasã́ ichi k'urusude minachia mĩasit'a. Mãɨ k'orea p'erai badamina p'eraé pasima. Ichia k'awasima mãɨya nak'ari minachia arapá bait'a. Idiapae Tachi Ak'õre suak'a beeparí pia bɨ juaraari suak'abari bɨma.

Hebreo 2:9

Maamina Jesú k'orea k'awa p'anɨma. Tachi Ak'õrepa ichit'u nãɨ ĩjũane k'aepe bɨsima chi ɨt'aripa peedaɨrã k'aepẽra. Tachi Ak'õrepa ichi sõpiadepa mãɨya oosima Jesú jõmãɨrã k'orea piumẽrá. Minachia mĩak'ari piuda pẽra Tachi Ak'õrepa ichi pia bɨsima mãɨnepa chi atepe bɨsima.

1 Pedro 3:22

Mãɨ Jesucristo chok'ae p'irabarik'ari, pajãnea wãk'ari Tachi Ak'õre juaraari bɨma. Jõma Tachi Ak'õrepa ɨt'aripa peedarã, jõma jaore mietaarã chi atepe k'awa p'anɨrã, chi jua chaarea berã sida ichi juade uru bɨma.

2 Pedro 1:17

Tachi Pajãnepema Ak'õrepa ichi k'orea pia jaraside mãɨnepa chi atepe unupiside tai mãma p'anasidama. Mãɨne Tachi Ak'õre chi atepe minachia k'ĩrawãrea bɨpa nãɨya jarasima: «Nãɨt'a mɨ Warrapɨ. Mɨa ichi minachia k'ɨ̃ria bɨma. Mɨ ichi k'orea arapá bɨma».

3 Juan 1:7

Ãchi Jesucristo k'orea jarateade wãsidaɨde, chi Tachi Ak'õrene ĩjãanak'apɨɨrã́ ne ididaé pasima k'aripadamẽrá.

Apocalipsi 1:5

Mãɨnepa k'ɨ̃ria bɨma Jesucristo pida mãɨya oo bait'a. Ichia Tachi Ak'õre k'orea piarã jaraparima. Piu bada naa chok'ae p'irabarisima, ãarea nãɨ ĩjũanepema chi poro jũra jɨ̃parí jɨ̃ p'anɨrã k'aepẽra chi atepe bai k'orea. Mãɨpa tachi k'ɨ̃ria bɨma mãɨnepa ichi oadepa nemietaadepema k'aripasima.

Apocalipsi 11:15

Tachi Ak'õrepa ɨt'aripa peeda sietedepema chi k'aadea bɨpa ichi ãnimara k'achu chaasima. Mãɨne pajãne chok'ará nãɨya jĩk'ua pedeasidama: «Chi nãɨ ĩjũanepema poro jũra jɨ̃parí jɨ̃ p'anɨrãpa ãchi jua ek'ari naena uru p'anana, Tachi Chipari mãɨnepa ichi Cristopa mãɨ ãarea ãchi juade uru p'aneesidama». Idiipa naa Tachi Ak'õre ewaricha ãareaɨrã Chipari baipɨ.

Apocalipsi 19:16

Ichi anamari jɨ̃ bɨde ichi mak'ara ɨ̃rɨ nãɨ t'ɨ̃ bɨ uru bɨma: «Jõmãɨrã poro jũra jɨ̃parí jɨ̃ p'anɨrã k'aepẽra ichit'u chi Atepe Bɨpɨ» ichiaba «Jõmãɨrã chiparirã k'aepẽra ichit'u chi Atepe Bɨpɨ».

Apocalipsi 3:21

Mɨa nemietá p'ueda pẽra mɨ Ak'õre ome ichi suak'a beeparí auk'ará bɨde suak'abari beesima. Ara mãɨ jĩra nemietá p'uedaadarã mɨ suak'a beeparí auk'ará bɨde mɨ ome suak'abari beepiipɨ.

Apocalipsi 5:12

Nãɨya jĩk'ua k'ari p'anasidama: «¡Chi Oveja Chak'e peadada minachia pia bɨma! Ãareaɨrãpa pia pedeadai p'anɨma ichit'a mãɨ ichia ãarea jõma p'ue bɨẽra, mãɨnepa ãarea uru bɨẽra, mãɨnepa ãarea k'awa bɨẽra mãɨnepa jua chaarea bɨẽra. Ichit'u chi atepe bɨade a jaradai p'anɨma mãɨnepa chi piipará bɨade a jaradai p'anɨma».