Marco 9:24 - Tachi Ak'õre Pedea

²⁴ Ara mãɨne chi ak'õrepa jĩk'ua jarasima: —Mɨa ĩjãa bɨma maamina k'aripase mɨa pia ĩjãai k'orea.

Marco 9:24 ပူးပေါင်းရင်းမြစ်များ

Marco 9:23

Mãɨne Jesupa jarasima: —Pɨa ¿sãmaasã́ “mɨa p'ueima” a bɨma? Chi ĩjãa bɨpa ne ãarea p'ue bɨma.

Marco 9:25

Jesupa ẽpẽerã ará minachia cheuta ununa pẽra chi jaore mietá nãɨya ɨtɨasima: —K'ɨɨrɨ k'iipiparí mãɨnepa k'ĩrame t'urraapiparí jaore mietá, mɨa pɨá jararuma: nãɨ warra k'ak'uadepema ãyá wãse. Waa ichi k'ak'uade eda wãrãse.

Luca 17:5

Mãɨne Tachi Chiparipa ichi peedaɨrãpa ichiá jarasidama: —Tai k'aripase pia ĩjãanai k'orea.

Luca 7:38

Jesuk'á k'obeek'ari jẽa bɨpa ichi taubapa Jesú jĩru sɨɨsima. Maapae ichi pudapa p'oapik'ari Jesú jĩru sõk'ari ichia k'era enemeedapa p'ɨrɨsima.

Luca 7:44

Maapae wẽramá ak'ɨk'ari Simonoa jarasima: —¿Pɨa nãɨ wẽra unu bɨk'ãra? Pɨ tede cheside mɨ jĩru sɨɨmẽrá pɨa pania teaé pasima, maamina nãɨ wẽrapa ara ichi taubapa mɨ jĩru sɨɨk'ari ichi pudapa p'oapisima.

Hecho 10:19

Pedropa ununa k'orea wapida k'ɨ̃risia bɨde Tachi Ak'õre Jaorepa ichiá jarasima: «Ẽpẽerã ũpea p'anɨpa pɨ jɨrɨ p'anɨma.

Hecho 10:31

Mãɨ ẽpẽrapa mɨá jarasima: “Cornelio, pɨa ɨt'aa chiidi bada Tachi Ak'õrepa pia ũrisima. Ichia k'ɨ̃risia atuawẽa bɨma pɨa nenea k'ede k'aripaparit'a.

2 Corintio 2:4

Piarã mãɨ k'art'a bɨsima mãra ɨtɨai k'orea. Maamina mãɨya bɨé pasima mãra sõp'uadamẽrá, mãɨpari k'awadamẽrá mɨa mãra piarã k'ɨ̃ria bɨt'a. Mãɨ k'orea mɨa sõp'uadepa, minachia k'ɨ̃risia bɨdepa, mãɨnepa jẽa bɨdepa mãɨ k'art'a bɨ basima.

Ep'esio 2:8

Jesude ĩjãanana pẽra Tachi Ak'õrepa ichi sõpiadepa mãra k'aripasima. Ara machidepa k'aripadaé pasima, maawẽapuru Tachi Ak'õrepuru pari k'aripasima.

P'ilipense 1:29

Ichi piadepa mãra t'ɨ̃é pasima abapuru Cristode ĩjãa p'ananamẽrá, mãɨpari t'ɨ̃sima Cristo k'orea minachia mĩanamẽrá.

2 Tesalonicense 1:11

Mãɨ k'orea taipa ewaricha Tachi Ak'õrea ɨt'aa chiidipatama ichia mãra pia unumẽrá. Ichia mãra mãɨ k'orea t'ɨ̃sima. Taipa ɨt'aa chiidi p'anɨma Tachi Ak'õrepa ichi jua chaareadepa mãra ãareane k'aripamẽrá. Mãɨya ichide ĩjãa p'anɨnepa chi nepia oo k'ɨ̃ria p'anɨt'a jõma oodaipɨ.

2 Tesalonicense 1:3

Ũpẽarã, taipa ewaricha mãra k'orea Tachi Ak'õrea sõpia p'anɨane apatama. Taipa mãɨya oodai pia bɨma. Mãrapa ewaricha Cristode pia ĩjãa p'anɨma mãɨnepa machicha pia chi k'ɨ̃ria p'anɨma.

2 Timoteo 1:4

Mɨa pɨ jẽasi k'orea k'ɨ̃risiarude ak'ɨde wã k'ɨ̃ria baparima minachia arapá bai k'orea.

Hebreo 12:17

Mãrapa k'awa p'anɨma mãɨya nak'ari Esaupa k'ɨ̃ria basit'a chi ak'õrepa pedea piadepa ichiá pia pedeait'a Tachi Ak'õrepa k'aripamẽrá. Maamina chi ak'õrepa ichi itu bɨsima. Jẽasimina Esaupa naena oodapa p'ue pia bɨé pasima.

Hebreo 12:2

Jesude pia k'ɨ̃risiadai p'anɨma. Ichia k'aripasima tachia naa ĩjãanamẽrá mãɨnepa k'aripaparima ewaricha ĩjãa p'ananamẽrá. K'ɨ̃risiat'ɨ sãmaasã́ ichi k'urusude minachia mĩasit'a. Mãɨ k'orea p'erai badamina p'eraé pasima. Ichia k'awasima mãɨya nak'ari minachia arapá bait'a. Idiapae Tachi Ak'õre suak'a beeparí pia bɨ juaraari suak'abari bɨma.

Hebreo 5:7

Cristo nãɨ k'ak'uade baside ɨbɨa jẽa bɨpa Tachi Ak'õrea jĩk'ua chichupuria idisima, ichi piui bɨdepema p'ue k'aripai bada pẽra. Mãɨne chi Tachi Ak'õrepa k'ɨ̃ria bɨ jĩra ooyade ada pẽra, Tachi Ak'õrepa ichi pedea ũrisima.